ރައީސް ސާލިހުގެ އުފަން ރަށް ކަމުގައިވާ ޅ. ހިންނަވަރުން އިމްތިޔާޒު ފަހުމީގެ މައްޗަށް، އެމްޑިޕީގެ ޗެއަރޕާރސަން އިންތިޚާބު ކާމިޔާބު ކުރެއްވި ފައްޔާޒު އިސްމާއިލް ބޮޑު ތަފާތަކުން ކާމިޔާބު ހޯއްދަވައިފިއެވެ.
ހިންނަވަރުގެ ވޯޓު ފޮށި ގުނާ ނިމުނު އިރު، ރައީސް ސާލިހުގެ ތާއީދާއެކީ އިންތިޚާބުގައި ވާދަކުރި، ސަރުކާރުގެ އިކޮނޮމިކް މިނިސްޓަރު ފައްޔާޒު އިސްމާއީލް 600 ވޯޓު ހޯއްދެވި އިރު، ރައީސް ނަޝީދުގެ ތާއީދާއެކީ އިންތިޚާބުގައި ވާދަކުރެއްވި އިމްތިޔާޒު ފަހުމީއަށް ލިބިފައިވަނީ އެންމެ 9 ވޯޓެވެ.
މި ނަތީޖާއާއެކީ، މިހާރު އިންތިޚާބުގައި ވޯޓިލީ ގިނަ ފޮށިތަކެއް ވަނީ ގުނާ ނިމި، ފައްޔާޒަށް އިންތިޚާބު ކާމިޔާބު ކުރެވޭނެކަންވެސް މިހާރުވަނީ ޔަގީން ކުރެެވިފައެވެ.
މިގޮތުން މިހާތަނަށް ހުރިހާ ފޮއްޓެއްގެ ވޯޓު ގުނާ ނިމިފައި ނުވިނަމަވެސް، އެމްޑީޕީގެ ޗެއާޕާސަން އިންތިހާބު ކާމިޔާބުވެއްޖެ ކަމަށް ފައްޔާޒް އިސްމާއިލްގެ ޓީމުން ވަނީ ހާމަ ކޮށްފައެވެ. ފައްޔާޒްގެ ކެމްޕޭން މެނޭޖަރު އިބްރާހިމް ވަހީދު (އިބުރޭ) ވަނީ މި އިންތިހާބު 60 ޕަސަންޓަށް ވުރެ މަތިން ވޯޓު ލިބޭނެ ކަމަށް މިހާރު ޔަގީންވެފައިވާ ކަމަށް ވިދާޅުވެފައެވެ.
މުޅި އިންތިޚާބުގެ މިހާތަނަށް 190އަށް ވުރެ ގިނަ ވޯޓު ފޮށި ގުނާފައިވާއިރު، ބޮޑު އަގުލަބިއްޔަތަކުން ފައްޔާޒުވަނީ މި ފޮށިތަކުން ކުރި ހޯއްދަވާފައެވެ. މިހާތަނަށް އާންމު ކުރެވުނު ހިސާބުތަކުން ދައްކާ ގޮތުގައި އޭނާއަށް 59 ޕަސަންޓު ލިބިފައި ވެއެވެ. މިހާތަނަށް ވިހި ހާހަށް ވުރެ ގިނަ ވޯޓު ލިބިފައިވާއިރު، އޭނާއާ ވާދަކުރައްވާ އިމްތިޔާޒް ފަހުމީއަށް ލިބިވަޑައިގެންފައިވަނީ ސާދަ ހާހެއްހާ ވޯޓެވެ.
މީގެ އިތުރުން، އިމްތިޔާޒު ފަހުމީ ބޮޑު ތަފާތަކުން ކުރި ހޯއްދަވާނެކަމަށް ކުރިން ބެލެވުނު މާލޭ ސިޓީންވެސް ފައްޔާޒު ބޮޑު ކުރިއެރުމެއް ވަނީ ހޯދާފައެވެ. އަދި އެނޫނަސް ބޮޑެތި ގިނަ ސިޓީތަކުން ކުރި ހޯއްދަވާފައިވަނީ ފައްޔާޒު އިސްމާއިލެވެ.
