ސްޕެނިޝް ލީގުގައި މިރޭ ރެއާލް ސޮސިއެޑާޑް ދަނޑުގައި 1-0 އިން މޮޅުވެ، ބާސެލޯނާ އަލުން ލީގުގެ ދެ ވަނަ އަށް ޖެހިލައިފިއެވެ.
ސޮސައިޑާޑް ދަނޑުގައި ކުޅުނު މި މެޗު ފެށިގެން ބޯޅަ ކޮންޓްރޯލްކޮށް ރަނގަޅަށް ކުޅެމުންދިޔައީ ބާސާއިންނެވެ. އެގޮތުން އެޓީމުން ވަނީ ސޮސައިޑާޑްގެ ހާފަށް ބާރުބޮޑުކޮށް، ހަމަލާތައް އުފެއްދުމަށް މަސައްކަތް ކޮށްފައެވެ.
ބާސާއިން ފުލުފުލުގައި ކުރިަމުންދިޔަ އެޓޭކްތަކަށްފަހު، އެޓީމުން މެޗުގެ ލީޑު ނެގީ 11 ވަނަ މިނެޓުގައެވެ. މި ލަނޑު ފެރާން ޓޮރޭޒްގެ އެހީތެރިކަމާއެކު ބާސާއަށް ކާމިޔާބުކޮށްދިނީ އޮބާމަޔަންއެވެ. މި ލަނޑަށްފަހުވެސް ބާސާއަށް ލީޑު ފުޅާކުރަން ގިނަ ފުރުސަތުތައް ލިބިފައިވާއިރު، އެ ފުރުސަތަކުގެ ބޭނުން އެޓީމަށް އެންމެ އެދެވޭ ގޮތެއްގައި ހިފިފައެއް ނުވެއެވެ. އަދި މުޅި މެޗުގައިވެސް ސޮސައިޑާޑްގެ ޑިފެންސް ފެނިގެންދިޔައީ ވަރުގަދަކޮށެވެ.
ލީގުގެ އެއް ވަނައިގައި ރެއާލް މެޑްރިޑް އޮތީ 33 މެޗުން 78 ޕޮއިންޓާ އެކުއެވެ. ރެއާލުން ޗެމްޕިއަންކަން ކަށަވަރުކުރަން ބޭނުންވަނީ ހަތަރު ޕޮއިންޓެވެ. ދެ ވަނައިގައި ބާސެލޯނާ އޮތީ 32 މެޗުން 63 ޕޮއިންޓް ހޯދައިގެންނެވެ. ސެވިއްޔާ އަށް 33 މެޗުން 63 ޕޮއިންޓް ލިބިފައިވާއިރު، އެތުލެޓިކޯ ހަތަރު ވަނައިގައި އޮތީ 33 މެޗުން 61 ޕޮއިންޓާ އެކުއެވެ.
