އިނގިރޭސި ޕްރިމިއާ ލީގުގައި މެންޗެސްޓާ ޔުނައިޓެޑުން މި ސީޒަނުގެ އެންމެ ފަހު ހޯމް މެޗުގައި 3-0 އިން ބްރެންޓްފޯޑް ބަލިކޮށްފިއެވެ.
އޯލްޑް ޓްރެފޯޑްގައި 70،000 އަށްވުރެ ގިނަ ސަޕޯޓަރުން ކުރިމަތީގައި ކުޅުނު މި މެޗު ފެށިގެން ބޯޅަ ކޮންޓްރޯލްކޮށް ރަނގަޅަށް ކުޅެމުންދިޔައީ އެޓީމުންނެވެ. އެގޮތުން އެޓީމުން ދިޔައީ ބްރެންޓްފޯޑްގެ ހާފަށް ބާރުބޮޑުކޮށް ހަމަލާތައް އުފައްދަމުންނެވެ.
މެޗުގެ ނުވަ ވަނަ މިނިޓުގައ ޔުނައިޓެޑަށް ލީޑު ނަގައިދިނީ އެންތޮނީ އެލަންގާ ދިން ޕާހަކުން ބްރޫނޯ ފެނާންޑޭޒްއެވެ. މިއީ އޭނާ ޔުނައިޓެޑަށް ޖަހައިދިން 50 ވަނަ ލަނޑެވެ. ދެވަނަ ލަނޑު 61 ވަނަ މިނިޓުގައި ލިބުނު ޕެނަލްޓީއަކުން ޖެހީ ކްރިސްޓިއާނޯ ރޮނާލްޑޯއެވެ. އަދި އޭގެ 12 މިނިޓު ފަހުން ޑިފެންޑަރު ރަފޭލް ވަރާން ވަނީ އޭނާ ޔުނައިޓެޑްގެ ޖޯޒީގައި ފުރަތަމަ ލަނޑު ޖަހައިފައެވެ.
އޭރިއާ ތެރެއިން ރޮނާލްޑޯ އަށް ފައުލް ކޮށްގެން ލިބުނު ޕެނަލްޓީއަކުން ކާމިޔާބުކުރި ޔުނައިޓެޑުގެ ދެވަނަ ލަނޑަކީ، ރޮނާލްޑޯ މިފަހަރުގެ ލީގުގައި ޖެހި 18 ވަނަ ލަނޑެވެ. އަދި އެންމެ ފަހުން ޔުނައިޓެޑް ލީގުގައި ކުޅުނު އަށް މެޗުން އޭނާ ޖެހި ނުވަވަނަ ލަނޑެވެ. ލީގު ލަނޑު ލިސްޓުގައި ރޮނާލްޑޯ އަށް ވުރެ ކުރީގައި އުޅެނީ 19 ލަނޑު ޖަހާފައިވާ ޓޮޓެންހަމްގެ ސޮން ހެއުން މިން އާއި ލިވަޕޫލްގެ މުހައްމަދު ސަލާހެވެ.
ޔުނައިޓެޑްގެ ފަހު ގޯލު ޖެހީ ފްރާންސްގެ ޑިފެންޑަރު ރަފައެލް ވަރާންއެވެ. މެޗުގެ 72 ވަނަ މިނިޓްގައި އަލެކްސް ޓެލޭސް ނެގި ކޯނަރަކުން ވަރާން ފޮނުވާލި ބޯޅަ ގޯލަށް ވަނީ ބްރެންޓްފޯޑް ކުޅުންތެރިއަކު ގައިގައި ޖެހިފައެވެ.
ޔުނައިޓެޑަށް މި ވަގުތު އޮތީ 36 މެޗުން 58 ޕޮއިންޓާ އެކު ލީގުގެ ހަ ވަނައިގައެވެ. ފަސްވަނައިގައި ޓޮޓެންހަމް ހޮޓްސްޕާ އޮތްއިރު ހަތަރުވަނައިގައި އޮތީ 63 ޕޮއިންޓް ހޯދާފައިވާ އާސެނަލް އެވެ. ޓޮޓެންހަމާއި އާސެނަލް އަށް ވެސް ލީގުގައި ބާކީ ހަތަރު މެޗު އެބަ އޮތެވެ. އެކަމަކު ޔުނައިޓެޑަށް ބާކީ އޮތީ ރަށުން ބޭރުގައި ބްރައިޓަން އާއި ކްރިސްޓަލް ޕެލަސްއާ ދެކޮޅަށް ކުޅެން އޮތް ދެ މެޗެވެ.
