ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ދިން ނުރައްކާތެރި ޓެރެރިސްޓް ހަމަލާގައި ބައިވެރިވި މީހުންނަށް ހައްގު އަދަބު ލިބެންޖެހޭކަމަށް ކުރީގެ އިސްލާމިކް މިނިސްޓަރ ޑރ.މުހައްމަދު ޝަހީމް އަލީ ސައީދު ވިދާޅުވެއްޖެއެވެ.

ޑރ.ޝަހީމް މިހެން ވިދާޅުވީ ރައީސް ނަޝީދަށް ހަމަލާދިންތައް އެއް އަހަރު މިއަދަށް ވެފައިވާއިރުވެސް، ޝަރީއަތް އެންމެ އެކަށީގެންވާ ގޮތަށް ކުރިއަށް ނުދާތީއާއި، ހަމަލާގައި ފަންޑު ކުރި މީހުން ހޯދިފައިނުވާތީ އެކަމުގެ ކަންބޮޑުވުން ފާޅު ކުރަމުންދާ ދަނޑިވަޅެއްގައެވެ.

ޑރ.ޝަހީމް ވިދާޅުވީ ރައީސް ނަޝީދަށް ދިން ހަމަލާއަކީ ނުރައްކާތެރި ހަމަލާއަކަށްވާއިރު، އެފަދަ ދެވަނަ ހަމަލާއެއް މިފަސްގަނޑުގައި ހިންގުމުގެ ޖާގަ ނުދިނުމަށް ކުރަންޖެހޭ އެންމެހައި ކަންކަން ކުރަންޖެހޭކަމަށެވެ. އަދި މިހަަމަލާގައި އަަމަލީ ގޮތުން ބައިވެރިވި އެންމެން އިންސާފުގެ ކުރިމައްޗަށް ގެނެސް ޝަރީއަތް ކުރެވި އަދަބު ދެވެންޖެހޭކަމަށް ޑރ.ޝަހީމް ވިދާޅުވިއެވެ.

ރައީސް މުހައްމަދު ނަޝީދު އަވަހާރަކޮށްލުމަށް ދިން އަނިޔާވެރި ޙަމަލާގެ އެންމެހައި ބައިވެރިންނަށް ޙައްޤު އަދަބު ލިބެންޖެހޭނެ. އެފަދަ ދެވަނަ ޙަމަލާއެއް މިފަސްގަނޑުގައި ނުހިނގާނޭ މަގުން ފިޔަވަޅުތައް ވަރުގަދަކުރުމަކީ ޤައުމާއި ރައްޔިތުންގެ ޙައްޤުގައި ކުރަންޖެހޭނެ ކަމެއް.

– ޑރ.ޝަހީމް ވިދާޅުވިއެވެ.

ރައީސް ނަޝީދަށް އަމާޒުކޮށް ދިން ޓެރަރިސްޓް ހަމަލާއަށް 1 އަހަރު ފުރުމާ ގުޅިގެން ރައީސުލްޖުމްހޫރިއްޔާ މިއަދު ކުރެއްވި ޓުވީޓެއްގައި ވިދާޅުވީ އެދުވަހު ދިން ހަމަލާއަކީ މުޅި ޤައުމު ސިއްސުވާލި ބިރުވެރި ހާދިސާއެއްކަމަށެވެ. އަދި އެދުވަހު ރައީސް ނަޝީދަށް ދިން ޓެރަރިސްޓް ހަމަލާ ތަޙްޤީގުކޮށް އެހަމަލާގެ ފަހަތުގައިވާ ފަރާތްތައް އިންސާފުގެ ކުރިމައްޗަށް ގެނައުމަށް ސަރުކާރުން ކުރާ މަސައްކަތް ވަރުގަދަ އަޒުމަކާއެކު ކުރިޔަށްދާ ކަމަށެވެ. އަދި އެ ހަމަލާއިން ނަޝީދު ސަލާމަތްވީތީ މާތް ރަސްކަލާންގެ ހަޒުރަތަށް ޝުކުރުވެރިވެ ހަމްދުކުރާ ކަމަށް ވެސް ރައީސް ވިދާޅުވިއެވެ.

ރައީސް ނަޝީދަށް ދިން ހަމަލާ ތަޙްޤީގު ކުރުމަށް ސަރުކާރުން ވަނީ ޚާއްސަ ޓީމެއްވެސް އެކުލަވާލާފައެވެ. އަދި ބޭރުގެ އެކި ފަރާތްތަކުގެ އެހީތެރިކަމާއެކު ތަހްޤީގުގެ މަސައްކަތްތައް ކުރިއަށް ގެންދެވިއެވެ. އަދި އެ މައްސަލަ ތަހްޤީގު ކުރަމުންދާ ގޮތް ބެއްލެވުމަށް ރައީސްގެ ޚާއްސަ މަންދޫބެއްގެ ގޮތުގައި އިނގިރޭސި ވިލާތުގެ ބޭފުޅެއްވެސް ހަމަޖެއްސެވިއެވެ.

ނަޝީދަށް އަމާޒުކޮށް މިދިޔަ އަހަރު ދިން ބޮމުގެ ހަމަލާގައި އަމަލީ ގޮތުން ބައިވެރިވި މީހުން ހައްޔަރުކޮށް، ބައެއް މީހުންގެ މައްޗަށް ދައުވާ އުފުލައި، ހުކުމް ވަނީ އިއްވާފައެވެ.

ބޮމުގެ ހަމަލާއާ ގުޅިގެން ޖުމްލަ ނުވަ މީހަކު ހައްޔަރުކުރިއެވެ. އޭގެ ތެރޭގައި ބޮން ގޮއްވާލަން ރިމޯޓަށް ފިއްތާލި އަދުހަމް އަހުމަދު ވަނީ އޭނާއާ ދެކޮޅަށް ކުރި ދައުވާތަކަށް އިއުތިރާފްވެފައެވެ. އޭނާގެ މައްޗަށް ކޯޓުން ވަނީ 23 އަހަރުގެ ޖަލު ހުކުމެއް އިއްވާފައެވެ.