ގްރޫޕް ހަދައިގެން ތޫނު ހަތިޔާރު ބޭނުންކޮށްގެން މާރާމާރީ ހިންގި މައްސަލައަކާ ގުޅިގެން ހަތް މީހަކު ހޯދުމމަށް ފުލުހުން އިއުލާންކޮށްފިއެވެ. ފުލުހުންގެ ފުލުހުންގެ ސީރިއަސް އެންޑް އޮގަނައިޒްޑް ކްރައިމް ޑިޕާޓްމަންޓުން ތަހުގީގު ކުރަމުންދާ މައްސަލައަކާއި ގުޅިގެން ހޯދަން އިއުލާންކުރި މީހުން ހޯދަނީ ކޮން މައްސަލައަކާއި ގުޅިގެންކަމަށް ފުލުހުން ނުބުނެއެވެ.

ފުލުހުން ހޯދަމުންދަނީ:

1. ކ. މާލެ/ ދަފްތަރު ނަންބަރު  ރސ2260، މަޢުޞޫމް މުޙައްމަދުދީދީ (27އ)
2. ތ. ތިމަރަފުށި/ ސީނުގެ، އަޙްމަދު ޝިމްޙާޒު (22އ)
3. ކ. މާލެ/ މ. ލޮނުމިދިލިގެ، ލޫޠު އަޙްމަދު އާސިފް (18އ)
4. ގއ. މާމެންދޫ/ ގްލޭނޫރަންމާގެ، އަޙްމަދު ރަބީޢު (24އ)
5. ގއ. ގެމަނަފުށި/ ކެނެރީގެ، އަޙްމަދު ނާޒިހު (27އ)
6. ސ. ހުޅުދޫ/ ނާދީ، މުނާދު ޖަޢުފަރު  (20އ)
7. ސ. މަރަދޫ/ ކޮރަލް، އަޙްމަދު ސާތިޢު (21އ)

ހަތް މީހަކު ހޯދަން ފުލުހުން އިއުލާންކޮށްފައިވާއިރު ހުޅުމާލެ ދެވަނަ ފިޔަވަހީގައި ރޭ ދެމާރާމާރީއެއް ހިންގައި ބަޔަކު ވަނީ ޒަޚަމްކޮށްލާފައެވެ. އެ މައްސަލާގައި އަދި ބަޔަކު ހައްޔަރުކޮށްފައެއް ނުވެއެވެ.

ފުލުހުން ބުނެފައިވަނީ ހުޅުމާލޭގައި ހިނގި މާރާމާރީގެ ތެރެއިން ފުރަތަމަ މާރާމާރީ ހިނގާފައިވަނީ ފޭސް އެކެއްގެ ލަޔަރ ރެސްޓޯރެންޓު ކައިރީގައިކަމަށެވެ. ފުލުހުން ބުނީ މިމާރާމާރީގެ މަޢުލޫމާތު ފުލުހުންނަށް ލިބިފައިވަނީ މިރޭ 21:17 ހާއިރުކަމަށެވެ.

ދެވަނަ މާރާމާރީ ހިނގާފައިވަނީ ފޭސް ދޭއްގެ ބްރިޖް ކައިރީގައިކަމަށާއި މިމާރާމާރީގެ މަޢުލޫމާތު ފުލުހުންނަށް ލިބިފައިވަނީ މިރޭ 21:32 ހާއިރުކަމަށް ފުލުހުން ވިދާޅުވެއެވެ. މިދެމާރާމާރީގައި ދެމީހަކަށް އަނިޔާވެ ހޮސްޕިޓަލުގައި ފަރުވާ ދެމުން އަންނަކަމަށް ފުލުހުން ވިދާޅުވެފައިވާއިރު ލިބިފައިވާ އަނިޔާތަކުގެ ތަފްސީލެއް ފުލުހުން ހާމައެއް ނުކުރެއެވެ.

ވަރަށް ގާތްގާތުގައި ހިނގާފައިވާ މިދެމާރާމާރީއާއި ގުޅުމެއްވާކަމެއް ނުވަތަ މިއީ ކޮންކަމަކާއި ގުޅިގެން ހިނގި މާރާމާރީއެއްކަން ފުލުހުން ވިދާޅުނުވާއިރު މިދެ މާރާމާރީވެސް ތަޙުގީގުކުރަމުން އަންނަކަމަށް ފުލުހުން ބުނެފައިވެއެވެ.

ހަތް މީހުން ހޯދަން އިއުލާންކޮށް ފުލުހުން ބުނީ މި މީހުންނާ ބެހޭ އެއްވެސް މައުލޫމާތެއް އެނގޭ ފަރާތެއްވާނަމަ ފުލުހުންގެ ހޮޓްލައިން ނަންބަރު 3322111 އަށް ނުވަތަ ސީރިއަސް އެންޑް އޮގަނައިޒްޑް ކްރައިމް ޑިޕާޓްމަންޓްގެ ނަންބަރު 9911099 އަށް ގުޅުއްވައި ހިއްސާކުރުމަށް އެދޭކަމަށެވެ.