ހުޅުމާލޭގައި ހިންގާ ހާންޖީ ރެސްޓޯރެންޓްގެ ތެރޭގައި ވަޅިން ހަމަލާދީ މަރާލި ބަންގްލަދޭޝް ވެއިޓަރުގެ ހަށިގަނޑު، އޭނާގެ ޤައުމަށް ފޮނުވައިފިއެވެ.
މިމަހުގެ 16ވަނަ ދުވަހު ހުޅުމާލޭގައި ހާންޖީ ރެސްޓޯރެންޓުގައި މަރާލި މީހާއަށް ހަމަލާ ދީފައިވަނީ އެ ރެސްޓޯރެންޓްގައި ކައްކާއެއްގެ ގޮތުގައި މަސައްކަތްކުރާ، ޕާކިސްތާނު މީހެކެވެ. މި މީހާއަކީ އުމުރުން 26 އަހަރުގެ މުހައްމަދު އާބިދުއެވެ. ހަމަލާ ދިނުމަށްފަހު ފިލައިގެން އުޅުނު މިމީހާ ހައްޔަރުކޮށްފައިވަނީ މިމަހުގެ 17ވަނަ ދުވަހު ހުޅުމާލޭ ފޭސްދޭއްގެ ބީޗުންނެވެ.
ފުލުހުންގެ މީޑިއާ އޮފިޝަލަކު ވިދާޅުވީ މަރާލި ބިދޭސީ މީހާ، އޭނާގެ ޤައުމަށް ފޮނުވާފައި ވަނީ ރޭގެ ވަގުތެއްގައި ކަމަށެވެ. އަދި ރެސްޓޯރެންޓްގައި ހިނގި މިހާދިސާ އިތުރަށް ތަހުގީގު ކުރަމުންދާ ކަމަށްވެސް ފުލުހުންގެ މީޑިއާ އޮފިޝަލް ވިދާޅުވިއެވެ.
ރެސްޓޯރަންޓް ތެރޭގައި ހިނގި ދެ ބަސްވުމެއްގެ ޕާކިސްތާނު ކައްކާ ބަންގްލަދޭޝް މީހާ ހަށިގަނޑުގެ ތިން ތަނަކަށް ވަޅިން ހަމަލާދީފައިވާކަމަށް މަންޒަރު ދުށް ބައެއް މީހުން ވަނީ ބުނެފައެވެ. އަދި މި ދެ މީހުންގެ މެދުގައި މީގެކުރިންވެސް ބައެއް ދެބަސްވުންތައް ހިނގާފައިވާކަމަށް އެތަނުގައި މަސައްކަތް ކުރާ ބައެއް މީހުން ވަނީ ބުނެފައެވެ.
ހައްޔަރު ކުރި މީހާގެ ބަންދާއިމެދު ގޮތެއް ނިންމުމަށް ކޯޓަށް ހާޒިރު ކުރުމުން އޭނާގެ ބަންދަށް ވަނީ 15 ދުވަސް ދީފައެވެ.
