ރައީސް ޔާމިންގެ ޓުވިޓަރ އެކައުންޓު ވެރިފައި ކޮށްފިއެވެ. ރައީސް ޔާމިން ރަސްމީކޮށް ޓުވިޓަރ ބޭނުން ކުރައްވާފައިވަނީ މިމަހުގެ ކުރީކޮޅުއެވެ.
އަދި ޓުވިޓަރ ބޭނުން ކުރައްވަން ފެއްޓެވިތާ 3 ހަފްތާ ތެރޭގައިވަނީ، 7،500 ފޮލޯ ކޮށްފައެވެ.
ރައީސް ޔާމިން އަމިއްލަފުޅު ޓުވިޓަރ އެކައުންޓެއް ހައްދަވާ، ޓުވިޓަރ ބޭނުން ކުރައްވަން ފައްޓަވާއިރު، މީގެ ކުރިންވެސް ރައީސް ޔާމިންގެ ނަން ބޭނުން ކުރައްވައިގެން ގިނަ އަދަދެއްގެ ޓުވިޓަރ އެކައުންޓުތައް ހަދާފައި ވެއެވެ. އެހެންނަމަވެސް މީގެ ތެރެއިން އެއްވެސް ޓުވިޓަރ އެކައުންޓަކީ އެމަނިކްފާނު ގެންގުޅުއްވާ އެކައުންޓްތަކެއްކަން ޔަގީން ކުރެވިފައެއް ނުވެއެވެ.
ރައީސް ޔާމިން މި މޭމަހުގެ 4ވަނަ ދުވަހު އަލަށް ޓުވިޓަރ ބޭނުން ކުރައްވަން ފައްޓަވާފައި ވާއިރު، އެއަށްފަހު މުޅިންވެސް ޓުވީޓު ކުރައްވަމުން ގެންދަވަނީ އިނގިރޭސި ބަހުންނެވެ. އަދި ޓުވިޓައަކީ ދިވެހިބަނުންވެސް ޓުވީޓު ކުރެވޭ ސޯޝަލް މީޑިއާ ޕްލެޓްފޯމަށް ވާއިރު، ދިވެހި ބަހުން ޓުވީޓު ނުކުރައްވާތީ ރައީސް ޔާމިންއަށް ގިނަ ބައެއް ފާޑުކިއުންވެސް ވަނީ އަމާޒުވެފައެވެ.
ބައެއް ފަރާތްތަކުން ފާހަގަ ކޮށްފައިވަ ގޮތުގައި، ގައުމީ ލޯބި ފާޅުކޮށް، އަބަދު ވަތަނީ ލޯބި ރަމްޒުވާގޮތަށް ރައީސް ޔާމިން ޓުވީޓު ކުރައްވާއިރު ދިވެހިބަހުން ޓުވީޓު ނުކުރެއްވުމަކީ ދެކޮޅު ޖެހޭކަމެއް ނޫންކަމުގައެވެ.
އެހެންނަމަވެސް، ހަމައެކަނި އިނގިރޭސިބަހުން ރައީސް ޔާމިން ޓުވީޓު ކުރައްވަމުން ގެންދަވާ ސަބަބެއް އެމަނިކްފާނުވެސް އަދި ޕީޕީއެމްއިންވެސް ހާމަކޮށްފައެއް ނުވެއެވެ.
