ނޫސްވެރިޔާ އަހްމަދު ސާއިދު ކިޑްނީ ޓްރާންސްޕްލާންޓް ހެދުމަށް އަވަށްޓެރި ސްރިލަންކާއަށް ފުރައިފިއެވެ.

ސާއިދު ކިޑްނީ ބަދަލުކުރުމަށް ހަދާ އޮޕަރޭޝަނަށް އޭނާގެ ޑޯނަރާއެކު ލަންކާއަށް ފުރާފައިވަނީ އިއްޔެ މެންދުރު ފަހުއެވެ. ސާއިދު ކިޑްނީ ޓްރާންސްޕްލާންޓް ހެދުމަށް ފުރާފައި މިވަނީ އޭނާގެ ދެ ކިޑްނީ ފެއިލްވެ، އެވޭނުގައި ގާތްގަނޑަކަށް 4 އަހަރު ހޭދަކުރުމަށްފަހުއެވެ.

ސާއިދު އިއްޔެ ފުރަމުން ފޭސްބުކްގައި ހިއްސާ ކުރި މެސެޖެއްގައި ބުނެފައިވަނީ، މިދަނޑިވަޅުގައި، މާލީ ގޮތުން އެހީތެރިކަން ނުވެވުނު ކަމުގައިވީނަމަވެސް، އެންމެންގެ ހެޔޮ ދުޢާ އެދޭކަމަށެވެ. އަދި އުންމީދަކީ ކިޑްނީ ޓްރާންސްޕްލާންޓް ކުރުމަށްފަހު ގަދަވެ ސަލާމަތުން އެބުރި އައިސް އެންމެނާއި ބައްދަލުވެ އަލުން ޚިދުމަތް ކުރަން ފެށުން ކަމަށެވެ.

އެކުވެރިންނެވެ. އަޅުގަނޑާއި އަޅުގަނޑުގެ ޑޯނަރަށް ހެޔޮ ދުޢާ ކޮށްދޭށެވެ. މިކަމަށް މާލީ އެޙީތެރިކަމެއް ދެވެން ނެތަސް ހެޔޮ ދުއާއަކީ ވެސް ދެވޭ ވަރަށް ބޮޑު ހަދިޔާއެކެވެ. އަޅުގަނޑުގެ އުންމީދަކީ ކިޑްނީ ޓްރާންސްޕްލާންޓް ކުރުމަށްފަހު ގަދަވެ ސަލާމަތުން ތިޔަ އެކުވެރިންނާއި ބައްދަލުވުމެވެ. ކުރީގެ ދިރިއުޅުމަށް އެނބުރި ރުޖޫއަވުމެވެ. މިއަދު މި ފުރީ ތިޔަ އެކުވެރިންނާއި ވަރަށް ދުރަށްށެވެ. ހާލަތު މަޖުބޫރު ކުރީއެވެ. ވަކިވެލަން ތަގުދީރު އެދުނީއެވެ. ނަމަވެސް އަބަދުވެސް ތިޔަ އެކުވެރިންގެ ހަނދާންތައް އަޅުގަނޑާއިއެކު ވާނެއެވެ. އެންމެދެކެވެސް ވަރަށް ލޯބިވެއެވެ.

– ސާއިދުގެ މެސެޖުގައި ވެއެވެ.

ދެ ކިޑްނީ ފެއިލްވެ މެދުކެނޑުމެއްނެތި ޑައިލެސިސް ހަދަމުންގެންދާތާ ތިން އަހަރަށްވުރެ ގިނަދުވަސްވެފައިވާ ސާއިދު ބައްޔާ ހަނގުރާމަކުރުމަށް ދައްކަމުންގެންދާ ހިތްވަރަކީ ހަމަ ލާމަސީލު މިސާލެކެވެ. ގާތް ތިމާގެ މީހެއްގެ މާބޮޑު އެއްބާރުލުމެއް ނުލިބި އޭނާ 2 އަހަރާއި 7 މަސްދުވަހު މި ބައްޔާ ހަނގުރާމަ ކުރަމުން ގެންދަނީ ހަމަ އެކަނިމައި އެކަންޏެވެ. އެހީތެރިކަން ލިބެނީ ހަމަ އެކަނި ގާތް ރައްޓެހި ރަހުމަތްތެރިންގެއެވެ. އުންމީދާއި ހިތްވަރަކީ ހަމައެކަނި ދަރިފުޅެވެ. ސާއިދު މި ދަތި އުނދަގުލުން ސަލާމަތްވެ ހެޔޮސިއްޙަތަކަށް އެނބުރި އަންނަން ހިތްވަރާއިއެކު މަސައްކަތްކުރާ ހަމައެކަނި ސަބަބަކީވެސް ލޯބިވާ ދަރިފުޅެވެ.

