ކުރިއަށް އޮތް 2023ވަނަ އަހަރުގެ ރިޔާސީ އިންތިޚާބުގައި އެމްޑީޕީއަށް ކިރިޔާވެސް އޮތް ފުރުސަތަކީ ރައީސް ޞާލިހު އެމްޑީޕީ ޓިކެޓުގައި ވާދަކުރެއްވުން ކަމުގައި މޯލްޑިވްސް ޓްރޭޑް ޔޫނިއަންގެ ނައިބް ރައީސް ސައުދު ވިދާޅުވެއްޖެއެވެ.

ސައުދު މިހެން ވިދާޅުވީ ރިޔާސީ އިންތިޚާބުގައި ރައީސް ނަޝީދު ވާދަ ކުރައްވުމަށް، އެމްޑީޕީގެ ޕްރައިމަރީގައި ވާދަ ކުރައްވާނެކަން އިއުލާން ކުރެއްވުމުންނެވެ. ރޭ ކުޅުދުއްފުށީގައި ބޭއްވި މާހެފުމެއްގައި ބައިވެރިވި މީހުންނާއި މުޚާތަބުކޮށް ވާހަކަ ދައްކަވަމުން އީވާ ވިދާޅުވީ 2023ގެ ރިޔާސީ އިންތިޚާބުގައި ރައީސް ނަޝީދު ވާދަ ކުރައްވާނެކަމަށެވެ. އެމަނިކުފާނު ވާދަ ކުރައްވާނީ އެމްޑީޕީގެ ތެރޭގައި އޮންނަ ޕްރައިމަރީގައި ވާދަކޮށް، އެޕްރައިމަރީ ކާމިޔާބު ކޮށްގެންކަމަށް އީވާ ވިދާޅުވިއެވެ.

އީވާގެ މިވާހަތަކާއި ގުޅިގެން ގިނަ ބަޔަކު ދަނީ މިއީ ނުބައި ހިސާބެއްކަމަށް ބުނަމުންނެވެ. ޓްރޭޓް ޔޫނިއަންގެ ނައިބް ރައީސް ސައުދު ވިދާޅުވީ ނުބައި ހިސާބު ޖަހައިގެން އަނެއްކާވެސް އެމްޑީޕީ މަގުމަތިވާން ދޫކޮށްލުމަކީ އެމްޑީޕީ މެމްބަރުން ކުރާނެ ކަމެއް ނޫންކަމަށެވެ. މިހާރު ފެންނަ ގޮތުން ރައީސް ޞާލިހު ވާދަ ނުކުރައްވައިފިނަމަ 2023 ގައި އެމްޑީޕީއަށް އޮތް ފުރުސަތު ހަނިކަމަށް ސައުދު ވިދާޅުވިއެވެ.

2023 ރިޔާސީ އިންތިޚާބު އެމްޑީޕީ ކިރިޔާވެސް އޮތް ހަމައެކަނި ފުރުސަތަކީ ރައީސް ޞާލިހު ވާދަކުރެއްވުން. ނުބައި ހިސާބު ހަޖައިގެން އަތައް ގޮއްވަން މަސައްކަތް ކުރުން ހުއްޓާލުން ބުއްދިވެރި. އަބަދަކު މަގުމަތީގައި ރައްޔިތުންނަށް ނުތިބެވޭނެ. އެމްޑީޕީއަށް ތާއީދު ކުރާ މީހުން މާބޮޑަށްވެސް ހޭލުންތެރި ވެއްޖެ.

– ސައުދު ވިދާޅުވިއެވެ.

ރިޔާސީ އިންތިޚާބުގައި ވާދަކުރެއްވުމާއިމެދު ރައީސް ނަޝީދުވެސް އަދި ރައީސް ޞާލިހުވެސް ސީދާ ވަކި ގޮތެއް އަދި ނިންމަވާފައި ނުވެއެވެ. އިންތިޚާބުގައި އެމްޑީޕީގެ ޓިކެޓްގައި ވާދަކުރައްވާނެ ބޭފުޅަކު ކަނޑައެޅިގެންދާނީ އެމްޑީޕީގެ ތެރޭގައި ބާއްވާ ޕްރައިމަރީ އަކުންނެވެ. ނަމަވެސް ޕްރައިމަރީއަކާއި ނުލައި ރައީސް ޞާލިހަށް އިތުރު ދައުރަކަށް ޓިކެޓް ދޭންޖެހޭކަމަށް އެމްޑީޕީގެ ބައެއް ބޭފުޅުން ގެންދަނީ ވިދާޅުވަމުންނެވެ.

ރައީސް ނަޝީދާއި ރައީސް ޞާލިހުގެ ވާދަވެރިކަން ބޮޑުވެފައިވަނީ އަންނަ މަހު ބާއްވާ އެމްޑީޕީގެ ޗެއާޕާސަން އިންތިޚާބާއި ހަމައިންނެވެ. މިއިންތިޚާބުގައި ފައްޔާޟާއި، އިންތި ވާދަ ކުރި ނަމަވެސް މިއީ ރައީސް ނަޝީދާއި، ރައީސް ޞާލިހުގެ މެދުގައި އޮތް ރިޔާސީ ވާދަވެރިކަމުގެ އިންތިޚާބު ކަމަށް ގިނަ ބަޔަކު ދެކެއެވެ. އަދި މިއިންތިޚާބު ކާމިޔާބު ކުރާ ބޭފުޅެއްގެ ފަހަތުގައި ހުރި ލީޑަރަކަށް އެމްޑީޕީގެ ރިޔާސީ ޓިކެޓް ލިބޭނެކަމަށް ގިނަ ބަޔަކު ގަބޫލު ކުރެއެވެ.