މިފަހްތާގެ ބުރާސްފަތު ދުވަހު އިރާގަށް އައި ވެލީގެ ތޫފާނެއްގެ ސަބަބުން، ފުއްޕާމޭގެ މައްސަލަތަށް ކުރިމަތިވެ، 1،000 މީހުން ހޮސްޕިޓަލްތަކުން ފަރުވާ ހޯދަން ޖެހިއްޖެއެވެ. އިރާގުގެ ދައުލަތުގެ މީޑިއާއިން ރިޕޯޓު ކޮށްފައިވާ ގޮތުގައި، މިއީ ފާއިތުވެދިޔަ 1 މަސްދުވަހުގެ ތެރޭގައި އިރާގަށް އައި 7ވަނަ ވެލީގެ ތޫފާން ކަމުގައެވެ.
އިރާގުގެ ވެރިރަށް ބަޢުދާދުގެ އިތުރުން، އެގައުމުގެ ހުޅަނގުގައި އޮންނަ ބޮޑު ޕްރޮވިންސެއް ކަމުގައިވާ އަލް އަންބާރު ޕްރޮވިންސް ހިމެނޭގޮތުން، އިރާގުގެ 18 ޕްރޮވިންސްގެ ތެރެއިން 6 ޕްރޮވިންސެއްގެ ރައްޔިތުން ހެދުނު ހޭލީ، ހިފަފުހުގެ ބޯ ވިލާގަޑަކުން ޖައްވު އަނދިރިވެފައި ވަނިކޮށެވެ.
އިރާގުގެ INA ނިއުސް އޭޖެންސީން ރިޕޯޓު ކޮށްފައިވާ ގޮތުގައި، އަލް އަންބާރު ޕްރޮވިންސާއި، އަދި އުތުރުގެ ކިރުކުކް ޕްރޮވިންސްގެ މުއްސަސާތަކުންވަނީ، އެ ޕްރޮވިންސްތަކުގެ ރައްޔިތުން ބޭރަށް ނުނިކުމެ ގެތަކު އެތެރޭގައި ތިބުމަށް އިރުޝާދު ދީފައެވެ.
ހެލްތު އޮފިޝަލުން ވިދާޅުވެފައި ވާގޮތުގައި، އަލް އަންބާރު ޕްރޮވިންސްގައި ނޭވާލުމުގެ މައްސަލަތައް ކުރިމަތިވެގެން 700 މީހުން އެ ޕްރޮވިންސްގެ ހޮސްޕިޓަލްތަކުން ފަރުވާ ހޯދާފައި ވެއެވެ.
އައި މީގެ އިތުރުން، ސަލާހުއްދީން ސެންޓްރަލް ޕްރޮވިންސްގައި 300 އަށްވުރެ ގިނަ މީހުންނަށް ނޭވާލުމުގެ ނިޒާމުގެ މައްސަލަތައް ކުރިމަތި ވެފައިވާއިރު، ޑިވަނިޔާ ސެންޓްރަލް ޕްރޮވިންސާއި، ނަޖަފް ޕްރޮވިންސާއި، އަދި ބަޢުދާދުގެ ދެކުނުގައި ކޮންމެ ސަރަހައްދެއްގައި 100 މީހުންނަށް ނޭވާލުމުގެ ނިޒާމުގެ މައްސަލަތައް ކުރިމަތިވެފައިވާ ކަމަށްވެސް ނޫސް އޭޖެންސީން ރިޕޯޓު ކޮށްފައި ވެއެވެ.
އިރާގުގައި ފާއިތުވެދިޔަ އަހަރުތަކުގައި ވާރޭ ވެހޭމިންވަރު ދަށްވެ، އާދަޔާއި ޚިލާފަށް ހޫނުމިން މަތިވެގެން ދިއުމުގެ ސަބަބުން އެގައުމަށްވަނީ މޫސުމީ މައްސަލަތަކާއި ކުރިމަތިލާން ޖެހިފައެވެ. މުސުމީ ތަޖުރިބާކާރުން ވިދާޅުވާގޮތުގައި، ހަގުރާމާގައި ވީރާނާވެފައިވާ އީރާގަށް، މޫސުމީ މިމައްސަލަތަކުގެ ސަބަބުން، ކުރިޔަށް އޮތްތަނުގައި އިޖުތިމާއީ އަދި އިގްތިސާދީ ބޮޑެތި މައްސަލަތަކާއި ކުރިމަތި ލާންޖެހޭނެއެވެ.
މޫސުމީ މައްސަލަތަކުގެ ސަބަބުން، 2050 ވަނަ އަހަރު އަންނަންވާއިރަށް އިރާގުގައި ފެން ލިބެންހުރި މިންވަރު %20 ދަށަށްދާނެ ކަމުގެ އިންޒާރު، ފާއިތުވި ނޮވެމްބަރުމަހު \ ވާލްޑް ބޭނުންކުންވަނީ ދީފައެވެ. އަދި ފާއިތުވެދިޔަ އެޕްރިލްމަހު އިރާގުގެ ސަރުކާރުން އިންޒާރު ދީފައިވާ ގޮތުގައި، ކުރިޔަށްއޮތް 10 އަހަރުގެ ތެރޭގައި އެގައުމަށް 272 ދުވަހު ވެލީގެ ތޫފާންތަކާއި ކުރިމަތިލާން ޖެހޭނެއެވެ.
ކޮމެންޓު ފޮނުވާ