އިންޑިއާ އައުޓް ބެނާ ނެގުމަށް ޣައިރު ޤާނޫނީ އަމުރު ނެރުނު ފަނޑިޔާރާއިމެދު އަޅަންޖެހޭ ފިޔަވަޅު ނާޅައި، ޖޭއެސްސީން ފިޔަވަޅު އަޅަނީ މިކަމަށް ހައްގުބަސް ބުނި މީހާއަށް ކަމުގައި ޕީޕީއެމްގެ ނައިބް ރައީސް އަހުމަދު ޝިޔާމް ވިދާޅުވެއްޖެއެވެ.
ޖޭއެސްސީން މިމައްސަލަ ހުށަހެޅީ ކުރީގެ ރައީސް ޔާމީންގެ ގެކޮޅު އަދި ޕީޕީއެމް އޮފީހުގައި ނަގާފައި ހުރި "އިންޑިއާ އައުޓް"ގެ ބޮޑު ބެނާ ނެގުމަށް ފުލުހުން އެ ދެ ގެއަށް ވަނުމުގެ ހުއްދައާއެކު ކޯޓު އަމުރު ނެރުއްވި ފަނޑިޔާރަށް އިންޒާރު ދިން މައްސަލަ ބަލައިދިނުމަށެވެ.
އައްބާސް ބުނެފައިވަނީ އެއަމުރު ނެރެދިން ގާޒީ މަތިން ހަނދާން ނެތިދާނެތީ ހަނދާނުގައި ބެހެއްޓުމަށް ޓުއިޓް ކޮށްލީ ކަމަށެވެ. "ވަރަށް ރަގަޅަށް ވާނެ ބަލާ ފާސްކުރަނީ. މަޖީދީމަގުގަ ހުރިހާ ގައްދާރުން ވާޖަހާ ދަމަންވާނެ." އައްބާސް ވިދާޅުވިއެވެ.
އައްބާސްއަށް ފިޔަވަޅު އަޅަން ޖޭއެސްސީން ފުލުހުންނަށް ހުށަހެޅުމުން ޝިޔާމް ވިދާޅުވީ ޖޭއެސްސީން މައްސަލަ ބަލަންވީ ޣައިރު ޤާނޫނީ އަމުރު ނެރުއްވި ފަނޑިޔާރު މަނިކުފާނުގެ މައްސަލަ ކަމަށެވެ. އެކަން ނުކޮށް ޖޭއެސްސީއިން މި އެދެނީ "ޣައްދާދު" މަނިކުފާނު ކަންކުރެއްވި ގޮތް ގޯހޭ ވިދާޅުވި ފަރާތުގެ މައްސަ ބަލަން ކަމަށް ޝިޔާމް ވިދާޅުވިއެވެ.
ޣައްދާރުންގެ ވެރިކަން ދަމަހައްޓަން ކުރާ ޣައިރު ޤާނޫނީ އަމުރުތައް ތަންފީޒު ކުރަން ހުކުމް ނެރުއްވި ފަނޑިޔާރު މަނިކުފާނުގެ މައްސަލަ ޖޭއެސްސީން ބައްލަވަންވީމާ، އެކަން ނުކޮށް ޖޭއެސްސީއިން މި އެދެނީ "ޣައްދާދު" މަނިކުފާނު ކަންކުރެއްވި ގޮތް ގޯހޭ ވިދާޅުވި ފަރާތުގެ މައްސަ ބަލަން.
– ޝިޔާމް ވިދާޅުވިއެވެ.
"އިންޑިއާ އައުޓް" ހަރަކާތުގެ ތެރެއިން މާލޭގެ ގޭގޭގައި ދަމާފައިވާ ބެނާތައް ނަގަން ކޯޓް އަމުރު ދީފައިވަނީ ފަތިސް ނަމާދު ގަނޑީގައިކަން ކޯޓު އަމުރުން ވަނީ ހާމަވެފައެވެ. ކޯޓު އަމުރުގައި ވާގޮތުން އަމުރު ދީފައިވަނީ ފަތިހު 4:50 ގައެވެ. ފަތިސް ނަމާދަށް ބަންގި ގޮވާ ގަޑިއަކީ 4:45 އެކެވެ. ކްރިމިނަލް ކޯޓުން ފަތިހު ނެރުނު އަމުރުގައި ސޮއިކޮށްފައިވަނީ ގާޟީ މުހައްމަދު މިސްބާހު އެވެ.
އިންޑިއާ އައުޓް ލިޔެފައިވާ ބެނާ ނެގި ގެތަކުގެ ތެރޭގައި އިދިކޮޅު ޕީޕީއެމްގެ ރައީސް ޔާމީން ޢަބްދުލްޤައްޔޫމްގެ ގެކޮޅު ހ.ދޫވެހީގައި ދަމާފައިހުރި 50 އަކަށް ފޫޓްގެ ބެނާވެސް ފުލުހުން ވަނީ ނަގާފައެވެ.
