މިމަހުގެ 27 އިން 29 އަށް އއ.އުކުޅަހުގައި ބޭއްވި ވިއަވަތި ކޮންފަރެންސުން ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ނުފެނި ނިމިއްޖެއެވެ.
މިކޮންފަރެންސްގެ މައިގަނޑު އެއް މަޤްޞަދަކީ ރާއްޖޭގެ ލާމަރުކަޒީ ނިޒާމު ފުރިހަމަކޮށް، ކައުންސިލުތައް ބާރުވެރިކުރުމަށް ރައީސުލްޖުމްހޫރިއްޔާ ފައްޓަވާފައިވާ މަސައްކަތް އިތުރަށް ހަރުދަނާކުރެއްވުމެވެ. ދެ ދުވަހުގެ މުއްދަތައް ކުރިޔަށްދިޔަ މި ކޮންފަރެންސްގައި ކައުންސިލްތައް މާލީގޮތުން ބާރުވެރިކުރުވުމާއި ގުޅޭގޮތުންނާއި، ބިނާވެށި ޕްލޭން އެކުލަވާލުމާއި ގުޅޭގޮތުންނާއި، ރަށްރަށުގެ ތަރައްޤީގައި އަންހެނުންގެ ކޮމިޓީގެ ދައުރާއި ގުޅޭގޮތުންނާއި، ލާމަރުކަޒީ ނިޒާމުގެ މިހާރުގެ މިސްރާބާއި ގުޅޭގޮތުން 4 ސެޝަނެއް ވަނީ ކުރިޔަށްގެންގޮސްފައެވެ.
މިބައްދަލުވުމަކީ އެމްޑީޕީގެ އެތެރޭގެ އިންތިޚާބަށްފަހު ބޭއްވި މިފަދަ ފުރަތަމަ ކޮންފަރެންސެވެ. މީގެ ކުރިން ބޭއްވި މިފަދަ ގިނަ ކޮންފަރެންސުތަކުގައި ރައީސް ނަޝީދަށް ދައުވަތު ދެވި، ރައީސް ނަޝީދުގެ ބައިވެރިވުމުން ފެނިފައި ވެއެވެ. ޚާއްސަކޮށް ކައުންސިލްތަކާއި ގުޅުންހުރި މިފަދަ ކޮންފަރެންސު ތަކަކީ ރައީސް ނަޝީދު ވަރަށް ޝައުގުވެރިކަން ހުންނަ ކޮންފަރެންސްތަކެއްކަން ފާހަގަ ކޮށްލެވެއެވެ.
މިކޮންފަރެންސުގައި ކައުންސިލްތަކުގެ އެންމެ ބޮޑު ކަންބޮޑުވުމެއް އޮތް އެއްކަމަކީވެސް ރައްޔިތުންގެ މަޖިލީހާއި ސިދާ ގުޅުންއޮތް މައްސަލައެކެވެ. ކައުންސިލްތަކަށް ލޭންޑް ޔޫސް ޕްލޭން ހެދުމަށް ދިމާވެފައިވާ މައްސަލައަށް ހައްލު ހޯދުމަށް ހުރި ގޮންޖެހުންތަކުގެ ވާހަކަ އަކީ މިކޮންފަރެންސުގައި އެންމެ ގަދަޔަށް މަޝްވަރާކޔރެވުނު އެއް މައްސަލައެވެ. ނަމަވެސް މިކަމުގައި މަޖިލިސް ރައީސްގެ އެއްވެސް ބައިވެރިވުމެއް ނެތުމުން މަޖިލިސްގެ ސީދާ ބަހެއް މިކޮންފަރެންސުގައި އިވިގެން ގޮސްފައެއް ނުވެއެވެ. ކޮންފަރެންސުގައި މަޖިލީހުން ބައިވެރިވެފައިވަނީ ލާމަރުކަޒީ ކޮމެޓީގެ މުޤައްރިރު އަލީ ނިޔާޒެވެ.
މިބައްދަލުވުމުގައި ބައިވެރިވުމަށް ރައީސް ނަޝީދަށް ދައުވަތު ދެވުނުކަމެއްވެސް ސާފެއް ނޫނެވެ. ނަމަވެސް އާންމުކޮށް މިފަދަ ކޮންފަރެންސުތަކަކީ ފާއިތުވެދިޔަ ތަނުގައި ނަޝީދު އިސްކަމެއް ދެއްވައިގެން ބައިވެރިވެ ވަޑައިގެންފައިވާ ކޮންފަރެންސްތައްކަން ފާހަގަ ކޮށްލެވެއެވެ. މިކޮންފަރެންސު ބޭއްވިގެންދާ ދަނޑިވަޅަކީ ރައީސް ނަޝީދާއި، ރައީސް ޞާލިހާއި ދެމެދު ސިޔާސީ ގޮތުން ވާދަވެރިކަން ވަރަށް ބޮޑަށް އުފެދި ޕާޓީ ރަސްމީކޮށް ދެ ފެކްޝަނެއްގެ ގޮތުގައި ހިގަމުންދާ ދަނޑިވަޅެއްވެސްމެއެވެ.
