ޔުއެފާ ޗެމްޕިއަންސްގެ 22-2021 ސީޒަނުގެ އެންމެ މޮޅު ކުޅުންތެރިޔަކަށް ރެއާލް މެޑްރިޑަށް ކުޅެމުން އަންނަ ފްރާންސްގެ ފޯވާޑް ކަރިމް ބެންޒެމާ ހޮވައިފިއެވެ.
ޔުއެފާ އިން ބުނީ، އެ އިދާރާގެ ޓެކްނިކަލް އޮބްޒާވާ ޕެނަލްއިން ހޮވި އެންމެ މޮޅު ކުޅުންތެރިޔާގެ މަގާމު ބެންޒެމާއަށް ލިބިފައިވާ ކަމަށެވެ. ބެލޮންޑިއޯ އެވޯޑް ހޯދާނެކަމަށް ގިނަބަޔަކު ޤަބޫލުކުރާ ބެންޒިމާ ވަނީ އޭނާގެ ކެރިއަރުގައި ފަސްވަނަ ފަހަރަށް ޗެމްޕިއަންސްލީގު ކާމިޔާބުކޮށްފައެވެ. ފަސް ފަހަރުވެސް މުބާރާތް ކާމިޔާބުކުރީ ރެއާލް މެޑްރިޑާއެކުއެވެ. އެންމެ ފަހުން ނިމިގެން ދިޔަ ސީޒަންގެ މުބާރާތް ބެންޒިމާ ރެއާލްއާއެކު ކާމިޔާބުކުރީ އެންމެ ގިނަ ލަނޑު ޖެހި ކުޅުންތެރިޔާގެ ގޮތުގައެވެ. މުބާރާތުގައި ކުޅުނު 12 މެޗުން ބެންޒިމާ 15 ލަނޑު ޖެހިއެވެ.
ޔުއެފާގެ ޓެކްނިކަލް އޮބްޒާވާ ޕެނަލްއިން ހޮވި 22-2021 ވަނަ ސީޒަންގެ ޗެމްޕިއަންސް ލީގްގެ އެންމެ މޮޅު ޒުވާން ކުޅުންތެރިޔަކަށް ހޮވިފައިވަނީ ރެއާލް މެޑްރިޑަށް ކުޅެމުން އަންނަ ބްރެޒިލްގެ ވިންގާ ވިނީސިއަސް ޖޫނިއާ ކަމަށެވެ.
ޔުއެފާގެ ޓެކްނިކަލް އޮބްޒާވާ ޕެނަލްއިން ހޮވި 22-2021 ވަނަ ސީޒަންގެ ޗެމްޕިއަންސް ލީގްގެ "ޓީމް އޮފް ދަ އިޔާ" އަކީ:
ކީޕަރު: ކޯޓުއާ – ރެއާލް މެޑްރިޑް
ޑިފެންޑަރު: އެލެގްޒެންޑާ އާނޮލްޑް – ލިވަޕޫލް
ޑިފެންޑަރު: ރޮބަޓްސަން – ލިވަޕޫލް
ޑިފެންޑަރު: ރުޑިގާ – ޗެލްސީ
ޑިފެންޑަރު: ވެންޑައިކް – ލިވަޕޫލް
މިޑްފިލްޑަރު: ފަބީނިއޯ – ލިވަޕޫލް
މިޑްފިލްޑަރު: ޑިބްރޭނާ – މެންޗެސްޓާ ސިޓީ
މިޑްފިލްޑަރު: ލޫކާ މޮޑްރިޗް – ރެއާލް މެޑްރިޑް
ފޯވާޑް: އެމްބާޕޭ – ޕީއެސްޖީ
ފޯވާޑް: ވިނީސިއަސް – ރެއާލް މެޑްރިޑް
ފޯވާޑް: ބެންޒެމާ – ރެއާލް މެޑްރިޑް
މި ސީޒަނުގައި ރެއާލްއަށް މޮޅު ކުޅުމެއް ދައްކަމުން އަންނަ ވިނީސިއަސް ވަނީ މިހާތަނަށް ކުޅުނު 52 މެޗުގައި 22 ލަނޑު ކާމިޔާބުކޮށްފައެވެ. އޭގެ ތެރެއިން ހަތަރު ލަނޑު އޭނާ ކާމިޔާބުކޮށްފައި ވަނީ ޗެމްޕިއަންސް ލީގުގައެވެ.
