ބޮލީވުޑްގައި ގިނަ އަހަރުތަކެއް ހޭދަކޮށްފައިވާ މަޝްހޫރު ސުޕާސްޓަރ ސަލްމާން ޚާން ކުޅެފައިވާ ފިލްމުތަކުގެ ތެރެއިން ޚުދު އޭނާއަށް އެންމެ ކަމުދަނީ ކޮން ފިލްމެއްކަން އެނގޭ ހެއްޔެވެ؟
56 އަހަރުގެ އެކްޓަރު މީގެކުރިން ދީފައިވާ އިންޓަވިއުތަކުން އެ ސުވާލުގެ ޖަވާބު ވަރަށް ސާފެވެ. އޭނާގެ އަމިއްލަ މަސައްކަތްތަކުގެ ތެރެއިން، އެންމެ ހިތްހަމަޖެހޭ މަސައްކަތަކީ، ބަތަލެއްގެ ގޮތުގައި ކުޅުނު އަލަތު ފިލްމު "މޭނޭ ޕިޔާރު ކިޔާ" ކަމަށް ވަނީ ބުނެފައެވެ.
"މޭނޭ ޕިޔާރު ކިޔާ" އަކީ 1989 ވަނަ އަހަރު ނުކުތް ލޯބީގެ ފިލްމެކެވެ. ސޫރަޖް ބަރްޖަތުޔާ ޑައިރެކްޓުކޮށްފައިވާ އެ ފިލްމުގައި ބަތަލާގެ ރޯލު ކުޅެފައިވަނީ ހަމައެކަނި އެ ފިލްމުން ބޮޑު މަޝްހޫރުކަމެއް ހޯދި ބާގްޔަޝްރީއެވެ. ބާގްޔަޝްރީ މިހާރު ފިލްމީ ދާއިރާއިން ފެންނަނީ ވަރަށް މަދުންނެވެ.
ކޮންމެއަކަސް، "މޭނޭ ޕިޔާރު ކިޔާ" ގައި ސަލްމާން ކުޅުނު "ޕްރޭމް"ގެ ކެރެކްޓާއަށް ވަނީ ބެލުންތެރިންގެ ވަރަށް ބޮޑު ތަރުހީބެއް ލިބިފައެވެ.