ޚާއްސަކޮށް ކުުރިއަށް އޮތް ރިޔާސީ އިންތިޚާބުގައި އެމްޑީޕީން ވާދަކުރާ ކެނޑިޑޭޓަކާއިމެދު ބަހުސް ބޮޑުވެފައިވާ މިދަނޑިޅުގައި ސަރުކާރުން ކުރާ އެކި ކަންކަމުގައި ރައީސް ނަޝީދުގެ ދައުރު ހަނިވެ، މަފަދަ ބައެއް އިވެންޓުތަކުން ނަޝީދަށް ޖާގަ ނުލިބި ދިއުމަކީ އާންމުކަމަށް ވެގެން ހިގައިދާނެކަމުގެ ކަންބޮޑުވުން ނަޝީދަށް ތާއީދުކުރާ ފަރާތްތަކުން ފާޅުކުރެއެވެ. އިންތިޚާބުގެ ކުރިން ރައީސް ޞާލިހުގެ މަގުބޫލުކަން އިތުރަށް ބޮޑުކޮށް، ރައީސް ނަޝީދުގެ އަޑު ފަޑުކުރުމަކީވެސް މިފަދަ ކަންކަމުން ނަޝީދު ނުފެނިގެންދާ އެއްސަބަބު ކަމަށް ވެސް ނަޝީދަށް ތާއީދުކުރާ ބައެއް ފަރާތްތަކުން ދެކެއެވެ.
ވިއަވަތި ކޮންފަރެންސްއިން ނަޝީދު ނުފެނުމުން އެކަމުގެ ކަންބޮޑުވުން އެމްޑިޕިގެ ބައެއް ފަރާތްތަކުން ފާހަގަ ކުރާއިރު، ނިމިދިޔަ އެމްޑީޕީގެ ކައުންސިލް އިންތިޚާބުގެ ކެމްޕެއިންގައާއި، ވެރިކަން ކުރާ ކޯލިޝަންގައި ހިމެނޭ ބައެއް ޕާޓީތަކާއިމެދު ހިތްހަމަ ނުޖެހި ރައީސް ނަޝީދު ވަނީ އެކި ފަހަރުމަތީން ރައީސް ޞާލިހަށާއި، ސަރުކާރަށް ވަރަށް ބޮޑަށް ފާޑު ވިދާޅުވާން ފައްޓަވާފައެވެ. އެގޮތުން ރައީސް ޞާލިހާއިއެކު ދެން ސިޔާސީ މަސައްކަތް ނުކުރައްވާނެކަމަށް ރައީސް ނަޝީދު މީގެކުރިން ވަނީ ވިދާޅުވެފައެވެ. ރައީސް ޞާލިހާއި ރައީސް ނަޝީދުގެ ސިޔާސީ ވާދަވެރިކަން ނުފެންނަ ފަށުގައި އޮތް ނަމަވެސް ކުރިއަށް އޮތް ދުވަސް ތަކުގައި މިވާދަވެރިކަން އިތުރަށް ތިލަވެގެންދާނެކަމަށް ގިނަ ބަޔަކު ދެކެއެވެ.
އެމްޑީޕީގެ ބާރުވެރިކަން ރައީސް ޞާލިހަށް މިހާރު ލިބިފައިވާއިރު، ރައީސް ނަޝީދަށް ޕާޓީ ތެރެއިންވެސް ބާރުވެރިކަން ދެން ހޯދުމަކީ ފަސޭހަ ކަމަމަށް ނުވާނެކަމަށް ސިޔާސީ މަސްރަހު ދިރާސާ ކުރައްވާ ފަރާތްތަކުން ވިދާޅުވެއެވެ. އަދި ރައީސް ނަޝީދަށް މަޖިލިސް ތެރެއިންވެސް ސަރުކާރުން ބޭނުން ނުވާކަމެއް ހާސިލް ކުރުމަކީވެސް އުދަގޫ ކަމަކަށް ވެގެންދާނޭކަމަށް ގިނަ ބަޔަކު ދެކެއެވެ.
އެމްޑީޕީގެ ވެރިކަމެއްގައި އެމްޑީޕީގެ ރައީސް އަދި މަޖިލީހުގެ ރައީސްކަމުގައި މުހައްމަދު ނަޝީދު ހުންނެވިއިރު، މިފަދަ ބޮޑު މަހާސިންތާގައި އެމަނިކުފާނު ނުފެނުނަކީ ވަރަށް ގިނަ ބައެއްގެ ސަމާލުކަން މިކަމަށް ހުއްޓުނު ކަމަކެވެ. މިކަމުން އެކަނިވެސް ކުރިއަށް އޮތް ތަނުގައި އެމްޑީޕީ ތެރެއިންނާއި، ސަރުކާރުން ނަޝީދަށް އޮތް ދައުރު ހަނިކަން ސާފުވާކަމަށް ގިނަ ބަޔަކު ދެކެއެވެ.
