އައްޑޫ ހިންގި ސިލްސިލާ މާރާމާރީގައި ޒަޚަމްވި ޒުވާނަކު މަރުވެއްޖެއެވެ. މަރުވެފައިވަބީ ޢުމުރުން 21 އަހަރުގެ ޒުވާނެކެވެ.
އައްޑޫ ސިޓީ ފޭދޫގައި ތޫނު އެއްޗަކުން ހަމަލާދީ ޒުވާނަކު ޒަޚަމްކޮށްލާފައިވާކަމުގެ މަޢުލޫމާތު ރޭ ދަންވަރު 03:10 ހާއިރު ލިބިފައިވާކަމަށް ފުލުހުން ބުންޏެވެ. މި މާރާމާރީގައި ޒަޚަމްވި ޒުވާނާއަށް އައްޑޫ އީކުއިޓޯރިއަލް ހޮސްޕިޓަލުގައި ފަރުވާ ދެމުން ދަނިކޮށް މިއަދު ވަނީ މަރުވެފައިކަމަށް ފުލުހުން ބުންޏެވެ. އޭނާ މަރުވީ އައިސީޔޫގައި ފަރުވާދެމުން އަންނަނިކޮށެވެ.
އައްޑޫގައި ސިލްސިލާ މާރާމާރި ހިނގަމުން އަންނައިރު، މިދިޔަ އަންގާރަ ދުވަހުވެސް މާރާމާރިއެއް ރިޕޯޓްކޮށްފައިވާކަމަށް ފުލުހުން ބުނެފައިވެއެވެ. އެ މާރާމާރީގައި އަނިޔާކޮށްފައިވަނީ ޢުމުރުން 19 އަހަރުގެ ޒުވާނަކަށެވެ. އޭނާ މާލެ ގެނެސް އަންނަނީ ފަރުވާދެމުންނެވެ.
މި މާރާމާރިއާއި ގުޅިގެން އެއްވެސް މީހަކު ހައްޔަރުކުރިކަމަކަށް ފުލުހުން ނުބުނެއެވެ. މި މައްސަލަ ފުލުހުން އަންނަނީ ތަހްގީގްކުރަމުންކަމަށް ފުލުހުން ބުންޏެވެ.
