ތުރުކީން އެގައުމުގެ ނަން ބަދަލުކޮށް، ޔޫއެންގައި އެގައުމަކީ "ތުރުކިޔޭ"ގެ ގޮތުގައި ބަލައިގަތުމަށް ހުށަހަޅާފައިވާ ހުށަހެޅުން ބަލައިގަނެ، ޔޫއެންގައި އެގައުމުގެ ނަން ތުރުކީގެ ބަދަލުފައި "ތުރުކިޔޭ"ގެ ގޮތުގައި ރަސްމީކޮށް ބޭނުން ކުރުމަށް ނިންމައިފިއެވެ.
ތުރުކީގެ ރައީސް ފާއިތުވެދިޔަ އަހަރު ލޯނޗު ކޮށްފައިވާ އެގައުމުގެ ނަން ރީ ބްރޭންޑު ކުރުމުގެ ކެމްޕޭންގެ ދަށުން، ދުނިޔޭގެ ގައުމުތަކާއި މުވައްސަސާތަކުން ތުރުކިޔޭގެ ގޮތުގައި އެގައުމުގެ ނަން ބޭނުން ކުރަންފެށުމަށް އެދެން ތުރުކީން ވަނީ ނިންމާފައެވެ.
"ތުރުކީގެ ރައްޔިތުންގެ ސަގާފަތާއި، ހަޟާރަތާއި، އަދި ގަބޫލުކުރާ އުސޫލުތައްވެސް އެންމެ ރަގަޅަށް ތަމްސީލުކޮށްދޭ ނަމަކީ ތުރުކިޔޭ،" ތުރުކީގެ ރައީސް ތައްޔިބު އެރެދޮގާން ފާއިތުވެދިޔަ އަހަރުގެ ޑިސެމްބަރުމަހު ވިދާޅުވެފައި ވެއެވެ.
ޔޫއެންއިން ބުނެފައިވާ ގޮތުގައި، ފާއިތުވެދިޔަ ހަފްތާގައި، އެގައުމުގެ ނަން ބަދަލުލު ކުރުމަށް ތުރުކީން އެދުމާއެކު ޔޫންއިންވަނީ އެގައުމުގެ ނަން ބަދަލު ކޮށްފައި ކަމުގައެވެ.
ތުރުކީގެ ގިނަ ރައްޔިތުން މިހާރު ތުރުކީ ބަލައިގަންނަނީ ތުރުކިޔޭގެ ނަމުންނެވެ. އެހެންނަމަވެސް މިނަމުގެ އިނގިރޭސި ގޮތްކަމުގައިވާ "ތުރުކީ" މިނަން އަދިވެސް ފުޅާ ދާއިރާއެއްގައި ތުރުކީގައިވެސް ދަނީ ބޭނުން ކުރެވެމުންނެވެ.
ތުރުކީގެ ނަން ބަދަލު ކޮށްފައިވާކަން ފާއިތުވެދިޔަ އަހަރު އެގައުމުން ނިންމުމާއެކު، އެގައުމުގެ ރަސްމީ ޓީވީ TRTއިން ވަނީ އެކަން އާންމުކޮށް އިއުލާން ކޮށްފައެވެ. ނަން ބަދަލު ކުރި އެއް ސަބަބުގެ ގޮތުގައި ތުރުކީގެ ގައުމީ ޓީވީން ހާމަ ކޮށްފައިވަނީ، އެގައުމުގެ ނަމަކީ ކުރިސްމަސް އާއި، އާ އަހަރާއި އަދި ކުރިސްޓިއަނުން ފާހަގަކުރާ "ތޭންކްސްގިވިން" ދުވަހާއި ގުޅުންހުރި ނަމަކަށް ވާތީއެވެ.
އޭގެ އިތުރަށްވެސް ތުރުކީން ހާމަ ކޮށްފައިވާ ގޮތުގައި ނަން ބަދަލުކުރި އަނެއް ސަބަބަކީ، ކޭބްރިޖް ޑިކްޝަނަރީގައިވެސް އެބަހުގެ މާނާއިގެ ތެރޭގައި، "ނާކާމިޔާބުވުން" "ތާކުންތާކު ނުޖެހޭ އަދި ސޭކު މީހާ" މި މާނަތައް ހިމަނާފައި ވުމެވެ.
ތުރުކީގެ ނަން ރީބްރޭންޑު ކުރުމަށް އެގައުމުން ކުރާ މަސައްކަތްތަކުގެ ތެރޭގައި، އެގައުމުން އެކްސްޕޯޓުކުރާ އުފެއްދުތައްކުގައި، "ތުރުކިޔޭގެ އުފެއްދުމެއް" މިގޮތަށް ޖެހުން ހިމެނެއެވެ. އަދި މިއަހަރުގެ ޖެނުއަރީމަހު ތުރުކީންވަނީ، "ހެލޯ ތުރުކިޔޭ" މި ޝިއާރު ބޭނުންކޮށްގެން ފަތުރުވެރިކަމަށް އަމާޒުކޮށް ޚާއްސަ ކެމްޕޭނެއްވެސް ލޯންޗް ކޮށްފައެވެ.
