ބާ ކައުންސިލްގެ އިންތިޚާބުގައި ވާދަކުރުމުގެ ފުރުޞަތު ހުޅުވާލައިފިއެވެ. ބާކައުންސިލަކީ ޤާނޫނީ ވަކީލުންގެ މަސައްކަތްތައް ރެގިއުލޭޓްކުރާ ފަރާތެވެ.
އެކައުންސިލްގެ އިންތިުޚާބަށް ވާދަކުރަން ހުޅުވާލާފައިމިވަނީ، އެކައުންސިލްގެ ރައީސްއާއި ނާއިބު ރައީސްގެ ދައުރު ޖުލައި މަހުގެ 13 އަށް ހަމަވާތީއެވެ. ބާ ކައުންސިލުން މިހާރު ނިންމާފައިވަނީ އަންނަ ޖޫންމަހު ބާ ކައުންސިލްގެ އިންތިހާބު ބޭއްވުމަށެވެ. އަދި އެ އިންތިހާބުގައި ވާދަކުރުމުގެ ފުރުޞަތު މިހާރު ވަނީ ހުޅުވާލާފައެވެ.
ބާ ކައުންސިލުން ނެރުނު އިއުލާނެއްގައި ބުނީ ޖޫންމަހު ބާއްވާ އިންތިހާބުގައި ވާދަކުރުމުގެ ފުރުޞަތު އަންނަ މަހުގެ 22 ވަނަ ދުވަހާ ހަމައަށް ހުޅުވާލާފައިވާކަމަށެވެ. ބާ ކައުންސިލްގެ މަގާމުތަކުގެ ތެރެއިން ރައީސްގެ މަގާމާއި ނައިބު ރައީސްކަމަށް ކުރިމަތިލެވޭނީ ގާނޫނީ ވަކީލު ކަމުގައި މަދުވެގެން 10 އަހަރުގެ ތަޖްރިބާ ހުރެގެންނެވެ.
ބާ ކައުންސިލްގެ މިހާރުގެ ރައީސަކީ މައުމޫން ހަމީދެވެ. އަދި ނައިބު ރައީސަކީ ކުރީގެ އެޓާނީ ޖެނެރަލް އަބްދުﷲ މުއިއްޒެވެ.
ބާ ކައުންސިލްގެ އެގްޒެކެޓިވް ކޮމެޓީއަށް 6 މެމްބަރުން އައްޔަންކުރާއިރު، އެ މަގާމުތަކަށް ކުރިމަތިލެވޭނީ ވަކީލު ކަމުގެ ފަސް އަހަރުގެ ތަޖްރިބާ ހުރެގެންނެވެ.
