ޕެނަލްޓީ ޝޫޓްއައުޓްގައި ރޭންޖާސްގެ މައްޗަށް 5-4 އިން ކުރި ހޯދައި، އެއިންޓްރަކް ފްރެންކްފާޓުން، 42 އަހަރަށް ފަހު ޔޫރަޕުގެ ތައްޓެއް ހޯދައިފިއެވެ.
މީގެ ކުރިން ފްރެންކުފާޓުން ޔޫރަޕުގެ މުބާރާތެއްގެ ތަށި ހޯދީ، 1980 ވަނަ އަހަރު ކުޅުނު ޔޫއެފާ ކަޕެވެ. ބޮރޫޝިއާ ޑޯޓްމަންޑުގެ މައްޗަށް ކުރި ހޯދީ ދެ ލެގު ކުޅުނު ފައިނަލްގައި އަވޭ ގޯލުން ކުރި ލިބުމުންނެވެ.
ރޭގެ ފައިނަލުގެ 120 މިނިޓްގެ ކުޅުން ނިމުނުއިރު، އޮޮތީ 1-1 އިން އެއްވަރުވެފަ އެވެ. ދެ ޓީމުން ޖުމްލަ އެކު ފޮނުވާލި 10 ޕެނަލްޓީގެ ތެރެއިން ނާކާމިޔާބުވީ ރޭންޖާސްގެ އާރޮން ރަމްސޭ ފޮނުވާލި ޕެނަލްޓީ އެވެ.
ސްޕެއިނުގެ އެސްޓަޑިއޯ ސަންޗޭޒް ޕިޒްޖުއާން ސްޓޭޑިއަމްގައި ރޭ ކުޅުނު ފައިނަލުގައި ފްރޭންކްފާޓުން އެޓޭކްކުރަމުން ދަނިކޮށް މެޗުގެ 57 ވަނަ މިނިޓްގައި ލީޑުނެގީ ރޭންޖާސް އިންނެވެ. މިއީ ފްރޭންކްފާޓްގެ ޑިފެންޑަރުންނަށް ހެދުނު ގޯހެއްގެ ފައިދާނަގައި ރޭންޖާސްގެ ޖޯ އަރީބޯ ޖެހި ގޯލުންނެވެ. ރޭންޖާސް އަށް މާގިނައިރު ލީޑު ހިފަހައްޓައިނުލެވުނެވެ. މެޗުގެ 69 ވަނަ މިނިޓްގައި ފްރޭންކްފާޓަށް އެއްވަރުކޮށްދިނީ ފިލިޕް ކޮސްޓިޗް ދިން ބޯޅަ އަކުން ރަފައެލް ސަންޓޯސް ބޯރޭއެވެ. މެޗުގެ ފުރިހަމަ ވަގުތާއި އިތުރު ވަގުތުގެ ދެ ހާފުގައި ގޯލެއް ޖެހޭތޯ ދެ ޓީމުން ކުރި މަސައްކަތް ވެސް ކާމިޔާބެއްނުވި އެވެ. ނަތީޖާ ނެރެން ޖެހުނީ ޕެނަލްޓީ ޖަހާށެވެ.
ޕެނަލްޓީގައި ފްރޭންކްފާޓުން ފަސް ޕެނަލްޓީ ވެސް ކާމިޔާބުކުރިއެެވެ. އެ ޓީމުގެ ޕެނަލްޓީތައް ޖެހީ ކްރިސްޓޮފާ ލެންޒް، އަޖްޑިން ރުސްޓިޗް، ޑައީޗީ ކަމާޑާ، ކޮސްޓިޗް އަދި ބޯރޭއެވެ. ރޭންޖާސްގެ ޖޭމްސް ޓަވޭނިއާ، ސްޓީވެން ޑޭވިސް، ސްކޮޓް އާފީލްޑް، ކެމާ ރޫފް ޕެނަލްޓީ ކާމިޔާބުކުރި ނަމަވެސް ރަމްސޭ ޖެހި ޕެނަލްޓީ ފްރޭންކްފާޓް ކީޕަރު ކެވިން ޓްރަޕް ވަނީ މަތަކޮށްފައެވެ.
