މާލެ ސިޓީ ކައުންސިލްގެ އެއް ލައްކަ ގަސް ޕްރޮގްރާމުގެ ދަށުން ކަނބާ އައިސާރަނި ހިނގުމުގައި ގަސް އިންދައިފިއެވެ.
ކަނބާ އައިސަ ރަނި މަގުގައި އެއް ލައްކަ ގަސް ޕްރޮގްރާމުގެ ދަށުން ގަސް އިންދާފައިވަނީ މާލެ ސިޓީ ކައުންސިލްގެ 4 ވަނަ ދައުރަށް 1 އަހަރު ފުރުނު އަހަރީ ދުވަހުއެވެ. އެއްލައްކަ ގަސް ޕްރޮގްރާމުގެ ދަށުން ކަނބާ އައިސާރަނި ހިނގުމުގައި ގަސް އިންދާފައިވަނީ ތާޖުއްދީން ސްކޫލް ސަރަޙައްދުގައެވެ.
ކަނބާ އައިސާރަނި ހިނގުމުގައި އިއްޔެ އިންދާފައިވަނީ 10 އަނބު ގަހެވެ. މި 10 ގަހުގެ ތެރެއިން ފުރަތަމަ ގަސް އިންދާދެއްވީ މާލެ ސިޓީގެ މޭޔަރު ޑރ. މުޙައްމަދު މުޢިއްޒުއެވެ. މީގެ އިތުރުން ބައެއް ކައުންސިލަރުންވެސް ވަނީ ގަސް އިންދާފައެވެ.
މި ޙަރަކާތާއި ގުޅިގެން މާލެސިޓީގެ މޭޔަރު ޑރ. މުޙައްމަދު މުޢިއްޒު ކުރެއްވި ޓްވީޓެއްގައި ވިދާޅުވީ މިއީ މާލެ ފެހިކޮށް ޗާލު މާލެ ސިޓީ އަކަށް ހެދުމަށްޓަކައި ސިޓީ ކައުންސިލުން ކުރަން ރޭވިފައިވާ މަސައްކަތްތަކުގެ ތެރެއިން ފެށިފައިވާ މަސައްކަތެއް ކަމަށެވެ. އަމާޒަކީ މާލޭގެ އެކި މަގުތަކާއި މައިދާން ތަކުގައި ގަސް އިންދުން ކަމަށް މޭޔަރުގެ ޓްވީޓްގައި ފާހަގަކުރެއްވިއެވެ.
އެއް ލައްކަ ގަސް ޕްރޮގްރާމަކީ މާލެ ސިޓީ ކައުންސިލްގެ ސްޓްރެޓެޖިކް އެކްޝަން ޕްލޭނުގެ ދަށުގައި ހިމެނޭ ޗާލު މާލެ ސިޓީގެ ދަށުން ކުރިއަށް ގެންދާ ޕްރޮގްރާމެކެވެ. މާލެ ސިޓީ ކައުންގެ އަމާޒަކީ މާލޭގެ ހުރިހާ ސަރަޙައްދެއްގައި ރައްޔިތުންގެ އެއްބާރުލުމާއެކު މި ޕްރޮގުރާމު ތަންފީޒު ކުރުމެވެ.
