މަހަށް ނިކުމެ އުޅެނިކޮށް މިޔަރު ހަމަލާދިން މީހާ ފަރުވާއަށް ޅ.އަތޮޅު ހޮސްޕިޓަލަށް ގެންގޮސް ފަރުވާދޭން ފަށައިފިއެވެ.

އެމްއެންޑީއެފް އިން ބުނީ، 14 މީހުންނާއި އެކު ޅ.އޮޅުވެލިފުއްޓާއި ދިމާލު ބޭރުން މަސްވެރިކަން ކުރަމުން ދިޔަ ޝަވޯނާ ނަމަކަށް ކިޔާ ދޯނީގައި ހުރި އުމުރުން 62 އަހަރުގެ ދިވެހި ފަޅުވެރިއަކު ކަނޑަށް ވެއްޓުނު ވަގުތު އެމީހާއަށް މިޔަރެއް ހަމަލާ ދީފައިވާކަމަށެވެ.

އެމީހާއަށް އިތުރު ފަރުވާދިނުމަށް ޅ.އަތޮޅު ހޮސްޕިޓަލަށް ގެންދިއުމުގައި އެމްއެންޑީއެފް ނޮދަން އޭރިޔާ ކޯސްޓްގާޑް ސްކޮޑްރަންއިން އެހީތެރިކަން ފޯރުކޮށްދީފައިވާކަމަށް އެމްއެންޑީއެފް އިން ބުންޏެވެ. މި ހާދިސާގެ މައުލޫމާތު ލިބިފައިވަނީ މިއަދު ހެނދުނު 10:57 ހާއިރުކަމަށްވެސް އެމްއެންޑީއެފް އިން ބުންޏެވެ.

މިހާރު ރާއްޖޭގެ ކަނޑުގެ ސަރަހައްދުތަކުގައި މިޔަރު ގިނަވެ މަސްވެރިކަން ކުރުމަށް އުނދަގޫވާކަމަށް މަސްވެރިން އަންނަނީ ބުނަމުންނެވެ. އެންމެ ބޮޑަށް މިވާހަކަ ދައްކަނީ ސޯޝަލް މީޑިއާގެ ޕްލެޓްފޯމްތަކުގައެވެ. އަދި މިޔަރު ހިފައި މަދުކުރުމަށްވެސް ބައެއް ފަރާތްތަކުން ގޮވާލައެވެ.

ނަމަވެސް މިޔަރަކީ ރާއްޖޭގައި ޤާނޫނުން ހިމާޔަތްކޮށްފައިވާ ދިރުމެކެވެ. ފިޝަރީސް މިނިސްޓްރީން ބުނީ މިޔަރުގެ އާބާދީ ބެލުމަށް ހެދި ދިރާސާތަކުން މިޔަރު އިތުރުވިކަން އަދި އެނގެން ނެތްކަމަށެވެ. މިޔަރުގެ އާބާދީ އިތުރުވުމަށް ސާވޭ ކުރި މެރިން ރިސާޗްއިން ބުނީ 2020 ވަނަ އަހަރާ 2021 ވަނަ އަހަރު މިޔަރުގެ އާބާދީ އިތުރުވަމުން އަންނަ މިންވަރު ދެނެގަތުމަށް ހެދި ސާވޭއިން އެކަން ފާހަގަވެފައި ނުވާކަމަށެވެ. އެހެންކަމުން މިޔަރުގެ މަސްވެރިކަން ހުޅުވާލެވޭނީ އާބާދީ އެވަރަށް އިތުރުވެއްޖެކަން ޔަޤީންކަމާއިއެކު އެނގިގެންކަމަށް މިނިސްޓްރީން ބުންޏެވެ.