އެމްޑީޕީގެ ޗެއަރޕާސަން ހޮވުމަށް މުޅި ރާއްޖޭގައި ކުރިއަށްގެންދިޔަ ވަދަވެރި އިންތިޚާބުގައި އެމްޑީޕީގެ މެންބަރުން ދިން ވޯޓަކީ، ސަރުކާރާއެކު ކުރިއަށްގޮސް 2023 ކާމިޔަބުކުރުމަށް ދިން ވޯޓެއްކަމަށް އެމްޑީޕީގެ ޗެއަރޕާސަން އިންތިިޚާބު ކާމިޔާބު ކުރެއްވި އިކޮނޮމިކް މިނިސްޓަރ ފައްޔާޟް އިސްމާޢީލް ވިދާޅުވެއްޖެއެވެ.

ވާދަވެރި އިންތިޚާބަކަށްފަހު މިނިސްޓަރ ފައްޔާޟް އިންތިޚާބު ކާމިޔާބުކޮށްފައިވާކަމަށް ވަގުތީ ނަތީޖާތަކުން ދައްކައެވެ. ފައްޔާޟް މި އިންތިޚާބުގައި ވާދަކުރެއްވީ މާފަންނު އުތުރު ދާއިރާގެ މެންބަރު އިމްތިޔާޒް ފަހުމީއާއެވެ.

އެމްޑީޕީގެ ޗެއަރޕާސަންގެ އިންތިޚާބު ކާމިޔާބުކުރެއްވިއްޖެކަން ޔަޤީންވުމާއެކު ސަޕޯޓަރުންނަށް ޝުކުރު އަދާކުރައްވާ ފައްޔާޟް ކުރެއްވި ޓްވީޓްގައި ވަނީ އެމްޑީޕީގެ މެންބަރުން މިއަދު ދިން ވޯޓަކީ މެންބަރުން އެދުނު ގޮތަށް ޕާޓީ ހިންގާލާ، އެމްޑީޕީއާއި ސަރުކާރާ އެއްކޮށް 2023 ވަނަ އަހަރުގެ ރިޔާސީ އިންތިހާބު ކާމިޔާބުކުރުމަށް ދިން ވޯޓެއްކަމަށެވެ. ފައްޔާޟް ވަނީ އެކަމުގައި ދެގޮތެއް ނުވެ ހުންނަވާނެކަމަށް ވިދާޅުވެފައެވެ.

ފައްޔާޒް ވަނީ މި އިންތިޚާބުގައި ވޯޓުލަން ނިކުމެ ވޯޓު ދެއްވި ހުރިހާ މެންބަރުންނަށް ޝުކުރު އަދާކުރައްވާފައެވެ.

الحمد لله
އެމްޑީޕީގެ މެންބަރުން މިއަދު މިދިން ވޯޓަކީ މިޕާޓީއާ ސަރުކާރާ އެއްކޮށް ގޮސް 2023 ކާމިޔާބު ކޮށް މެންބަރުން އެދުނު ގޮތަށް މިޕާޓީ ހިންގާލަން ދިން ވޯޓެއް. މިކަމުގައި ދެގޮތެއް ނުވެ ހުންނާނަން.

ވޯޓަށްނުކުމުވަޑައިގަތް މެމްބަރުންނާ އަޅުގަނޑުގެ #MDPHingaalan ޓީމަށް ޝުކުރިއްޔާ.

— Fayyaz Ismail (@faya_i) May 14, 2022

މިހާތަނަށް އާންމު ކުރެވުނު ހިސާބުތަކުން ދައްކާ ގޮތުގައި އޭނާއަށް 59 ޕަސަންޓު ލިބިފައި ވެއެވެ. މިހާތަނަށް ވިހި ހާހަށް ވުރެ ގިނަ ވޯޓު ލިބިފައިވާއިރު، އޭނާއާ ވާދަކުރައްވާ އިމްތިޔާޒް ފަހުމީއަށް ލިބިވަޑައިގެންފައިވަނީ ސާދަ ހާހެއްހާ ވޯޓެވެ.

އަދި މީގެއިތުރުން، އިންތިޚާބުގެ ކުރިން، މާލޭ ސިޓީން އިމްތިޔާޒު ފަހުމީ ބޮޑު ތަފާތަކުން އިންތިޚާބު ކާމިޔާބު ކުރާނެކަމަށް ކުރިން ބެލެވިފައި ވިނަމަވެސް، ވޯޓު ފޮށިތައް ގިނާ ނިމިގެން ދިޔައިރު، ކުރިން ހީކުރެވުނު ވަރުގެ ކާމިޔާބީއެއް މާލެއިންވެސް އިންތިއަށް ހޯދިފައެއް ނުވެއެވެ. މިގޮތުން މާލޭގެ ބައެއް ފޮށިތަކުންވެސް ފައްޔާޒު އިސްމާއިލްވަނީ ވަރަށްބޮޑު ކުރިއެރުމެއް ހޯއްދަވާފައެވެ.

އެމްޑީޕީގެ ޗެއަރޕާރސަންކަމަށް ފައްޔާޒު އިސްމާއިލް ވާދަ ކޮށްފައިވަނީ ރައީސް ސާލިހުގެ ތާއީދާއެކީއެވެ. މިގޮތުން ފާޅުގައި ކެމްޕޭނަށް ނުނިކުންނެވި ނަމަވެސް، ފައްޔާޒަށް ތާއީދު ހޯއްދެވުމަށް ރައީސް ސާލިހުވަނީ އަމިއްލަފުޅަށް މަސައްކަތް ކުރައްވާފައެވެ. އަދި ކެބިނެޓްގެ ވަޒީރުންނާއި، ކުންފުނިތަކާއި، އަދި ސަރުކާރުގެ ވަޒީފާތަކުގަ ތިބި ގިނަ މުވައްޒިފުންވެސް ވަނީ ފައްޔާޒުގެ ކެމްޕޭނުގައި އަމަލީގޮތުން މަސައްކަތް ކޮށްފައެވެ.

އިންތިޚާބުގައި ނާކާމިޔާބީއާއި ކުރިމަތި ލައްވަން ޖެހިވަޑައިގެންނެވި އިމްތިޔާޒު ފަހުމީ ކެމްޕޭން ކުރައްވާފައިވަނީ ރައީސް ނަޝީދުގެ ތާއީދާ އެކީއެވެ. އަދި ނަޝީދުގެ އެންމެ އަރިސް ފަރާތްތަކުންވެސް ވަނީ އިމްތިޔާޒު ފަހުމީއަށް ތާއީދު ހޯއްދެވުމަށް އަމަލީގޮތުން މަސައްކަތް ކުރައްވާފައެވެ.

އެހެންކަމުން މިއިންތިޚާބު ބެލެވިގެން ދިޔައީ، ހަގީގަތުގައި ރައީސް ނަޝީދާއި ރައީސް ސާލިހާ ދެބޭފުޅުންގެ މެދުގައި ބޭއްވިގެންދިޔަ އިންތިޚާބަކަށެވެ. އަދި އިންތިޚާބިގައި ރައީސް ސާލިހަށް ކާމިޔާބު ލިބުގެން ދިއުމުން، އެމްޑީޕގެ ރިޔާސީ ޓިކެޓް ހޯއްދެވުމުގައި ރައީސް ސާލިހަށް ވަރަށް ބޮޑަށް މަގުފަހުވެގެން ދާނެ ކަމުގައި މަސްރަހު ދިރާސާ ކުރާ ފަރާތްތަކުން ދަނީ ބުނަމުންނެވެ.