ލާމަރުކަޒީ ޤާނޫނުގެ ދަށުން ކައުންސިލްތަކުން އެކުލަވާލުމަށް ލާޒިމްކޮށްފައިވާ އެރަށެއްގެ ލޭންޑް ޔޫސް ޕްލޭން ހެދުމަށް ކުރިމަތިވާ ގޮންޖެހުމަށް އޮތް ހައްލު ޕްލޭނިން މިނިސްޓަރ މުޙައްމަދު އަސްލަމް ދައްކަވައިފިއެވެ.
އުކުޅަހުގައި ކުރިއަށްދާ ވިއަވަތި ރާއްޖެ ކޮންފަރެންސްގައި މިނިސްޓަރ އަސްލަމް ވަނީ ލޭންޑު ޔޫސް ޕްލޭން ހެދުމަށް ކައުންސިލްތަކަށް ކުރިމަތިވާ ދަތިތައް ހައްލުކުރުމަށް ކުރެވޭނެ ކަންކަން ތަސްފީލް ކޮށްދެއްވާފައެވެ. ލާމަރުކަޒީ ޤާނޫނަށް ގެނައި އިސްލާހު ތަކާއިއެކު ކައުންސިލްތަކުން ހުށަގަޅަންޖެހޭ ލޭންޑް ޔޫސް ޕްލޭން ހުށަނޭޅި އެއް އަހަރު ވަނީ ފާއިތުވެފައެވެ. ޕްލޭނިން މިނިސްޓްރީން މި ޕްލޭން އެކުލަވާލުމަށް ކަނޑައަޅާފައިވާ އުސޫލުތަކާއި އުދަގޫ ގޮތްތަކުގެ ސަބަބުން ކައުންސިލްތަކަށް މިވީ އެއް އަހަރުގައި މިކަމަށް ވަނީ ހައްލެއް ނުހޯދިއެވެ.
ލާމަރުކަޒީ ޤާނޫނަށް އެންމެ ފަހުން ގެނައި އިސްލާހުގައި ބަޔާންކުރަނީ ކައުންސިލްތަކުގެ އިންތިޚާބަށްފަހު، އިންތިޚާބުކުރެވޭ މެންބަރުން މަޤާމާ ޙަވާލުވުމަށްފަހު ތިން މަސްދުވަހުގެ ތެރޭގައި، އަތޮޅު ކައުންސިލުން ފޯރުކޮށްދޭ ފަންނީ އެހީތެރިކަމާއެކު، އެ ރަށެއްގެ ރަށުގެ ތަރައްޤީގެ ޕްލޭނާއި ލޭންޑް ޔޫސް ޕްލޭން ކޮންމެ ރަށެއްގެ ރަށު ކައުންސިލުން އެކުލަވާލަންވާނެކަމަށެވެ.
ނަމަވެސް ލޭންޑް ޔޫސް ޕްލޭން އެކުލަވާލުމަށް ކައުންސިލްތަކަށް ވަނީ ބޮޑު ގޮންޖެހުމަކަށް ވެފައެވެ. ލޭންޑު ޔޫސް ޕްލޭން އެކުލަވާލާ ފާސްކުރުމަށް ޕްލޭނިން މިނިސްޓްރީއަށް ފޮނުވިނަމަވެސް އެ ޕްލޭންތައް ފާސްކުރެވިފައިނުވާތީ ކައުންސިލްތަކުން ދަނީ ކަންބޮޑުވުން ފާޅުކުރަމުންނެވެ.
މިނިސްޓަރ އަސްލަމް އިއްޔެގެ ކޮންފަރެންސުގައި ވިދާޅުވީ ފާއިތުވި އަހަރެއްހާ ދުވަހުގެ ތެރޭގައި ފާހަގަކުރެވުނީ ޤާނޫނު މާނަކުރުމުގައި އޮތް މައްސަލަކަމަށެވެ. މިހާތަނަށް ލޭންޑު ޔޫސް ޕްލޭން އެކުލަވާލައި ފާސްކުރުމަށް ހުށައެޅީ 55 ރަށަކުންކަމަށާއި، މިހާތަނަށް ފާސްކުރެވިފައިވަނީ 7 ޕްލޭންކަމަށެވެ. އަދި 11 ރަށެއްގެ ލޭންޑު ޔޫސް ޕްލޭން ފާސްކުރުމުގެ އެންމެ ފަހު މަރުހަލާގައިވާކަމަށާ، ޕްލޭން ގޯސްވެގެން 26 ރަށެއްގެ ޕްލޭން އަނބުރާ ފޮނުވާލާފައިވާކަމަށްވެސް މިނިސްޓަރ ވިދާޅުވިއެވެ. އަދި 10 ރަށެއްގެ ޕްލޭން ގޯސްވެގެން އިސްލާހު ކުރުމަށް ފޮނުވުން، އެކަންކުރުމަށްފަހު އަނބުރާ ޕްލޭނިން މިނިސްޓްރީއަށް ފޮނުވާފައިވާކަމަށްވެސް މިނިސްޓަރ ވިދާޅުވިއެވެ.
