އާންމުންނަށް ނޭނގި ސިޔާސީ ޕާޓީތަކަށް މީހުން ވެއްދުމާއި ސިޔާސީ ޕާޓީތަކުގެ މެންބަރުން އެހެން ސިޔާސީ ޕާޓީތަކަށް ބަދަލުކުރަމުންދާތީ އެކަމުގެ ކަންބޮޑުުވުން ފާޅުކޮށް ހުށަހެޅި މައްސަލަ ރައްޔިތުންގެ މަޖިލީހަށް ބޭރުކޮށްލައިފިއެވެ.
އިދިކޮޅު ޕީއެންސީގެ ފަރާތުން މަޑުއްވަރީ ދާއިރާގެ މެމްބަރު އާދަމް ޝަރީފް ހުށަހެޅުއްވި މައްސަލަ ބަލައިގަންނަން ވޯޓު ދެއްވީ އެންމެ 10 މެމްބަރުން ނެވެ. ނުފެންނަކަމަށް 17 މެމްބަރުން ވޯޓު ދެއްވިއެވެ. އެހެންކަމުން އެ މައްސަަލަ ބަލަައިގަނެ ބަހުސްކުރަން ފާހެއް ނުވިއެވެ.
އާދަމް ޝަރީފް ހުށަހެޅުއްވި މައްސަލައިގައި ބުނެފައިވަނީ ސިޔާސީ ޕާޓީއަށް ވަނުމާއި ވަކިވުމަކީ ގާނޫނުއަސާސީން ކޮންމެ ރައްޔިތަކަށްވެސް ލިބިގެންވާ ހައްގެއް ކަމަށެވެ. ނަމަވެސް އާންމުންނަށް ނޭނގި ސިޔާސީ ޕާޓީތަކަށް ވެއްދުމާއި ވަކިކުރުމާއި ސިޔާސީ ޕާޓީތަކުގެ މެބްބަރުން އެހެން ޕާޓީތަކަށް ބަދަލުކުރުން ފަދަ ކަންކަން މިހާރު ރާއްޖޭގައި ވަރަށް ބޮޑަށް އިތުރުވަމުންދާ ކަމަށެވެ.
މައްސަލައިގައި ބުނެފައިވަނީ އާންމުންނަށް ނޭނގި ޕާޓީތަކަށް ވެއްދުމާއި ވަކިކުރުމަކީ ސިޔާސީ ޕާޓީތަކުގެ ގާނޫނުގެ ދަށުން ޕާޓީތަކަށް ލިބިދޭ އިމްތިޔާޒުތަކާ ބީރަށްޓެހި ކަމެއް ކަމަށެވެ. އެކަންކަމުގެ ސަބަބުން އިޖުތިމާއީ މައްސަލަތައް އުފެދުމާއި ސިޔާސީ ފިކުރެއްގައި މަސައްކަތް ކުރަން ބޭނުންވާ ފަރާތްތަކަށް އެ ހައްގު ގެއްލިގެންދާ ކަމަށްވެސް ފާހަގަކޮށްފައިވެއެވެ. އަދި އެފަރާތްތަކުގެ އިމްތިޔާޒުތަކަށް އުނިކަން ލިބޭ ފަދަ ކަންކަން ކުރިމަތިވުމާއި، ނުހައްގު މާލީ ފައިދާއާއި ގެއްލުން ސިޔާސީ ޕާޓީތަކަށް ލިބެމުން ދިއުމާއި، މަލްޓި ޕާޓީ ސިސްޓަމަށް ރައްޔިތުން ކުރާ އިތުބާރު ކުޑަވުމާއި، އާންމު ރައްޔިތުންނަށް ގިނަގުނަ ސިޔާސީ އަދި އިޖުތިމާއީ މައްސަލަތައް އެފަދަ އަމަލުތަކުގެ ސަބަބުން ކުރިމަތިވަމުންދާ ކަމަށްވެސް ބުނެފައިވެއެވެ.
މިކަމުގެ ސަބަބުން މަލްޓި ޕާޓީ ސިސްޓަމަށް ރައްޔިތުން ކުރާ އިތުބާރު ކުޑަވެ އާންމު ރައްޔިތުންނަށް ގިނަގުނަ ސިޔާސީ އަދި އިޖުތިމާއީ މައްސަލަތައް ކުރިމަތިވޭ.
– އާދަމް ޝަރީފްގެ މައްސަލާގައި ވިދާޅުވިއެވެ.
އާދަމް ޝަރީފް މިފަދަ މައްސަލައެއް ހުށަހަޅާފައިވާއިރު ސިޔާސީ ޕާޓީތަކަށް މެންބަރުންގެ ގޮތުގައި ވަންނަން ހުށަހަޅާ މީހުންގެ ނަންތައް އިލެކްޝަންސް ކޮމިޝަނުން ވަނީ ޢާމުކުރަން ފަށައިފައެވެ. މިގޮތަށް ހަމަޖެއްސީ ޕާޓީތަކުގެ ދަފްތަރުގައި ހިމެނުމަށް ޕާޓީތަކުން ހުށަހަޅާ މީހުންގެ ފޯމު ދަފްތަރުގައި ޖެއްސުމުގެ ކުރިން ޝަކުވާ ހުށަހެޅުމުގެ ފުރުސަތު ހުޅުވާލުމާއެކުއެވެ.
ޢާއްމުކޮށްފައިވާ ލިސްޓުގައިވަނީ 3 ޕާޓީއަކަށް ވަނުމަށް ހުށަހަޅާފައިވާ 373 މީހެއްގެ ނަމެވެ. އެއީ ޖުމްހޫރީ ޕާޓީއަށް ވަނުމަށް ލާފައިވާ 23 މީހެއްގެ ފޯމާއި އެމްޑީއޭގެ 105 ފޯމާއި އެމްއެންޕީގެ 245 ފޯމެވެ. އެކޮމިޝަނުން މިގޮތަށް ނިންމާފައި މިވަނީ ފަހަކަށްއައިސް ސިޔާސީ ޕާޓީތަކަށް ވަންނަން ހުށަހަޅާ މީހުންގެ ފޯމް އޮޅުވާލައި އޭނާ ވަންނަން ހުސަހެޅި ޕާޓީ ނޫން އެހެން ޕާޓީތަކަށް ބަދަލުކުރާ ކަމުގެ ތުހުމަތު ބައްފަރާތްތަކުން ކޮށްފައިވަނިކޮށެވެ.
