އާޖެންޓީނާ އާއި ޔޫރޯގެ ޗެމްޕިއަން، އިޓަލީ ބައްދަލުކުރާ "ފައިނަލިސިމާ" މެޗު މިރޭ އިންގްލެންޑްގެ ރަސްމީ ދަނޑު، ވެމްބްލީ ސްޓޭޑިއަމްގައި ކުޅުމަށް ހަމަޖެހިއްޖެއެވެ.
އާޖެންޓީނާ އިން ވަނީ އެންމެ ފަހުން އިޓަލީއާ ދެކޮޅަށް އިންގްލެންޑްގައި ކުޅުނު މެޗުން މޮޅުވެފަ އެވެ. އިއްތިހާދު ސްޓޭޑިއަމްގައި 2018 ވަނަ އަހަރުގެ މާޗް މަހު ކުޅުނު މެޗުން އާޖެންޓީނާ މޮޅުވީ 2-0 އިންނެވެ. އިޓަލީ އެންމެ ފަހުން އާޖެންޓީނާ އަތުން މޮޅުވީ މީގެ 35 އަހަރު ކުރިންނެވެ. އެއީ 1987 ވަނަ އަހަރު، ކުޅުނު އެކުވެރިކަމުގެ މެޗެއްގައި 3-1 އިން އިޓަލީ މޮޅުވި ފަހަރެވެ.
އިޓަލީ ވަނީ ވެމްބްލީގައި މިދިޔަ އަހަރު ކުޅުނު ޔޫރޯ މުބާރާތުގެ ފައިނަލުގައި އިންގްލެންޑް ބަލިކޮށް ޗެމްޕިއަންކަން ހޯދައިފައެވެ. ނަމަވެސް އެ ފޯމުގައި ކުޅުނު އިޓަލީ އަށް މި އަހަރުގެ ވޯލްޑް ކަޕަށް ކޮލިފައި ވެވޭ ގޮތެއް ނުވިއެވެ. މިއީ ޖެހިގެހިގެން އިޓަލީ ވޯލްޑް ކަޕަށް ކޮލިފައި ނުވި ދެވަނަ ފަހަރެވެ.
އާޖެންޓީނާ އިން ތައްޓެއް ހޯދަން 28 އަހަރު ދުވަހު ކުރި އިންތިޒާރަށް ނިމުމެއް އައީ ލިއޮނެލް މެސީގެ ކެޕްޓަންކަމުގައި މިދިޔަ އަހަރުގެ ކޮޕާ އެމެރިކާ މުބާރާތުގެ ޗެމްޕިއަންކަމާ އެކު އެވެ. އާޖެންޓީނާ ވަނީ ކޮޕާ އެމެރިކާ އެންމެ ގިނައިން ކާމިޔާބުކުރި ޓީމުގެ ރެކޯޑް އޮންނަ އުރުގުއޭއާ ހަމަކޮށްފަ އެވެ.
މިއީ ކޮންމެބޯލް އާއި ޔޫއެފާގެ ޗެމްޕިއަނުން، ތާރީހުގައި ވެސް ކުޅޭ މިފަދަ ފުރަތަމަ މެޗެވެ. އެންމެ ފުރަތަމަ 1985 ވަނަ އަހަރު ފްރާންސްގައި ކުޅުނު މެޗު އެ ގައުމުން ކާމިޔާބުކުރީ 2-0 އިން އުރުގުއޭ ބަލިކޮށްފަ އެވެ. އެއަށް ފަހު 1993 ވަނަ އަހަރު އާޖެންޓީނާގައި ކުޅުނު މެޗު އެ ޓީމުން ކާމިޔާބުކުރީ ޑެންމާކާ ދެކޮޅަށް ކުޅެ ޕެނަލްޓީ ޖަހައިގެންނެވެ. އެ މެޗަކީ އާޖެންޓީނާގެ ލެޖެންޑް މަރަޑޯނާގެ ކެރިއަރުގައި ހޯދި އެންމެ ފަހު ކާމިޔާބީއެވެ.
އާޖެންޓީނާ އާއި އިޓަލީ ވާދަކުރާ ޗެމްޕިއަނުންގެ މެޗު ފަށާނީ މިރޭ ރާއްޖެ ގަޑިން 11:45 ގައެވެ.
