ސްރީލަންކާއަށް ބޭރުގެ އެހީ ހޯދުމުގެ މަސައްކަތްތައް ކޯޑިނޭޓް ކުރައްވަން ރާއްޖޭގެ ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ހަވާލު ކުރެއްވުމުން ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހް މަރުޙަބާ ވިދާޅުވެއްޖެއެވެ.
ސްރީލަންކާއަށް ބޭރުގެ އެހީ ހޯދުމުގެ މަސައްކަތްތައް ކޯޑިނޭޓް ކުރައްވަން ނަޝީދުއާ ހަވާލުކުރައްވާފައިވަނީ އެ މަނިކުފާނު އެކަމަށް ސްރީލްންކާގެ ބޮޑުވަޒީރުގެ ކިބައިން އެދިވަޑައިގަތުމުންނެވެ. ރައީސް ނަޝީދަށް މަރުހަބާ ދަންނަވާ ރައީސް ޞާލިހް ކުރެއްވި ޓުވީޓުގައި ވިދާޅުވީ ދިވެހި ރާއްޖެ އަބަދުވެސް އޮންނާނީ ސްރީލަންކާއެކުގައި ކަމަށާއި ސްރީލަންކާއަށް ދިމާވާ ކޮންމެ ދަތި އުނދަގުލަކުން އަރައިގަތުމަށް ރާއްޖެއިން އެހީތެރިވެ ދެއްވާނެކަމަށެވެ.
We welcome Pres. @MohamedNasheed ’s appointment by PM @RW_UNP to coordinate international relief efforts for Sri Lanka.
Maldives will always stand with Sri Lankans and will support Sri Lanka in every possible way to overcome these difficult times.
— Ibrahim Mohamed Solih (@ibusolih) May 19, 2022
ރައްޔިތުންގެ މަޖިލީހުން ވިދާޅުވީ ލަންކާއަށް ބޭރުގެ އެހީ ހޯދުމުގެ މަސަކަތް ކޮށްދެއްވަން ހުށަހެޅުއްވީ ރައީސް ނަޝީދު އަމިއްލަފުޅަށް ކަމަށެވެ. ލަންކާގެ ބައެއް ނޫސްތަކުން ބުނި ގޮތުގައި ނަޝީދު އެގޮތަށް ހުށަހެޅުއްވީ މިއަދު ބޭއްވި މަޝްވަރާތަކެއްގައެވެ. ލަންކާއަށް އެހީ ހޯދައިދޭން އެމަނިކުފާނު ހުށަހެޅުއްވުމުން ބޮޑުވަޒީރު ރަނިލް ވިކްރަމަހަ ސިންހަ ވަނީ ޝުކުރު އަދާކުރައްވައި އެ މަސައްކަތް ކުރުމަށް ރައީސް ނަޝީދާ ހަވާލުކުރައްވާފައެވެ.
ބޮޑުވަޒީރުގެ އޮފީހުން ހާމަ ކޮށްފައިވާ ގޮތުގައި، މިއަދުގެ މަޝްވަރާތަކުގައި، ސްރީ ލަންކާއަށް ކުރިމަތިވެފައިވާ މި ކާރިސާގައި ނަޝީދުގެ ފަރާތުން ލިބިލައްވަމުން ގެންދަވާ އެހީތެރިކަމަށް ރަނިލް ވިކްރަމެސިންހެ ވަނީ ޝުކުރު އަދާ ކުރައްވާފައެވެ. އަދި މި ކާރިސާއަށް ހައްލު ނުހޯދި، ހާލަތު ގޯހުން ގޯހަށް ދަތުރުކޮށް، ގައުމުގެ ބޭރު ފައިސާގެ ރިޒާވް ނުރައްކާތެރި މިންވަރަކަށް ދަށަށްގޮސް، ދައުލަތުގެ މުވައްޒަފުންނަށް މުސާރަ ދިނުމަށްޓަކާ ފައިސާ ޗާޕުކުރަން މަޖުބޫރުވެ، ތަކެއްޗާއި އާންމު ޚިދުމަތުގެ އަގު އިންތިހާއަށް މަތިވެ، ގައުމަށް އެތެރެ ކުރަންޖެހޭ އަސާސީ ކާބޯތަކެއްޗާއި، ތެލާއި ބޭހަށް ފައިސާ ދެއްކޭނެ ގޮތެއްނެތި، އެގައުމުވަނީ ބަގުރޫޓު ވުމާއި ކައިރި ވެފައެވެ.
މިއަދު ސްރީ ލަންކާގެ ސެންޓްރަލް ބޭންކުންވަނީ، ގައުމުން ބޭރުން ދަރަނި ނުދެއްކި، ފުރަތަމަ ފަހަރަށް އެގައުމުން ސޮވެރިންގ ޑީފޯލްޓަކަށް ގޮސްފައިވާކަން ހާމަ ކޮށްފައެވެ. ސްރީ ލަންކާ ވެގެން މިދިޔައީ އޭޝިއާ ޕެސިފިކް ރީޖަންއިންއިން ފާއިތުވި 23 އަހަރު ތެރޭގައި ސޯވެރިންގ ޑީފޯލްޓަކަށް ދިޔަ ފުރަތަމަ ގައުމެވެ.
ސްރީ ލަންކާއަށް ކުރިމަތިވެފައިވާ އިގްތިސާދީ ކާރިސާއަކީ، 1948ވަނަ އަހަރު އެގައުމަށް މިނިވަަންކަން ލިބުނުފަހުން އެގައުމު ވެއްޓިފައިވަ އިގްތިސާދީ އެންމެ ބޮޑު ވަޅުގަނޑެވެ.
