ބައެއް ފިހާރަތަކުން ކުނިވެފައިހުރި ބިސް ވިއްކާތީ އެކަމަށް ސަމާލުވުމަށް މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން އިލްތިމާސްކޮށްފިއެވެ.
އެމްއެފްޑީއޭ އިން ނެރުނު ބަޔާނެއްގައި ވަނީ މާލޭގެ ފިހާރަތަކުން ވިއްކާ ބިސް ކުނިވެފައި ހުންނަ ކަމުގެ ޝަކުވާ ލިބެމުންދާ ކަމަށެވެ. އަދި އެ ކަހަލަ ބިސް ބޭނުންކުރުމަކީ އާއްމު ސިއްހަތަށް ނޭދެވޭ އަސަރުކުރާ އަދި ކާބޯތަކެތީގެ ޒަރީޔާއިން ނުރައްކާތެރި ބަލިތައް ފެތުރުމުގެ ފުރުސަތު އޮތް ކަމަށެވެ. ފިނިކޮށްފައި ހުންނަ ބިސް ރައްކާތެރިކަމާއެކު ބެހެއްޓޭނީ ގިނަ ވެގެން ތިން މަސް ދުވަހަށް ކަމަށެވެ. ފިނި ނުކުރާ ބިސް 28 ދުވަހުގެ މުއްދަތަކަށް ބެހެއްޓޭއިރު، މުއްދަތު ހަމަވާ ތާރީހަށްވުރެ އަވަހަށް ވެސް ބިސްކުނި ވުމުގެ ފުރުސަތު އޮންނާނެ ކަމަށްވެސް އެމްއެފްޑީއޭ އިން ބުންޏެވެ.
އެ އޮތޯރިޓީން ބުނީ، މުއްދަތު ހަމަނުވި ކަމުގައި ވިޔަސް، ހުންނަންޖެހޭ ފިނި ހޫނުމިނަށް ނުބަހައްޓާ ނަމަ ބިސް ކުނިވުމުގެ ފުރުސަތު ވެސް އޮންނާނެކަމަށެވެ.
އެހެންކަމުން ބިސް ވިއްކަން ބަހައްޓާއިރު ރައްކާކުރުމަށް ކަނޑައަޅާފައިވާ ފިނިހޫނުމިން ކޮންޓްރޯލްކޮށް، މުއްދަތު ހަމަވާ ތާރީހު އެނގޭގޮތަށް ބިސް ވިއްކަން ބެހެއްޓުމަށް އަންގަމެވެ. އަދި ބިސް ގަންނަ ފަރާތްތަކުން މިކަމަށް ހާއްސަ ސަމާލުކަމެއް ދިނުމަށް އެ އޮތޯރިޓީ އިން ވަނީ އިލްތިމާސްކޮށްފައެވެ.
ރޯދަ މަހަށް ގިނަ ޢަދަދެއްގެ ބިސް ކޮންމެ އަހަރަކުވެސް ރާއްޖެ ގެނެއެވެ. ނަމަވެސް ރޯދަމަސް ނިމުމުންވެސް ބައެއް ފިހާރަތަކުގައި ސްޓޮކް ހުންނަކަމަށްވެއެވެ.