މިދިޔަ އަހަރުގެ ކިޑްނީގެ ދުވަހާ ގުޅުވައިގެން ސޯޝަލް މީޑިއާއަށް ސާއިދު ދޫކޮށްލީ ވަރަށްވެސް މާނަފުން މެސެޖެކެވެ. އޭނާ އަމިއްލަ ނަފްސަށް ބުނެފައި އެވަނީ "އަދި ހިތްބަލިވެގެން ނުވޭ ރޯވަރެއް" ކަމަށެވެ. މިއަހަރުގެ މިދުވަހުގެ ޝިޢާރުކަމުގައި ވާ "ކިޑްނީ ބަލިތަކާއި އެކު ދުޅަހެޔޮ ދިރިއުޅުމެއް" މި ޝިޢާރާވެސް ގުޅުވައިގެން ސާއިދު ބުނެފައި އެވަނީ އޭނާއަށް އެންމެ ބޮޑު އަޅާލުމާއި އޯގާތެރިކަމެއް ދޭން ޖެހޭ ފަރާތްތަކުން އެ އެއްބާރުލުން އޭނާ އަށް ނުލިބުނު ނަމަވެސް އެކަމާ ހިތްބަލިވެ ރޯން ނޯވެ، އޭނާއަށް މިބަލިން ޝިފާލިބޭނެ ހުރިހާ މަސައްކަތްތަކެއް އޭނާ ކުރާނެވާހަކައެވެ.

ސާއިދަކީ މިހާރުވެސް ދައުލަތުގެ މީޑިޔާ ޕީއެސްއެމްގެ މުހިންމު ސްޓާފެކެވެ. ކޯވިޑާއި ގުޅިގެން ސާއިދު މަސައްކަތް ކުރަން ޖެހެނީ ގޭގައެވެ. ގޭގައި ހުރެގެންވެސް ސާއިދު ޚަބަރު ހެދުމުގެ މަސައްކަތް ކުރެއެވެ. އޭނާއާއި އެކު އޮފީހުގައި މަސައްކަތްކުރާ މުވައްޒިފަކު ކަމުގައިވާ ޕީއެސްއެމްގެ އެޑިޓަރު އަހުމަދު ޖަދުވާން ބުނީ ސާއިދަކީ މަސައްކަތުގައިވެސް އޮފީހުގައި ތިބޭ އެހެން މުވައްޒިފުންނެކޭ އެއްގޮތަށް އެއްވެސް އުޒުރެއް ބަހަނާއެއްނެތި މަސައްކަތް ކުރާ މުވައްޒިފެއްކަމަށެވެ.

ނަމަވެސް މިހާރު ހާލަތު ހުރި ގޮތުންނާއި، ކޮންމެ ދެ ދުވަހަކުން އެއްދުވަހު ޑައިލެސިސް ހަދަން ޖެހުމުން ސާއިދަށް އޮފީހަށް 100 ޕަސެންޓް ނުދެވުނު ނަމަވެސް އޮފީހަށް އޭނާގެ ފަރާތުން އަބަދުވެސް އެއްބާރުލުން ލިބޭކަމަށެވެ.

ސާއިދުގެ ހިތްދަތި ދިރިއުޅުމުގެ ބަނަ ދުވަސްތަކުގައި އޭނާއަކީ ވަރަށް ގިނަ ގޮންޖެހުންތަކާއި ކުރިމަތިވެފައިވާ ޒުވާނެކެވެ. މާޔޫސްވާ އެތައް އެތައް ކަމެއް ދިމާވެ އެކަންކަމާއި ހިތްވަރާއިއެކު ކުރިމަތިލައި ވަކި އަމާޒެއްގައި މަސައްކަތް ކުރާ ޒުވާނެކެވެ. ސާއިދު އެދެނީ އޭނާ ދެކެމުންދާ ހިތްދަތި ދުވަސްތަކާއި ވަގުުތުތައް އެހެން މީހަކަށް ކުރިމަތި ނުވުމެވެ. ޚަބަރު އޮންލައިނުންވެސް އެދެނީ ސާއިދުއަށް ހެޔޮގޮތް މިންވަރު ކުރުމެވެ.