މާލޭގައި މާރާމާރިއާއި ކުށްކުރުން އިތުރުވާތީ އިދިކޮޅު ލީޑަރު އަދި ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމް ކަންބޮޑުވުން ފާލުކުރައްވައިފިއެވެ.
ރައީސް ޔާމީން ރޭ ޓްވިޓާ ބޭނުންކުރެއްވުމަށްފަހު މިރޭ ކުރެއްވި ޓްވީތް ގައި ވިދާޅުވީ، ގިނަ ދުވަސްތަކަކަށްފަހު ވަޅި ޖެހުމާއި ނުރައްކާތެރި ކުށްތައް ގިނަވެފައިވާކަމަށެވެ. އެފަދަ ކުށްތައް އިތުރުވަނީ ފުލުހުން އެކަމަށް އަޅަނުލާތީތޯ ނުވަތަ އެކަންކަމަށް ފުލުހުން ހިތްވަރު ދޭތީ ރައީސް ޔާމީން ސުވާލުކުރެއްވިއެވެ.
ދިގު މުއްދަތަކަށްފަހު އަނެއްކާވެސް, ވަޅި ހެރުމާއި, ބޮޑެތި ކުށްތައް މިވަނީ އާންމުވާން ފަށާފަ. މިއީ ފުލުހުންގެ އިހުމާލުތޯ؟ ނުވަތަ ފުލުހުންނަށް ގޮތް ހުސްވީތޯ؟
ރައީސް ޔާމިން ވިދާޅުވެފައި ވެއެވެ.
Brutal stabbings n violent crimes showing its ugly head after a long spell. Police indifference? O is it in deference ????
— Abdulla Yameen (@prz_ymn) May 5, 2022
ރައީސް ޔާމީން މިހެން ވިދާޅުވެފައިވާއިރު ފާއިތުވި ދެތިން ދުވަހު މާލެ ސަރަހައްދުގައި ވަނީ ނުރައްކާތެރި ކުށްކުރުން އިތުރުވެފައެވެ. އެގޮތުން އީދު ދުވަހު ދެ މާރާމާރީއެއް ހިންގައި 4 މީހަކު ޒަޚަމްކޮށްލާފައިވެއެވެ. އަދި ރޭވެސް ހުޅުމާލެ ފުރަތަމަ ފިޔަވައްސާއި ދެވަނަ ފިޔަވަހީގައިވެސް ނުރައްކާތެރި މާރާމާރިއެއް ހިނގާފައިވެއެވެ. ފުރަތަމަ މާރާމާރީ ހިނގާފައިވަނީ ފޭސް އެކެއްގެ ލަޔަރ ރެސްޓޯރެންޓު ކައިރީގައެވެ. އަދި ދެވަނަ މާރާމާރީ ހިނގާފައިވަނީ ފޭސް ދޭއްގެ ބްރިޖް ކައިރީގައެވެ. މިދެމާރާމާރީގައި ދެމީހަކަށް އަނިޔާވެ ހޮސްޕިޓަލުގައި ފަރުވާ ދެމުން އަންނަކަމަށް ފުލުހުން ވިދާޅުވެފައިވާއިރު ލިބިފައިވާ އަނިޔާތަކުގެ ތަފްސީލެއް ފުލުހުން ހާމައެއް ނުކުރެއެވެ.
ވަރަށް ގާތްގާތުގައި ހިނގާފައިވާ މިދެމާރާމާރީއާއި ގުޅުމެއްވާކަމެއް ނުވަތަ މިއީ ކޮންކަމަކާއި ގުޅިގެން ހިނގި މާރާމާރީއެއްކަން ފުލުހުން ވިދާޅުނުވާއިރު މިދެ މާރާމާރީވެސް ތަޙުގީގުކުރަމުން އަންނަކަމަށް ފުލުހުން ބުނެފައިވެއެވެ.
