ދެމަރިފިންގެ މެދުގައި ޖެހޭ ބައެއް މައްސަލަތައް ކަމަކަށް ނަހަދައި، ދޫކޮށްލުމަކީ އަހަރެމެންގެ ތެރޭގައި ވަރަށް ގިނަ ބައެއްގެ އާދައެކެވެ. އެކަމަކު ވިސްނާލަން ޖެހެނީ މިހެން ކަންތައް ކުރުމުން މައްސަލަ ހައްލުވެތޯއެވެ. ނޫނީ ދިރިއުޅުމުގެ މިސްރާބު ރަނގަޅަށް ދާކަމުގެ އިހުސާސް ތިމާއަށް ކުރެވޭ ތޯއެވެ.

ދިރިއުޅުމުގައި ދިމާވާ ބައެއް މައްސަލަތަކަކީ މިގޮތަށް ކަމަކަށް ނަހަދާ ދޫކޮށްނުލެވޭނެ ކަންތައްތަކެވެ. ތިރީގައި އެވަނީ އެފަދަ 6 މައްސަލައެކެވެ.

ދެމީހުންގެ މިޒާޖާއި ވިސްނުމުގައި ބޮޑެތި ތަފާތުތަކެއް ހުންނަ ނަމަ ދިމާވާ މައްސަލަތައް ގިނަވެއެވެ. އަދި އެއްގަލަކަށް ނޭރި ކޮންމެ ކަމެއްވެސް ކޮޅެއްގައި ނުޖެހި ނިމިގެންދެއެވެ. މިފަދަ ހާލަތްތަކުގައި އެ މައްސަލަތައް ހައްލުކުރަން އުޅުމަކީވެސް ދެމަފިރިންނަށް ވޭނަކަށްވެއެވެ. އަދި ވާހަކަ ދައްކައިގެން ކަންކަން ހައްލުކުރުމުގެ ބޭނުމެއް ނޯންނަކަން ދެމީހުންނަށްވެސް އިހުސާސްވެއެވެ. މިއީ ދިރިއުޅުމައިގެން ހަޔާތުގެ ބާކީބައި ކުރިއަށް ނުގެންދެވޭނެ ހާލަތެކެވެ.

• އަބަދުވެސް ތިމާގެ ކޮޅު ބަލިވުން، ނޫނީ ތިމާ އެދޭގޮތް އެއީ ރަގަނޅުގޮތް ކަމަށް އަނެކާ ނުދެކުމަކީ ޒުވާބު ހޫނުވެ އެކަކު އަނެއްކަކުގެ އުނި ކަނަތަކުގެ ވާހަކަ ގޮވޭ ހިސާބަށް ދާ މައްސަލައެކެވެ. މިހާލަތުގައި މައްސަލައިގެ ހައްލުއޮތީ ތިމާގެ އަތުގައި ކަމަށްވިޔަސް އެކަން ޤަބޫލުނުކޮށް ދެބަސްވުން ހޫނުވާނެއެވެ. އެހެން ވާނަމަ ދެމީހުން ދެމަގުން ހިގުން ބުއްދިވެރިއެވެ.

• ތިމާގެ ހިތަށް ނުކުޅަދާނަ ވާވަރަށް މައާފް ކުރަން ޖެހޭ ހާލަތްތައް ދިރިއުޅުމުގައި އަންނަނަމަ އެކަން އަބަދުކުރުމަށްވުރެ ދުރަށް ދިއުން ބުއްދިވެރިވާނެއެވެ. އެހެނީ މަތި މައްޗަށް މަކަރު ހަދާ އޮޅުވާލާނަމަ އެމީހެއްގެ ކުށަށް މައާފްކުރުމެއް ނުވެއެވެ. މައާފް ކުރެވޭނީ އެމީހެއްގެ ތެދުވެރިކަން ހިތުގައި އޮންނަ ހިނދުއެވެ. އަދިވެސް އެ ގޯސް ހަދާފާނެކަން ޤަބޫލުކުރެވޭ ހިސާބަށް ކަންތަށްތަށް ދިއުމުން ދެން މައާފްކުރުމުގެ ބޭނުމެއް ނެތެވެ.

