ތުރުކީގެ ވެރިރަށް އިސްތަންބޫލުގައި އެހައުމުގެ ފުލުހުން ހިންގި އޮޕަރޭޝަނެއްގައި އައިސިސް ޖަމާއަތުގެ އާ ލީޑަރު ހައްޔަރު ކޮށްފައިވާކަން ތުރުކީގެ ސީނައަރ އޮފިޝަލުން ހާމަ ކޮށްފިއެވެ.

އޮފިޝަލުން ވިދާޅުވާ ގޮތުގައި، މިއަހަރުގެ ފެބްރުއަރީމަހު އެމެރިކާއިން ސީރިއާގެ ހިންގި އޮޕަރޭޝަނެއްގައި އައިސިސްގެ ލީޑަރު މަރާލުމާއި ގުޅިގެން، އެ ޖަމާއަތުގެ ލީޑަރެއްގެ ގޮތުގައި ހަރަކާތްތެރި ވަމުންދާ މީހާ މިހާރު ހައްޔަރު ކުރެވިފައިވާ ކަމަށް ތުރުކީގެ އެންޓި ޓެރަރިޒަމް ޕޮލިހުންނާއި އަދި އިންޓެލިޖެންސް އޭޖެންޓުން ގަބޫލު ކުރެއެވެ.

ތުރުކީގެ ނިއުސް ވެބްސައިޓެއް ކަމުގައިވާ އޮޑަޓީވީ އާންމު ކޮށްފައިވާ މައުލުމާތުތަކުގައި ބުނެފައިވަނީ ތުރުކީން ހައްޔަރު ކޮށްފައިވާ މީހާގެ ނަމަކީ އަބޫ އަލް-ހަސަން އަލް-ޤުރައިޝީއެވެ. އެހެންނަމަވެސް މިމައުލޫމާތު ލިބުނު ގޮތެއް އެ ވެބްސައިޓުން ހާމަ ކޮށްފައެއް ނުވެއެވެ. މީގެ ކުރިން ރިޕޯޓުތަކުން ހާމަވެފައިވާ، އައިސިސްގެ އާ ލީޑަރަށް ކިޔާ ނަމަކީ މިއީއެވެ.

ތުރުކީގެ އޮފިޝަލުން ހާމަ ކޮށްފައިވާ ގޮތުގައި އައިސިސްގެ އާ ލީޑަރުކަމަށް ބެލެވޭ މީހާ ހައްޔަރު ކުރެވިފައި ވާކަމުގެ މައުލޫމާތު ތުރުކީގެ ރައީސް ތައްޔިބު އެރެދޮގާންއަށް މިހާރުވަނީ އަރުވާފައެވެ. އޮޑަޓީވީން ހާމަ ކޮށްފައިވާ ގޮތުގައި، އަލް އައިސިސްގެ އާ ލީޑަރު ހައްޔުރު ކުރެެވިފައިވާކަން އެރެދޮގާން ވަރަށް އަވަހަށް އިއުލާން ކުރައްވާނެއެވެ.

އޮފިޝަލުން ވިދާޅުވާ ގޮތުގައި އަސިސްގެ ލީޑަރު ހައްޔަރު ކޮށްފައިވަނީ އޭނާ ދިރިއުޅެމުން ދިޔަ ގެއަށް ދިގު މުއްދަތަށް ފުލުހުން ފާރަލަމުން ދިއުމަށްފަހުއެވެ. އޮޑަޓީވީން ހާމަ ކޮށްފައިވާ ގޮތުގައި އޭނާ ހައްޔަރު ކުރުމަށް ހިންގާފައިވާ އޮޕަރޭޝަންގައި ފުލުހުން ހަތިޔާރު ބޭނުން ކޮށްފައެއް ނުވެއެވެ.

ތުރުކީގެ ސަލާމަތީ ބާރުތަކުންވަނީ ފާއިތުވެދިޔަ އަހަރުތަކުގައި އެގައުމުގައާއި އަދި އަވައްޓެރި ސީރިޔާގައިވެސް އައިސިސްގެ ހަގުރާމަވެރިންނާއި ކުރިމަތިލާފައެވެ. އަދި ވަނީ ތުރުކީގެ ބޯޑަރު ކައިރީގެ އެތައް ޓައުނަކުން އައިސްގެ ހަގުރާމަވެރިން ފައްސާލާފައެވެ.