ރާއްޖޭގައި އެންމެ ފުޅާ ދާއިރާއެއްގައި ސުޕަރމާކެޓް ވިޔަފާރި ހިންގަމުން އަންނަ ރެޑްވޭވް ކުންފުނީގެ ނަމުގައި ފޭކް ޕްރޮމޯޝަންތަކެއް ހިންގަމުންދާތީ ސަމާލުވުމަށް އެކުންފުނިން އިލްތިމާސްކޮށްފިއެވެ.
ރެޑްވޭވުން ބުނީ އެ ޕްރޮމޯޝަންތައް ހިންގަނީ އެކުންފުނީގެ ނަން ބޭނުންކޮށްގެން ސޯޝަލް މީޑިއާގެ ޕްލެޓްފޯމް ތަކުގައި ކަމަށެވެ. އެގޮތުން ފޭސްބުކްގައި "ރެޑްވޭވް މޯލްޑިވްސް"ގެ ނަމުގައި ފޭކް ޕޭޖެއް ހަދައި އެކުންފުނީގެ އަސްލު ޕޭޖާއި ވައްތަރު ކުރުމަށް މަސައްކަތްކޮށް އޮޅުވާލައިގެން އަސްލެއް ނެތް ޕޯސްޓްތަކެއް ގެންދަނީ ދައުރު ކުރަމުންނެވެ. އަދި އަގު ބޮޑެތި އިނާމްތަކެއް ލިބޭ ކަމަށް ބުނެ ފޭކް ޕްރޮމޯޝަންތައް ދަނީ ހިންގަމުންނެވެ.
ނަމަވެސް މިފަދަ އެއްވެސް ޕްރޮމޯޝަނެއް އެކުންފުނިން ކުރިއަށް ނުގެންދާ ކަމަށް ރެޑްވޭވުން ވަނީ ބުނެފައެވެ.
"މިފަދަ ލިންކުތައް ޝެއަރ ނުކުރުމަށް އިލްތިމާސްކުރަން"
– ރެޑްވޭވް
އެކުންފުނިން ބުނީ އެކުންފުނިން ހިންގާ ހުރިހާ ޕްރޮމޯޝަނެއްގެ މައުލޫމާތު ކުންފުނީގެ އޮފިޝަލް ސޯޝަލް މީޑިއާ އެކައުންޓް ތަކުގައި ހިއްސާކުރަމުން ގެންދާނެ ކަމަށެވެ.
ފޭކް ޕޭޖު މިހާރު ފޭސްބުކަށް ރިޕޯޓްކޮށްފައި ވާކަމަށް ރެޑްވޭވުން މައުލޫމާތު ދެއެވެ. ނަމަވެސް އެ ޕޭޖު އަދި އެކްޓިވްކޮށް ފޭސްބުކުން ފެންނަން އެބަހުއްޓެވެ.
ސޯޝަލް މީޑިއާގައި މިފަދަ ފޭކް އެކައުންޓްތައް ހަދައިގެން އެކި ޕްރޮމޯޝަންގެ ނަމުގައި އޮޅުވާލައި، މަކަރުން ފައިސާ ހޯދުމުގެ އެކިއެކި ހަރަކާތްތައް މިދުވަސްވަރު އާންމުވެފައި ވާކަން ފާހަގަވެއެވެ. އެގޮތުން ރާއްޖޭގެ ބޮޑެތި ބައެއް އެހެން ކުންފުނިތަކުގެ ނަމުގައިވެސް ފޭކް ޕޭޖްތައް ހަދައިގެން މިފަދަ މަކަރުވެރި ހަރަކާތް އަންނަނީ ހިންގަމުންނެވެ. އޭގެތެރޭގައި އެސްޓީއޯވެސް ހިމެނެއެވެ.
