ވިލި މާލޭ ހޮސްޕިޓަލުގައި މުއްދަތު ހަމަވެފައިވާ ބޭސްތަކެއް ކުޑަ ކުދިންތަކަކަށް ދިން މައްސަލައެއް ބަލަމުން އަންނަކަން ހެލްތު މިނިސްޓްރިން ހާމަ ކޮށްފިއެވެ.
މައްދަތު ހަމަވެފައިވާ ވެކްސިންތަކެއް ކުޑަ ކުދިންތަކަށް ދީފައިވާ މައްސަލަ ބަލަމުންދާކަން ހެލްތު މިނިސްޓްރީގެ މީޑިއާ އޮފިޝަލް ހާމަ ކުރައްވާފައި މިވަނީ، ކުޑަކުދިންތަކަކަށް ދުވަސް ހަމަވެފައިވާ ވެކްސިންއެއް ވިލިމާލެ ހޮސްޕިޓަލްގައި ދީފައިވާ ކަމުގެ ޝަކުވާ ވިލިމާލޭގެ ގިނަ ރައްޔިތުންގެ ފަރާތުން ލިބެމުންދާ ކަމަށް ވިދާޅުވެ އެދާއިރާގެ މެމްބަރު އަހުމަދު އުޝަމް ޓުވީޓު ކުރައްވާފައި ވަނިކޮށެވެ. އުޝާމް ވިދާޅުވެފައިވަނީ މިއީ ވަރަށް ސީރިއަސް މައްސަލައެއް ކަމަށާއި، މަފަދަ ކަމެއް ހިނގާފައިވާނަމަ އެކަން ސަރުކާރުން ސާފު ކޮށްދޭން ޖެހޭ ކަމަށެވެ.
ކުޑަކުދިންތަކަކަށް ދުވަސް ހަމަވެފައިވާ ވެކްސިންއެއް ވިލިމާލެ ހޮސްޕިޓަލްގައި ދީފައިވާ ކަމުގެ ޝަކުވާ ވިލިމާލޭގެ ގިނަ ރައްޔިތުންގެ ފަރާތުން އެބަލިބޭ. މިއީ ވަރަށް ސީރިއަސް މައްސަލައެއް. މިފަދަ ކަމެއް ހިނގާފައިވާ ގޮތެއް ސަރުކާރުން ސާފުކޮށްދޭން ޖެހޭ. @KerafaNaseem @HPA_MV @igmhmv pic.twitter.com/gjlnpZL3s2
— Ahmed Usham (@a_usham) May 26, 2022
ވިލިމާލޭ ހޮސްޕިޓަލްގައި ކުޑަ ކުދިންތަކަށް ދީފައިވަނީ ކޮން ވެކްސިނެއްކަމެއް އަދި ދީފައިވަނީ ކޮން ކުދިންނަށް ކަމެއްވެސް ސާފު ވެފައެއް ނުވެއެވެ. އެހެންނަމަވެސް މި ވެކްސިންކަމަށް ބެލެވޭ ވެކްސިން ފުޅިގެ ފޮޓޯއެއް މެމްބަރު އުޝާމް ވަނީ ޓުވީޓު ކުރައްވާފައެވެ. މި ފޮޓޯއިން ފެންނަން އިންނަ ގޮތުގައި ވެކްސިންގެ މުއްދަތު ހަމަވެފައިވަނީ 2022 ވަނަ އަހަރުގެ ޖެނުއަރީ މަހުއެވެ.
ހެލްތު މިނިސްޓްރީން ވިދާޅުވެފައިވަނީ މިމައްސަލަ ބެލުމަށްފަހު މައުލޫމާތު ހާމަ ކުރައްވާނެ ކަމުގައެވެ.
