އާޖެންޓީނަގެ ތަރި ލައިނޮލް މެސީގެ މޮޅު ކުޅުމާއިއެކު ޔޫރަޕްގެ ޗެމްޕިއަން އިޓަލީގެ މައްޗަށް 3-0 ގެ ނަތީޖާ އަކުން ކާމިޔާބު ހޯދައި، އާޖެންޓީނާއިން ފައިނަލިސިމާ ކާމިޔާބު ކޮށްފިއެވެ.
ލަންޑަންގެ ވެމްބްލީ ސްޓޭޑިއަމްގައި މިރޭ ކުޅުނު މެޗު ފަށައިގެން އިޓަލީ އާއި އާޖެންޓީނާގެ ފަރާތުން ހަމަހަމަ ކުޅުމެއް ފެނިގެންދިޔައިރު، އިޓަލީގެ ޖިއަކޯމޯ ރަސްޕަޑޯރީ ޖެހި ބޯޅައެއް އާޖެންޓީނާގެ ކީޕަރު، އެމިލިއާނޯ މާޓީނޭޒް ވަނީ އަތަށް ނަގައިފައެވެ. އޭގެ ފަހުން، އާޖެންޓީނާގެ ކެޕްޓަން، ލިއޮނަލް މެސީ ޖެހި ބޯޅައެއް އަމާޒުވީ އިޓަލީގެ ކީޕަރު ޖިއަންލުއީޖީ ޑޮންނަރުންމާ އަތަށެވެ.
އާޖެންޓީނާ އިން ލީޑުނެގީ މެޗުގެ 28 ވަނަ މިނިޓްގައެވެ. އިޓަލީގެ ޑިފެންޑަރު ޑި ލޮރެންޒޯ ކައިރިން ދެމިގަތުމަށް ފަހު، މެސީ، އޭރިއާތެރެެއަށް ބޯޅަ ހިފައިގެން ވަދެ، ގޯލު ކުރިމައްޗަށް ހުރަސްކޮށްލި ބޯޅަ ލަޓާރޯ މާޓީނޭޒް ވަނީ ހަމަޖެހިލާފައި ގޯލުގެ ތެރެއަށް ފޮނުވާލައިފައެވެ. މިއީ ލަޓާރޯ މާޓީނޭޒް އާޖެންޓީނާ އަށް ޖަހައިދިން، 20 ވަނަ ގޯލެވެ. އާޖެންޓީނާ އިން އެ އެޓޭކްފެށިއިރު، އިޓަލީގެ ކުޅުންތެރިއަކަށް ފައުލުކުރިތޯ ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލައި، ކަށަވަރުކުރިއެވެ.
ފުރަތަމަ ހާފެކޭ އެއްގޮތަށް ދެވަނަ ހާފްގައިވެސް އާޖެންޓީނާގެ ފަރާތުން މޮޅު ކުޅުމެއް ފެނިގެން ގޮސްފައިވާއިރު، އެޓީމުން ވަނީ ލީޑު ފުޅާ ކުރަން ގިނަ ފުރުސަތުތަކެއް ހޯދާފައެވެ. މިގޮތުން ޑިމަރިއާ ފޮނުވާލި ހަމަލާތައް ޑޮނަރޫމާ ވަނީ ދިފާއުކޮށްފައެވެ.
މުޅި މެޗުގައިވެސް އިޓަލީގެ ފަރާތުން މާ އެދެވޭ ކުޅުމެއް ފެނިގެން ގޮސްފައި ނުވި ނަމަވެސް، އެޓީމުން ވަނީ ލިބުނު ފުރުސަތުތަކުގައި އާޖެންޓީނާގެ ގޯލަށް ނުރައްކާ ކުރަން މަސައްކަތް ކޮށްފައެވެ. އެގޮތުން ގޯލާ އަމާޒުކޮށް ބައެއް ހަމަލާތައްވެސް އެޓީމުން ވަނީ އުފައްދާފައެވެ.
ރޭގެ ނަތީޖާއާ އެކު އާޖެންޓީނާގައި މިހާރު މި އޮތް ޓީމުން މި ވަނީ އެ ގައުމުގެ ފުޓްބޯޅަ ތާރީހުގައި ބަލިނުވެ، އެންމެ ގިނަ މެޗު ފުރިހަމަކޮށް އާ ރެކޯޑެއް ގާއިމްކޮށްފައެވެ. އާޖެންޓީނާ އިން ވަނީ 1991 އިން 1993 އަށް ބަލިނުވެ، 31 މެޗު ފުރިހަމަކޮށްފައެވެ. މި ފަހަރު މި ވަނީ އެ ރެކޯޑަށް އިތުރު ފުރިހަމަކަމެއް ގެނެސްފައެވެ.
މިރޭގެ މެޗަކީ، 2000 ވަނަ އަހަރަށް ފަހު އިނގިރޭސި ވެމްބްލީ ސްޓޭޑިއަމްގައި އާޖެންޓީނާ އިން ކުޅުނު ފުރަތަމަ މެޗެވެ.