• ދެމަފިރިންގެ ދޭތެރޭގައި އޮންނަ އެއްމެ ބޮޑު އެއް ގުޅުމަކީ ޖިސްމާނީ ގުޅުމެވެ. ޖިންސީ ގޮތުން ލިބޭ އުފަލާ ދޭތެރޭ ތިމާގެ ހިތުގައި ޝައްކު އުފެދި ހިތް ނުތަނަވަސްވާނަމަ އެކަމާ ވާހަކަ ދެއްކުން ވަރަށް މުހިންމެވެ. ހައްލުކުރުމަކީވެސް ވަރަށް މުހިއްމު ކަމެކެވެ. އެހެނީ ތިމާއަށް ނޭނގުނު ކަމުގައިވިޔަސް އެ ގުޅުމަކީ ދެމަފިރިންގެ ދޭތެރޭގައި އުފެދިފައިވާ ގާތްކަން ދަމަހައްޓައިދޭ މުހިއްމު ބާރެކެވެ. އެގުޅުން ހީނަރު ވެއްޖެނަމަ ދިރިއުޅުމުގެ ބޮޑުބައެއް ހީނަރުވެއެވެ.

• އާއިލާއަށް ވަގުތު ދިނުމަށްވުރެ ތިމާގެ އުފަލާއި ތިމާގެ މަސައްކަތަށް ލޯބިކުރަން ފަށައިފިނަމަ ވިސްނާށެވެ. ދިރިއުޅުމަށް އެ އަންނަނީ ބޮޑު ބަދަލެކެވެ. އެހާލަތުގައި ދެމަފިރިންގެ ދެމެދުގައި ވަރަށް ގިނަ، ކުދިކުދި އަރާރުންވުންތައް ހިނގާނެއެވެ. އަދި އެކަމާ ކުރެވޭ ޝަކުވާއަށް ހައްލެއް ހޯދުމުގެ ބަދަލުގައި ޝަކުވާކުރާތީ ތިމާ ކުށްވެރި ކުރާނެއެވެ. ދިރިއުޅުމުގެ މައްސަލަ ޖައްސާ ގޯސް މީހެއްގެ ލަގަބު ތިމާއަށް ލިބޭނެއެވެ.

• ތިމާ ދައްކަން ބޭނުންވާ އަދި ދިރިއުޅުމުގައި ދިމާވާ ހުރިހާ ކަމެއް ބައިވެރިޔާ އާއި އެއްވެސް ފޮރުވުމެއްނެތި ހިއްސާ ނުކުރެވޭނަމަ އެއީ މަޑުމަޑުން ތިމާއާއި ދިރިއުޅުން ހަލާކު ކޮށްލާނެ ކަމެކެވެ.

• ހިތުގައި އުފެދޭ ޝުއޫރުތައް ވަގުތުން ހާމަނުކުރެވި ނޫނީ ކުރަން ނުކެރި ފަހުން ހާމަކުރަން ބަހައްޓަން ޖެހޭނަމަ އެއީ ވެސް ދިމާވާނެ ބޮޑު މައްސަލައެކެވެ. ރުޅި އައިސްދާނެތީ ނޫނީ ބުނާނެ އެއްޗެއް ނޭނގި ނުވަތަ އެކަށީގެންވާ ވަގުތެއް ނައިސްގެން ހިތުގައި ފޮރުވަން ޖެހޭ ރިހުންތަކެއް ހުންނަ ނަމަ އޭގެން ތިމާއަށްވެސް ނުރަނގަޅު އަސަރުތަކެއް ކުރެއެވެ.

މިފަދަ މައްސަލައެއް ދިރިއުޅުމުގައި އުޅޭނަމަ ކުޑަ ކަމަކަށް ހަދާ އަޅާނުލާ ދޫކޮށް ނުލާށެވެ. ނޫނީ ވަގުތާއެކު ހަނދާން ނެތިގެން ދާން ނުބަހައްޓާށެވެ. މިފަދަ ކޮންމެ މައްސަލައަކީ ދިރިއުޅުން ކިތަންމެ ދުވަހަކު ދެމިގެން ދިޔަޔަސް ތިމާއަށް އެކަމުން ވަކި ނުވެވޭނެ މައްސަލަތަކެކެވެ.