ސައުދީގެ ސުލްހަ މަސަލަސްކަން ނަގާލާ ފަރާތްތަކަށް "ދަގަނޑު ގޮށްމުށުން" ރައްދު ދޭނެކަމަށް ވިދާޅުވެ ސައުދީގެ ވަލީއަހްދު މުޙައްމަދު ބިން ސަލްމާން އިންޒާރު ދެއްވައިފި އެވެ.
މުޙައްމަދު މިފަދަ މޭރުމަކުން އިންޒާރު ދެއްވާފައި މިވަނީ ބުދަ ދުވަހު އެ ގައުމުގެ ޖިއްދާގެ ސަހަރާއެއްގައި ކުރިއަށްދިޔަ ހަފުލާއެއްގައި އެއްޗެއް ގޮވާލައި ހަމަލާއެއް ދީފައި ވާ ދަނޑިވަޅުގައެވެ. ޣައިރު މުސްލިމުންގެ މި ސަހަރާގައި އޮތް ހަފްލާ އަކީ ފުރަތަމަ ބޮޑު ހަނގުރާމަ ނިމުމުގެ ޒިކުރާ އާ ކުރުމަށް ކޮންމެ އަހަރަކުވެސް ބާއްވަމުން އަންނަ ހަފްލާއެކެވެ. މި ހަފްލާގައި ފަރަންސޭސި ވިލާތް ހިމެނޭގޮތަށް ވިލާތުގެ ގައުމުތަކާއި އެހެނިހެން ގައުމުތަކުގެ މަންދޫބުން ވަނީ ބައިވެރި ވެފައެވެ. ހަމަލާގައި 4 މީހަކު ވަނީ ޒަހަމް ވެފައެވެ. މި ހަމަލާ ދީފައި މި ވަނީ ޖިއްދާގައި ހުންނަ ފްރާންސްގެ ކޮންސުލޭޓްގެ ގާޑަކަށް ސައުދީގެ ރައްޔިތަކު ތޫނުއެއްޗަކުން ހަމަލާދިންތާ 2 ހަފްތާ ފަހުންނެވެ.
ވަލީއަހްދު މުޙައްމަދު ބިން ސަލްމާނާ ހަވާލާދީ ސައުދީގެ ދައުލަތުގެ ނިއުސް އޭޖެންސީ އެސްޕީއޭ އިން ބުނީ ސައުދީގެ ސަލާމަތާއި ސުލްހަ މަސަލަސްކަމަށް ގެއްލުންދޭން ވިސްނާ ކޮންމެ ބަޔަކަށްވެސް "ދަގަނޑު ގޮށްމުށުގެ" ރައްދެއް ދޭނެ ކަމަށެވެ. މުޙައްމަދު ވިދާޅުވީ ސައުދީން އަބަދުވެސް އޮންނާނީ ހަރުކަށި ފިކުރާއި ޓެރަރިޒަމާ ދެކޮޅާށް ކަމަށެވެ. އޭނާ ވިދާޅުވީ 2017 ވަނަ އަހަރު ސައުދީގެ ސަލާމަތީ ކަންކަމަށާއި އިންޓީރިއަރ މިނިސްޓްރީއަށް ގެންނަފެށި ބަދަލުތަކާއެކު އެ ގައުމުގައި ދޭ ޓެރެރިސްޓް ހަމަލާތައް ގާތްގަޑަކަށް އެއްކޮށް ހުއްޓިފައި ވާކަމަށެވެ.
މުޙައްމަދު ވިދާޅުވީ އެ ގައުމުން ކޮރަޕްޝަނާ ދެކޮޅަށް ފަށާފައިވާ މަސައްކަތްތައް ވެސް ހުއްޓުމެއް ނެތި ކުރިއަށް ގެންދަވާނެ ކަމަށެވެ. ކޮރަޕްޝަނާ ދެކޮޅަށް ކުރައްވާ މަސައްކަތްތައް ކަމަށް ވިދާޅުވެ ސައުދީގެ ޝާހީ އާއިލާގެ ގިނަ ބަޔަކު 2017 އިން ފެށިގެން އަންނަނީ އެކިފަހަރުމަތިން ހައްޔަރު ކުރަމުންނެވެ.
