ސްޕެނިޝް ލީގުގައި ރޭ ރަޔޯ ވަޔެކާނޯ އަތުން 1-0 ވަރުގަދަ ބާސެލޯނާ ބަލިވެއްޖެއެވެ.
ބާސެލޯނާ ރޭގެ މެޗުން ބަލިވުމުން ރެއާލް މެޑްރިޑް މި ވަނީ ލީގު ތަށްޓާ ފިޔަވަޅަކާ ކައިރިއަށް ޖެހިލައިފައެވެ. ރެއާލް އެއް ވަނައިގައި އޮތީ 15 ޕޮއިންޓުގެ ލީޑަކާ އެކުއެވެ. ރެއާލަށް 33 މެޗުން 78 ޕޮއިންޓް ލިިބިފައިވާއިރު، ބާސެލޯނާ އަށް 33 މެޗުން ވަނީ 63 ޕޮއިންޓް ލިބިފައެވެ. ޗެމްޕިއަންކަން ހޯދަން ރެއާލަށް ބޭނުންވަނީ އެންމެ ޕޮއިންޓެކެވެ.
ރަޔޯ އިން ރޭގެ މެޗުގައި ޖެހި ހަމައެކަނި ގޯލު ކާމިޔާބުކުރީ ހަ ވަނަ މިނިޓްގައެވެ. ރަޔޯގެ އިސީ ޕިއާޒޯން ތަނަވަސްކޮށްދިން ފުރުސަތަކުން މި ގޯލު ޖެހީ އަލްވާރޯ ގާސިއާއެވެ. މިއީ ބާސެލޯނާ ތާރީހުގައި އެ ޓީމު އަމިއްލަ ދަނޑުގައި ޖެހިޖެހިގެން ތިން މެޗުން ބަލިވި ދެ ވަނަ ފަހަރެވެ. މީގެ ކުރިން 1998 ގައި ބާސެލޯނާގެ ކޯޗަކަށް ލުއީ ވެން ހާލް ހުރިއިރު، ވެސް އެ ޓީމު ވަނީ ޖެހިޖެހިގެން ތިން މެޗުން އަމިއްލަ ދަނޑުގައި ބަލިވެފައެވެ.
މި ފަހަރު ބާސެލޯނާގެ ކޯޗަކަށް ހުރި ޒަވީ ހެނާންޑޭޒްގެ އިރުޝާދުގެ ދަށުން ބާސެލޯނާ މި ވަނީ ޔޫރޮޕާ ލީގުގެ ކުއާޓާ ފައިނަލުގައި އަމިއްލަ ދަނޑުގައި ޖަރުމަނުގެ އެއިންޓްރަކްޓް ފްރޭންކްފާޓް އަތުންނާއި، ސްޕެނިޝް ލީގުގައި އެންމެ ފަހުން އަމިއްލަ ދަނޑުގައި ކުޅުނު ދެ މެޗުން ކަޑިޒް އާއި ރަޔޯ އަތުން ބަލިވެފައެވެ.
