ސިވިލް ކޯޓުގެ އިސްޤާޟީ ޢަބްދުﷲ ޢަލީ، އަދުލު އިންސާފަށް އިތުބާރު ގެއްލޭފަދަ ގޮތަކަށް އަމަލުކޮށްފައިވާކަމަށް ތުހުމަތުކުރާ މައްސަލައެއް ބެލުމަށްފަހު ޖުޑީޝަލް ސާރވިސް ކޮމިޝަނުން ފިޔަވަޅު އަޅައިފިއެވެ.
ޖުޑީޝަލް ސާރވިސް ކޮމިޝަން (ޖޭއެސްސީ)އިން ބުނީ، ސިވިލް ކޯޓުން ބަލަމުންދާ މައްސަލައަކަށް ޙާޒިރުވުމަށް މީހަކަށް ޗިޓު ފޮނުވާފައިވަނިކޮށް އެމީހާއަށް މެޖިސްޓްރޭޓް ކޯޓަކުން ވެސް ޗިޓު ފޮނުވާފައިވާކަމަށާއި، އެހެންކަމުންސިވިލް ކޯޓުގެ އަޑުއެހުން ފަހުގެ ތާރީހަކަށް އޭނާގެ ފަރާތުން ފަސްކޮށްދިނުމަށް އެދުނުކަމަށެވެ. ނަމަވެސް އޭނާ އެފަދައިން އެދިފައިވަނިކޮށް ސިވިލް ކޯޓުގެ ގަޒިއްޔާ ޤާޟީ އަބްދުﷲ ބާތިލުކޮށްފައިވާ ކަމަށް ޖޭއެސްސީން ބުންޏެވެ.
އެ ޢަމަލުތަކަކީ ޢަދުލު އިންޞާފް ޤާއިމްކުރާ ދާއިރާގެ ހައިބަތާއި އިތުބާރު ގެއްލޭފަދަ ގޮތެއްގެ މަތިން އަދި ފަނޑިޔާރުގެ ވާޖިބު އަދާކުރުމުގައި ތަޢައްޞުބެއް އޮތްކަން ފެންނާންއޮތް، އަދި ފަނޑިޔާރުގެ ޢަދުލުވެރި ކަމާމެދު ސުވާލު އުފެދިދާ ގޮތުގެމަތިންކަން އިސްޤާޟީ ޢަބްދުﷲ ޢަލީގެ ބަހުންނާއި ލިޔެކިޔުންތަކުން މައްސަލައިގެ ތަޙުޤީޤަށް ސާބިތުވާކަމަށް ޖޭއެސްސީން ބުންޏެވެ.
އެހެންކަމުން ދިވެހިރާއްޖޭގެ ފަނޑިޔާރުންގެ ޤާނޫނު ޤާނޫނާއި، ފަނޑިޔާރުންގެ ސުލޫކީ މިންގަނޑާއި ޚިލާފަށް ކޮށްފައިވާ އަމަލަކަށް ވާތީ، ޖުޑީޝަލް ސަރވިސް ކޮމިޝަންގެ ޤާނޫނުގެ ދަށުން، އިސްޤާޟީ ޢަބްދުﷲ ޢަލީއަށް ނަޞޭޙަތް ދިނުމާއެކު ކޮމިޝަނުން ކަނޑައަޅާ ތަމްރީން ޕްރޮގްރާމެއް ފުރިހަމަ ކުރުމަށް އެންގުމުގެ ފިޔަވަޅު އެޅުމަށް ފެންނަ ކަމަށް އެކޮމިޝަނުގެ ބައްދަލުވުމުން ނިންމާފައިވާކަމަށްވެސް ޖޭއެސްސީން ބުންޏެވެ.
