މާލޭ ސިޓީ ކައުންސިލްގެ ވިލިމާލެ ދާއިރާގެ މެމްބަރު ނަހުލާ އަލީ އާއި އޭނާގެ މަންމަ ލީލާ ޕީޕީއެމް އިން ވަކިކޮށްފިއެވެ.
ނަހުލާ އާއި އޭނާގެ މަންމަ އަދި އެ ޕާޓީގެ މެމްބަރެއް ވެސް ކަމަށްވާ އައިމިނަތު ލީލާގެ ސުލޫކީ މައްސަލައެއް ޕީޕީއެމުން ބަލަންފެށީ މާލޭ ސިޓީ ކައުންސިލްގެ އަންހެނުންގެ ތަރައްގީ އަށް މަސައްކަތްކުރާ ކޮމެޓީގެ ބައި އިލެކްޝަންގައި އެ ޕާޓީގެ ޓިކެޓްގައި ވާދަކުރާ ކެނޑިޑޭޓަށް، އެ ދެމައިން "އެންޓި ކެމްޕެއިން" ކުރާކަމުގެ މައުލޫމާތު ހެއްކާ އެކު ލިބިފައިވާ ކަމަށް ބުނެއެވެ.
ސްލޫކީ ކޮމެޓީން މިއަދު ބޭއްވި ބައްދަލުވުމުގައި މިކަން ބެލުމަށްފަހު ވަނީ ނަހުލާއާއިމެދު ކުރާ ކަންކަން އެއްވެސް ޝައްކެތް ނެތް މިންވަރަށް ސާބުތުވާތީ އެނާ އާއި އޭނާގެ މަންމަ ޕީޕީއެމްއިން ވަކި ކުރުމަށް ނިންމާފައިވާކަމަށެވެ. ސްލޫކީ ކޮމެޓީގެ ނަހުލާއާއި އޭނާގެ މަންމަ ވަކި ކުރަން ނިންމާފައިވާއިރު، ނަހުލާ ވަނީ ޕީޕީއެމްއާއި، އެޕާޓީގެ ލީޑަރޝިޕާގާއި ގުޅޭގޮތުން ފޭސްބުކްގައާއި، ޓުވިޓާގައި ތަފާތު އެކި ވާހަކަ ދައްކާފައެވެ.
އަދި ނަހުލާގެ ފޭސްބުކް އެކައުންޓްގައި، ޕީޕީއެމާއި އެ ޕާޓީގެ ލީޑާޝިޕް ބަދުނާމުކޮށް ހަގީގަތާ ހިލާފު ވާހަކަތަކެއް އޭނާ ދައްކާފައިވާކަމަށްވެސް އެ ޕާޓީން ތުހުމަތުކުރިއެވެ. އެ މައްސަލައިގައި ޕީޕީއެމްގެ ސުލޫކީ ކޮމިޓީން ދާދި ދެންމެ ނިންމީ ނަހުލާ އާއި އޭނާގެ މަންމަ ޕާޓީން ވަކިކުރުމަށެވެ. އޭގެ އިތުރުންވެސް، ޕީޕީއެމްގެ ރައީސް އަދި އިދިކޮޅު ލީޑަރު ރައީސް ޔާމީންގެ ނަންފުޅު ބޭނުންކޮށް، ދޮގު ވާހަކަތައް ދައްކައި މެންބަރުންގެ މެދުގައި ނުތަނަވަސްކަން އުފައްދައި، ފިތުނަ އުފެދޭ ވާހަކަތައް ނަހުލާ ދައްކަމުން ގެންދާކަންވެސް ފާހަގަކުރެވިފައިވާ ކަމަށް ޕީޕީއެމުން ވަނީ މީގެ ކުރިން ބުނެފައެވެ.
ނަހުލާއާއި ނުލައި އިއްޔެ ވިލިމާލޭގައި މާލެ ސިޓީ ކައުންސިލް މެމްބަރުންނާއި، މޭޔަރު ހިމެނޭހެން ފާތުންއަށް ކެމްޕެއިންގެ ބޮޑު ހަރަކަތެއް ވަނީ ކުރިއަށް ގެންގޮސްފައެވެ.
