ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް އަމާޒުކޮށް 6 މޭގައި ދިން ޓެރަރިސްޓު ހަމަލާގައި ބައިވެރިވުމުގެ ތުހުމަތުގައި ހައްޔަރުކުރި އަހްމަދު ފާތިހު، ފުލުހުންގެ ވަޒީފާއިން ވަކިވި ތާރީހާ މެދު ސުވާލު އުފައްދަވާ ރައްޔިތުންގެ މަޖިލިހުގެ ރައީސް މުހައްމަދު ނަޝީދު ފުލުހުން ރޭ ދޮގު ކޮށްފިއެވެ.

ފުލުހުން ނެރުނު ބަޔާނުގައި ބުނެފައިވަނީ، ރައްޔިތުންގެ މަޖިލިހުގެ ރައީސް މުހައްމަދު ނަޝީދަށް އަމާޒުކޮށް ދިން ޓެރަރިސްޓް ހަމަލާއާއި ގުޅިގެން ހައްޔަރު ކުރި އަހުމަދު ފާތިހު ހަމަލާ ދިންއިރުވެސް ހުރީ ފުލުހުންގެ ޚިދުމަތުގައި ކަމަށްބުނެ ދައްކަމުންދަނީ ހަގީގަތާއި ޚިލާފް ވާހަކަތަކެއް ކަމުގައެވެ. މީގެ އިތުރަށް މި ބަޔާނުގައި ބުނެފައިވަނީ، ފާތިހު ފުލުހުންގެ ވަޒީފާއާއި ގުޅިފައިވަނީ، 25 ނޮވެމްބަރު 2018ގައި ކަމަށާއި، އަދި އޭނާ ފުލުހުންގެ ވަޒީފާއިން ވަކިވެފައިވަނީ އަމިއްލައަށް ވަކިވެފައިވަނީ، 3 ފެބްރުއަރީ 2021ގައި ކަމުގައެވެ.

ފުލުހުންގެ ބަޔާނުގައި އިތުރަށް ބުނެފައިވަނީ، ނަޝީދަށް ދެވުނު ހަމަލާގެ ތަހުގީގީ ހުރިހާ މަރުހަލާއެއްގައިވެސް ތަހުގީގު ޓީމުތަކުން ވަނީ، އަހުމަދު ފާތުހުއަކީ މިހަމަލާ ދެވުނު އިރު ފުލހުންގެ ވަޒީފާގައި ހުރި މީހެއް ނޫންކަން ބަޔާން ކޮށްފައި ކަމަށް ބަޔާން ކޮށްފައި ކަމަށާއި، އަދި މި މައުލޫމާތު މީޑިއާތަކާއި ކުރިންވެސް ހިއްސާ ކޮށްފައިވާ ކަމަށެވެ.

ފުލުހުން ބުނެފައިވާ ގޮތުގައި، ފާތިހުގެ މައްސަލަ ތަހުގީގުކޮށް ނިންމާ ދައުވާ ކޮށްދިނުމަށް ޕްރިސެކިއުޓަރ ޖެނެރަލް އޮފީހަށް ފޮނުވާފައި ވާކަމަށާއި، އެހެންނަމަވެސް އޭނާގެ މައްޗަށް ދައުވާކުރެވޭ ހާލަތެއް ނެތްކަމަށް ނިންމާފައިވަނީ، ޕްރޮސެކިއުޓަރ ޖެނެރަލް އޮފީހުން ކަމަށެވެ. ޕީޖީން ދައުވާ ނުކުރުމަށް ނިންމާފައިވަނީ ދައުވާކުރެވޭނެ ވަރަށް އޭނާގެ މައްޗަށް ހެކި ނެތުމުގެ ސަބަބުންނެވެ.

ފާއިތުވެދިޔަ ހަފްތާހައި ނަޝީދުގެ އެލެކްސް ޓުވިޓަރ އެކައުންޓުން ކުރެއްވި ޓުވީޓެއްގައި ވިދާޅުވެފައިވަނީ، ދައުވާ ނުކޮށް ދޫކޮށްލާފައިވާ ފާތިހުއަކީ ބޮން ގޮއްވާލި މީހާ، އަދްހަމް އެކަންކޮށްފައި މާފަންނު ބޮނޑިބަތް ޕާކަށް ދިއުމުން އޭނާއަށް އެހެން ގަމީހެއް ގެނެސްދިން ސައިކަލްގެ ފަހަތުގައި އިން މީހާ ކަމަށެވެ.

"ފާތިހުއަކީ ފުލުހުންގެ ތެރޭގައި އުޅުނު މީހެއް. އޭނާ މޯލްޑިވްސް ޕޮލިސް ސާވިސް [އެމްޕީއެސް] އިން ވަކިކުރީ ބޮމްގެ ފަހުން،" ނަޝީދު ކުރެއްވި ޓުވީޓުގައި ވިދާޅުވެފައި ވެއެވެ.