ކުރިޔަށްދާ އެމްޑީޕީގެ އެތެރޭގެ ވާދަވެރި އިންތިޚާބަށްފަހުވެސް އެޕާޓީ ބައިބައި ވެގެން ނުދާނޭކަމުގައި، އެމްޑީޕީގެ އިސްލީޑަރު، ރައީސުލް ޖުމްހޫރިއްޔާ އިބުރާހިމް މުހައްމަދު ސާލިހު ވިދާޅު ވެއްޖެއެވެ.
ދަރުމަވަންތަ ސްކޫލަށް ވަޑައިގެން، މިހާރު ކުރިޔަށްދާ އެމްޑީޕީގެ ޗެއަރޕާސަން އިންތިޚާބުގައި ވޯޓު ލެއްވުމަށްފަހު، ދަރުމަވަންތަ ސްކޫލުގެ ބޭރުގައި ހުންނަވާ ބައެއް މީޑިއާތަކާއި ވާކަހަ ދައްކަވަމުން ރައީސް ސާލިހު ވިދާޅުވީ، އިންތިޚާބެއްގައި ފެންނާނޭ ހުރިހާކަމެއް މިއިންތިޚާބުގައިވެސް ފެނިގެން ހިގައްޖެ ކަމަށާއި އެހެންނަމަވެސް، މިއިންތިޚާބަށްފަހުވެސް ޕާޓީ ބައިބައި ވެގެން ނުދާނެ ކަމުގައެވެ.
އިންތިހާބަށް ފަހުގައި ވެސް ޕާޓީގެ އެތެރޭގައި ހަމަޖެހުން އޮންނާނެ. އެކަމާ އަޅުގަނޑު ޝައްކެއް ނުކުރަން.
ވޯޓު ލެއްވުމަށްފަހު، ދަރުމަވަންތަ ސްކޫލުގެ ބޭރުގައި ހުންނަވާ ރައީސް ސާލިހު ވިދާޅުވެފައި ވެއެވެ.
ރައީސް ސާލިހު ވިދާޅުވީ އެމްޑީޕީގެ ކޮންމެ އިންތިޚާބަކީވެސް މުހިންމު އިންތިޚާބެއް ކަމަށާއި، މިއިންތިޚާބުގެ ވޯޓު ލުމުގެ އިންތިޒާމްތައް ހަޖައްސަވާފައިވާ ގޮތްތަކާ ދޭތެރޭވެސް ހިތްޕުޅު ހަމަޖެހިވަޑައިގަންނަވާ ކަމަށެވެ.
ވޯޓު ލެއްވުމަށްފަހު ރައީސް ސާލިހުވަނީ ދަރުމަވަންތަ ސްކޫލުގެ ބޭރުގައި އިރިކޮޅަކު މަޑު ކޮށްލައްވާ، ސަރަހައްދުގައި ތިބި ބައެއް މީހުންނާ ސަލާމް ކުރައްވާފައެވެ.
މިހާރު ކުރިޔަށްދާ އެމްޑީޕީގެ އެތެރޭގެ އިންތިޚާބުގައި އެޕާޓީގެ ރައީސް މުހައްމަދު ނަޝީދުވެސް ވަނީ ހެނދުނު ހެނދުނާ ވޯޓު ލައްވާފައެވެ.
އެމްޑީޕީގެ އެތެރޭގައި އިންތިޚާބަށްފަހުވެސް ޕާޓީގެ އެތެރޭގައި އެއްބައިވަންތަކަން އޮންނާނޭ ކަމުގައި ރައީސް ސާލިހު ވިދާޅުވި ނަމަވެސް، ކުރިޔަށް ދާ އިންތިޚާބުގެ ކެމްޕޭން ކުރިޔަށް ގޮސްފައިވަނީ ސިޔާސީ ވާދަވެރިކަމަށްވުރެ ބޮޑަށް ޒާތީ ކެޕްމޭނެއްގެ ގޮތުގައެވެ. އަދި އެމްޑީޕީގެ އެތެރޭގައި އުފެދިފައިވާ ދެފެކްޝަންއިން ވަނީ އެއްބަޔަކު އަނެއް ބަޔަކަށް ވަަގަށް ގޮވ، ކޮރަޕްޝަނާއި ފަސާދައިގެ ތުހުމަތު އަޅުވާ، ރާބުއިމާއި ޒިނޭގެ ތުހުމަތުވެސް އެއްބަޔަކު އަނެއް ބަޔަކަށް ކޮށްފައެވެ.
ޗެއަރޕާސަންގެ އިތުރުން މިއަދުގެ ވޯޓުގައި، އަންހެނުންގެ ރޫހުގެ ރައީސް ކަމާއި ޒުވާނުންގެ ހިތްވަރުގެ ރައީސަކު ވެސް މިއަދު ހޮވާނެ އެވެ. މި މަގާމުތަކުގެ ތެރެއިން އަންހެނުންގެ ރޫހަށް މީދޫ ދާއިރާގެ މެމްބަރު ރޮޒައިނާ އާދަމާ ވާދަކުރައްވަނީ ސަފާތު އަހްމަދެވެ. ޒުވާނުންގެ ހިތްވަރުގެ ރައީސް ކަމަށް ވާދަކުރައްވަނީ މުހައްމަދު އަންސަރާއި ރިފްގާ ޝިހާމެވެ.
އިންތިޚާބުގައި ވާދަކުރާ ދެ ކެނޑިޑޭޓުންގެ ޓީމުންވެސް ވަނީ ރާއްޖޭގެ ހުރިހާ ރަށަކަށް ދަތުރުކޮށް، ވާދަވެރި ކެމްޕޭނެއް ކުރައްވާފައެވެ.
އެމްޑީޕީގެ އެތެރޭގެ އިންތިޚާބުގައި މަޖިލިސް މެމްބަރު އިމްތިޔާޒު ފަހުމީއާއި، އިކޮނޮމިކް މިނިސްޓަރު ފައްޔާޒު އިސްމާއިލް ވާދަކުރެއްވި ނަމަވެސް، މިއިންތިޚާބު ބެލެވެިފައިވަނީ، ރައީސް ސާލިޙާއި ރައީސް ނަޝީދާއި ދެބޭފުޅުންގެ މެދުގައި އޮތް ވާދަވެރި ކަމެއްގެ ގޮތުގައެވެ. އަދި ދެބޭފުޅުންވެސް ވަނީ، ފާޅުގައި ކެމްޕޭނަށް ނުކުމެވަޑައިނުގެން، އެހެންނަމަވެސް ކެނޑިޑޭޓުންނަށް ތާއީދު ހޯއްދެވުމަށް މަސައްކަތް ކުރައްވާފައެވެ.
