އެމްޑީޕީގެ ޗެއަރޕާސަން އިންތިޚާބު ކާމިޔާބުކުރެއްވި އިކޮނޮމިކް މިނިސްޓަރ ފައްޔާޟް އިސްމާއީލް ރަސްމީކޮށް މިއަދު އެ މަޤާމާއި ހަވާލުވެވަޑައިގެންފިއެވެ.
އެމްޑީޕީން ބުނީ އެޕާޓީގެ ޗެއަރޕާސަންކަމުގެ މަޤާމާއި މިނިސްޓަރ ފައްޔާޟް ހަވާލުވެވަޑައިގަތުމަށްފަހު އެމްޑީޕީ ސެކްރެޓޭރިއޭޓްގެ ވެރިންނާ ބައްދަލުކުރައްވާފައިވާކަމަށެވެ. އެމްޑީޕީން ޢާންމުކޮށްފައިވާ ދާއިމީ ނަތީޖާގައި ވާގޮތުން މިއިންތިޚާބު ފައްޔާޟު ކާމިޔާބު ކޮށްފައިވަނީ 7،000 ވޯޓުގެ ތަފާތުންނެވެ. މި އިންތިޚާބުގައި ފައްޔާޒަށް ލިބިވަޑައިގަތީ 27،406 ވޯޓެވެ. ފައްޔާޟާއި ވާދަކުރެއްވި މާފަންނު އުތުރު ދާއިރާގެ މެންބަރު އިމްތިޔާޒް ފަހުމީއަށް ލިބިވަޑައިގަތީ 20،217 ވޯޓެވެ.
އެމްޑީޕީ ސެކްރެޓޭރިއަޓުންވަނީ އަންހެނުންގެ ރޫހުގެ ރައީސާގެ މަގާމަށް އިންތިޚާބު ވެ ވަޑައިގެން، އައްޑޫ މީދޫ ދާއިރާގެ މެންބަރު ރޮޒައިނާ އާދަމާއި، ޒުވާނުންގެ ހިއްވަރުގެ ރައީސްގެ މަގާމަށް އިންތިޚާބުވެ ވަޑައިގަތް ރިފްގާ ޝިޔާމާވެސް ބައްދަލުކުރައްވާފައެވެ.
އެމްޑީޕީގެ ޗެއަރޕާސަންގެ މަޤާމާއި މިނިސްޓަރ ފައްޔާޟް ރަސްމީކޮށް މިއަދު ހަވާލުވެވަޑައިގެންފައިވާއިރު، އެޕާޓީ ހިންގުމުގައި އެންމެ އިސް ދައުރެއް އަދާކުރައްވާމީ ޗެއަރޕާސަންއެވެ. އެމްޑީޕީގެ ޗެއަރޕާސަންގެ މަސްޢޫލިއްޔަތުތަކުގެ ތެރޭގައި ޕާޓީގެ އިންތިޚާބުތައް ރާވާ އިންތިޒާމްކުރުމާއި، އެޕާޓީގެ ދާއިރާތަކުގެ އިންތިޚާބުތަކުގެ އިދާރީ ކަންކަން ހިންގެވުމާއި، އެޕާޓީގެ އުސޫލުތައް ރައްކާތެރިކޮށް ދެމެހެއްޓުން ހިމެނެއެވެ. މީގެ އިތުރުން ޕާޓީއަށް މެންބަރުން އިތުރުކޮށް، ޑިމޮކްރަސީގެ މިންގަނޑުތަކާއި ހަމަހަމަކަންމަތީ ޕާޓީ ކުރިއެރުވުމުގެ މަސައްކަތްކުރުންވެސް ޕާޓީގެ ޗެއަރޕާސަންގެ މަސްއޫލިއްޔަތުގައި ބަޔާންކޮށްފައިވެއެވެ.
އެމްޑީޕީގެ ޗެއަރޕާސަންގެ މަޤާމަކީ ފަސް އަހަރު ދައުރެއް އަދާކުރާ މަޤާމެކެވެ.
