ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން ދިން ޓެރެރިސްޓް ހަމަލާއާއި ގުޅިގެން ދަޢުވާ އުފުލާފައިވާ މީހުން ޝަރީއަތަށް މީހުން ހާޒިރު ނުކުރެވެމުން އެކަމުގެ ނުރުހުން އެމަނިކުފާނު ވަކީލުންގެ ޓީމުން ފާޅުކޮށްފިއެވެ.
ރައީސް ނަޝީދުގެ ވަކީލުންގެ ޓީމުން ނެރުނު ބަޔާނެއްގައި ބުނެފައިވަނީ މާލެ ސަރަހައްދުގެ މޫސުން ގޯސްކަން ކުރިން އެނގޭއިރު، މިމައްސަލައިގައި ޝަރީއަތަށް ހާޒިރު ކުރަންޖެހޭ މީހުން ކުރީބައިގައި މާލެ ގެނެސް މާލޭގެ ޖަލެއްގައިވެސް ބޭތިއްބޭނެކަމަށެވެ. ނަމަވެސް މިއިންތިޒާމުވެސް ހަމަ ނުޖައްސައި ހަމައެކަނި މޫސުން ގޯސްވެގެން ކަމަށް ބުނެ ދައްކާ ބަހަނާއަކީ ބަލައި ގަނެވޭނެ ބަހަނާއެއް ނޫންކަމަށް ރައީސް ނަޝީދުގެ ވަލީލުންގެ ޓީމުން ބުނެފައިވެއެވެ.
މިމައްސަލައަކީ ޝަރީއަތް އޮންނާނެ ތާރީހު ދުރާލައި ކޯޓުން އިއުލާންކޮށްފައިވާ މައްސަލައަކަށް ވާއިރު މިމައްސަލާގައި ކަރެކްޝަނަށް ގައިދީން ހާޒިރު ކުރެވިފައި ނުވަނީ އެމުވައްސަސާގެ ޒިންމާދާރުކަން ކުޑަކަމުން ވީކަމެއްކަމަށް މިބަޔާނުގައިވެއެވެ.
މިމައްސަލައިގެ ޝަރީއަތްތައް ލަސްވާ މައްސަލާގައި ތަކުރާރުކޮށް ކަންބޮޑުވުން ފާޅު ކުރަމުންދާއިރުވެސް މިކަމުގައި ހޯމް މިނިސްޓްރީއާއި، ކަރެކްޝަނުން އަދާކުރަމުންދަނީ ވަރަށް ޒިންމާދާރުކަން ކުޑަ ދައުރެއްކަމަށް ވަނީ ބުނެފައެވެ.
ރައްޔިތުންގެ މަޖިލީހުގެ ރައީސް އަދި ކުރީގެ ރައީސް ރައީސް މުހައްމަދު ނަޝީދު އަވަހާރަކޮށްލަން ދިން ޓެރެރިސްޓް ހަމަލާއާއި ގުޅިގެން ދަޢުވާ އުފުލާފައިވާ މީހުންގެ ޝަރީޢަތުގެ އަޑުއެހުން ކެންސަލްކޮށްފައެވެ.
މިއަދު ހެނދުނު 09:00އަށް ތައާވަލުކޮށްފައިވާ އަޑުއެހުން ކެންސަލްކުރީ ޖަލުގައި ތިބި ދައުވާ ލިބޭ މީހުން ކޯޓަށް ޙާޒިރު ނުކުރެވިގެންކަމަށް ކްރިމިނަލް ކޯޓުން ބުންޏެވެ. މޯލްޑިވްސް ކަރެކްޝަނަލް ސާރވިސްގެ ބެލުމުގެ ދަށުގައި ތިބި މީހުން ޝަރީޢަތަށް ޙާޒިރުނުކުރެވުނީ މޫސުން ގޯސްވެ ކަނޑުގަދަވުމުގެ ސަބަބުންކަމަށް ކޯޓުން ވަނީ ބުނެފައެވެ.
ކަރެކްޝަނުން ބުނެފައިވަނީ ބޮމުގެ ހަމަަލާއާއި ގުޅިގެން ބަންދުކޮށްފއިވާ ފަރާތްތައް މިއަދު ޝަރީއަތައް ހާޒިރު ކުރެވިފައި ނުވަނީ މޫސުމް ގޯސްވެ، މޯލްޑިވްސް މީޓިއޮރޮލޮޖިކަލް ސަރވިސްއިން "ވައިޓް އެލަރޓް" ނެރުމާ ގުޅިގެންނާއި، މި މައްސަލައިގެ ބަންދުމީހުން ވަކި ވަކިން ގެންގުޅެން ޖެހޭތީ ކަމަށެވެ. މިކަން ވާނީ ކޯޓަށްވެސް ހިއްސާކުރެވިފައިކަމަށް ކަރެކްޝަނުން ވަނީ ބުނެފައެވެ. ކަރެކްޝަނުން ބުނެފައިވަނީ މި މައްސަލައަކީ އެސާވިސްއިން ވަރަށް ސީރިއަސް މައްސަލައެއްގެ ގޮތުގައި ދެކޭ މައްސަލައެއް ކަމަށެވެ.
