އެމްޑީޕީގެ ޗެއާޕާސަންގެ މަޤާމަށް ވާދަކުރާ އިމްތިޔާޒު ފަހުމީގެ އައްޑޫ ސިޓީގެ ރަސްމީ ކެމްޕެއިން ޖަގަހަކީ އެމްޑީޕީގެ ރައީސް މުހައްމަދު ނަޝީދުގެ އޮފީސް ކަމުގައި ވެއްޖެއެވެ.
ވާދަވެރިކަން ބޮޑުވެފައިވާ އެމްޑީޕީގެ ޗެއާޕާސަންގެ އިންތިޚާބުގައި ރައީސް ނަޝީދަކީ އެމްޑީޕީގެ ރައީސަށް ވުމުން ފާޅުގައި އެއްވެސް ކެނޑިޑޭޓަކަށް ތާއީދު ކުރާކަމުގެ ވާހަކައެއް ވިދާޅެއް ނުވެއެވެ. ނަމަވެސް އަމަލާއި ބަހުން ގެންދަވަނީ އިންތިއަށް ފުރިހަމަ ތާއީދު އޮތްކަން ދައްކަމުންނެވެ.
އިމްތިޔާޒް ފަހުމީގެ އައްޑޫ ސިޓީ ހިތަދޫ ކެމްޕެއިން އިން އިންތިޒާމްކުރި ހާއްސަ ތަރާވީހެއް ރޭވަނީ އައްޑޫ ސިޓީގައި ބާއްވާފައެވެ. އެ ތަރާވީސް އޮތީ އައްޑޫ ސިޓީގައި ހުންނަ ރައީސް މުހައްމަދު ނަޝީދުގެ އޮފީހުގައެވެ. ގިނަ ބަޔަކު ބައިވެރިވި މި ހަރަކާތުގައި ނަޝީދުގެ އޮފީސް ކުރިމަތީ ކެމްޕެއިން ޓީމުގެ އިސް ބޭފުޅުން ވާހަކަ ދެއްކެވުން އޮތެވެ.
Addu City ???????? #InthiAaEku pic.twitter.com/ShQsk22S47
— Luke (@Lucasjalyl) April 19, 2022
މިއިވެންޓުގައި މަޖިލިސް ނައިބް ރައީސް އީވާއާއި، އެމްޑީޕީގެ ނައިބް ރައީސް މުހައްމަދު ޝީފާޒުއާއި، އައްޑޫ ސިޓީގެ ބައެއް މަޖިލިސް މެމްބަރުން ވަނީ ބައިވެރިވެފައެވެ. މި އިވެންޓުގައި އިންތި ބައިވެރި ނުވެއެވެ. އިންތި ކެމްޕެއިންގައި މިވަގުވީ ވ.އަތޮޅުގައެވެ.
އެމްޑީޕީގެ އެތެރޭގެ އިންތިޚާބެއްގައި ޕާޓީގެ ރައީސް ވަކި ކެނޑިޑޭޓަކަށް ތާއީދު އޮތްކަން ދެއްކުމަކީ، އިންތިޚާބު ވަކި ގޮތަކަށް ގެންދިއުމަށް ޕާޓީގެ ރައީސް ބޭނުންވާ ކަމުގެ ފުރިހަމަ ނިޝާނެއްކަމަށް ފައްޔާޟުގެ ޓީމުން ދަނީ ބުނަމުންނެވެ. ޕާޓީގެ ނުފޫޒާއި ބާރުގެ ބޭނުންކޮށް އިންތިގެ ޓީމުން ކެމްޕެއިން ކުރާކަމުގެ ތުހުމަތު ކުރަމުންދާއިރު، ފައްޔާޟުގެ ޓީމުން ސަރުކާރުގެ ނުފޫޒާއި ބާރުގައި ކެމްޕެއިން ކުރަމުންދާ ކަމުގެ ތުހުމަތު އިންތިގެ ޓީމުން ދަނީ ކުރަމުންނެވެ.
އިންތިޚާބު އަންނަ މަހުގެ 14 ވަނަ ދުވަހު ބާއްވާއިރު އެމްޑީޕީގެ އެތެރޭގައި އޮތް ބައިބައިވުން ބޮޑުވުމުން ދެން ޕާޓީ އެއްކުރުމަކީ ފަސޭހަ ކަމެއްކަމަށް ނުވާނެކަމުގައި އެމްޑީޕީގެ އިސް ބޭފުޅުންވެސް ދަނީ ވިދާޅުވަމުންނެވެ.