ކުރީގެ ޗާޓުތަކުގައި މިސްކިތް ހުރިތާ ހުންނާނީ އެތަންތަން ބަދަލުނުވާނެ. ގަބުރަސްތާނުވެސް ހުންނާނީ ހުންނަތާ، އަލަށް އާބާދުވީ ސަރަހައްދު ނުހުންނާނެ. އެކަން އަޕްޑޭޓްކޮށްލަންޖެހޭނީ،. ޒަމާނީ ޓެކްނޮލޮޖީގައި މިހަކަން ކުރެވިދާނެ. މިނިސްޓަރ އަސްލަމް ވިދާޅުވިއެވެ.
އަސްލަމްގެ ވާހަތަކާއި ގުޅިގެން ހުރާ ކައުންސިލްގެ ރައީސް އަހްމަދު އީސާ އެއްސެވީ ވޭތުވެދިޔަ އަހަރެއްހާ ދުވަހުގެ ތެރޭގައި ހައުސިން މިނިސްޓަރު އުޅުއްވީ ކޮންތާކުތޯއެވެ. ރައީސް އިބްރާހިމް މުހައްމަދު ސޯލިހް، ލާމަރުކަޒީ ނިޒާމު ގެންނެވުމުގައި ކުރައްވާ މަސައްކަތުގައި ރައީސްގެ ސްޕީޑާ އެއްވަރަށް ވަޒީރުންގެ އެއްބާރުލުން ނުދެއްވަނީތޯ ވެސް އެއްސެވިއެވެ.
ބ. މާޅޮހު ކައުންސިލްގެ ރައީސް ޝުޖާއު ވިދާޅުވި ގޮތުގައި ތިން މަސް ދުވަހުގެ ތެރޭގައި ހަދަން ޖެހޭ ޕްލޭންތައް ނުހެދި ވަނީ އެއްބާރުލުން ނުލިބިގެންނެވެ. އެއާ އެކު އިހްތިސާސް ކަނޑައެޅުމުގައި ހުރި ދަތިތައް ވެސް އޭގެތެރެއަށް ވަދެ ކައުންސިލްތަށް ދަތިތަކެއް ކުރިމަތިވެފައިވާ ކަމަށް ވިދާޅުވިއެވެ. އޭނާ ވިދާޅުވީ މިނިސްޓަރު އަސްލަމް މިއަދު ދެއްކެވީ ލޭންޑް ޔޫސް ޕްލޭން ހަދަން ޖެހޭ ތިން މަހުގެ ތެރެއިން ފުރަތަމަ މަހުގެ ތެރޭގައި ދައްކަވަން ޖެހޭ ވާހަކަތަކެއް ކަމަށެވެ.
މި ކޮންފަރެންސްގައި ވާހަކަފުޅުދައްކަވަމުން ރައީސް ވަނީ ލޭންޑު ޔޫސް ޕްލޭނަކީ ބަދަލުކުރެވިދާނެ އެއްޗެއްކަން ފާހަގަކުރައްވައި އެ ޕްލޭންތައް އެކުލަވާލުމަށް ކައުންސިލްތަކަށް އިލްތިމާސްކުރައްވާފައެވެ.
ލާމަރުކަޒީ ޤާނޫނުގައި ބަޔާންކޮށްފައިވާގޮތުގައި ލޭންޑު ޔޫސް ޕްލޭންގައި ހިމަނަންޖެހޭ މަޢުލޫމާތުތައް:
1- އެ ރަށެއްގައި ހުރި ގަސްގަހާގެހީގެ ޢަދަދާއި، ގަސްތައް ހުރި ސަރަޙައްދު
2- ޙިމާޔަތްކުރެވޭ ސަރަޙައްދު
3- ހިއްކާފައިވާ ސަރަޙައްދުތަކާއި، ހިއްކެން އޮތް ސަރަޙައްދާއި، އެ ސަރަޙައްދެއްގެ ބޭނުން ހިފާނެ ގޮތް
4- އެ ރަށެއްގެ އެކި ސަރަޙައްދުތަކުގެ ބިމުގެ އަގު
5- ހިއްކާ ބިންތަކުގައި ރުއްގަސް ހުންނަންޖެހޭ މިންވަރު
ޕްލޭނިން މިނިސްޓަރ ދެއްވި މަޢުލޫމާތުގެ އަލީގައި ލޭންޑް ޔޫސް ޕްލޭން އެކުލަވާލުމަށް ބޮޑު ފަސޭހައެއް ލިބިގެންދާނެކަމަށް ކައުންސިލްތަކުން ވަނީ މި ކޮންފަރެންސްގައި ފާހަގަކޮށްފައެވެ.
