އެމްޑީޕީގެ ޗެއަރޕާސަންކަމަށް ވާދަކުރައްވާ އިކޮނޮމިކް މިނިސްޓަރ ފައްޔާޒް އިސްމާއީލަކީ މުޅި ސަރުކާރުކަމަށް ދައްކައިގެން ކެމްޕެއިންކުރަނީ، އެމްޑީޕީގެ މެންބަރުން ނުދަންނަ ބޭފުޅަކަށްވާތީކަމަށް މާލެ ސިޓިގެ މޭޔަރު އަދި އެމްޑީޕީ މާލެ ދާއިރާގެ ރައީސް ސިފާ މުޙައްމަދު ވިދާޅުވެއްޖެއެވެ. އެމްޑީޕީ ޗެއަރޕާސަން އިންތިޚާބުގައި ސިފާ ތާޢީދުކުރައްވަނީ މާފަންނު އުތުރު ދާއިރާގެ މެންބަރު އިމްތިޔާޒް ފަހުމީއަށެވެ.

ސިފާ މިފަދައިން ވިދާޅުވީ، އައްޑޫ ސިޓީ ނުހިންގޭކަމަށް ވިދާޅުވެ ހުޅުދޫ ދާއިރާގެ މެންބަރު އިލްޔާސް ލަބީބު ފައްޔާޒަށް ފާޑުވިދާޅުވުމާއި ގުޅިގެންނެވެ. އެ ވާހަކަތަކަށް ތަޢީދުކުރައްވާ ސިފާ ވިދާޅުވީފައްޔާޒްއަކީ މުޅި ސަރުކާރުކަމަށް ދައްކައިގެން ހިންގާ ކެމްޕެއިން ހިންގަނީ އެމަނިކުފާނަކީ އެމްޑީޕީ މީހުން ނުދަންނަ މީހަކަށް ވާތީކަމަށެވެ.

މްޑީޕީ ޗެއާޕާސަންގެ އިންތިގެ ކެމްޕެއިންގައި ރޭ އައްޑޫ ސިޓީ ރައީސް ނަޝީދުގެ އޮފީސް ކުރިމަތީގައި ބޭއްވި ތަރީހުގައި އައްޑޫ ރައްޔިތުންނާއި ވާހަކަ ދައްކަވަމުން އިލްޔާސް ވިދާޅުވީ، ސަރުކާރުން އައްޑޫ ސިޓީގެ ރައްޔިތުންނަށް ވެފައިވާ އެއްވެސް ވައުދެއް މިހާތަނަށް ފުއްދިފައި ނުވާކަމަށެވެ.

އިލްޔާސް ވަނީ ވަކިވަކިން އައްޑޫ ސިޓީގެ ރައްޔިތުންގެ ހުރި ގިނަ ކަންބޮޑުވުންތަކުގެ ވާހަކަ ހިއްސާކޮށްފައެވެ. އައްޑޫ ސިޓީގައި ހުވަދޫއާއުި ދެމެދު ސީޕްލެއިން ދަތުރުތައް ފެށުމަށް އަވީގައި ބައިތިއްބައިގެން ދެފަހަރެއްގެ މަތީން ކުރި ސޮއިތަކަށް ވީ ކިހިނެތްތޯވެސް އިލްޔާސް ވަނީ ސުވާލުކޮށްފައެވެ. ހަމަ މިއާއިއެކު އައްޑޫގައި ހެދި މަސްފެކްޓީ ހިންގާނެ ގޮތެއް ނެތި 4 އަހަރު ވާއިރުވެސް މިކަމާއިވެސް އެއްވެސް އަޅާލުމެއް ނެތްކަމަށެވެ.

އިލްޔާސް ވިދާޅުވީ އައްޑޫގައި މިސަރުކާރު އައި ފަހުން އުފެދުނު ވަޒީފާތަކާއި، ކުރެވުނު ކަންކަމުގެ ވާހަކަ ދައްކަން ސަރުކާރުގެ ވަޒީރުން ލަދުގަންނަން ޖެހޭނެ ކަމަށެވެ. ޚާއްސަކޮށް އިޤްތިޞާދީ ވަޒީރަކީ މިކަންކަމުގެ ޒިންމާ އުފުލަންޖެހޭ ބޭފުޅާއަށްވާއިރު އައްޑޫގެ އެއްވެސް މަސައްކަތެއް ނުހިނގާ އޮތް އޮތުމަކީ އެވަޒީރުގެ ފައިލިއާކަމަށް އިލްޔާސް ވިދާޅުވިއެވެ.

ދެން ބައްލަވާ ސީޕްލެއިންގެ ކަންކަން. އަޅުގަނޑުމެން ދެފަހަރު ގެންގޮސް އެތާ އަވީގައި ބައިތިއްބާފަ އިފްތިތާހުކޮށްފި. ހުވަދޫ ރިސޯޓްތަކަށް ގެސްޓުން ގެންދަން. ކޮބައިތޯ އެކަން ކިހިނެތްވީ؟ އެއްކަމެއްވެސް ނުހިންގިގެން މިއުޅެނީ. އައްޑޫ ރައްޔިތުންގެ ކަންބޮޑުވުންތައް އެބަހުރި. ދެން ބައްލަވާ އައްޑޫގައި މިތާގަ މަސްފެކްޓްރީއެއް ހަދާފަ، 4 ވަނަ އަހަރަށް ދާއިރު މިއުޅެނީ މަސްކޮޅު ނުކުރިގެން ކަނޑައަށް އުކަމުން ދަނީ.

– އިލްޔާސް ވިދާޅުވިއެވެ.

އެމްޑީޕީގެ ޗެއާޕާސަން އިންތިޚާބުގައި އިންތިގެ ޓީމުން ދަނީ ސަރުކާރަށް ވަރަށް ބޮޑަށް ފާޑުކިޔައި، ސަރުކާރުން ތަރައްޤީއަށް މަސައްކަތް ނުކުރާކަމަށް ބުނަމުންނެވެ. ޚާއްސަކޮށް ވެފައިވާ ވައުދުތައް ނުފުއްދި 4 އަހަރު ވެފައިވާއިރު، ދެން އިތުރަށް ވެރިކަން ލިބޭނެ ވަރުގެ ތާއީދެއް މިސަރުކާރަށް ނެތްކަމަށް ރައީސް ނަޝީދުވެސް ވަނީ ވިދާޅުވެފައެވެ.