ރައީސުލްޖުމްހޫރިއްޔާ އިބުރާހިމް މުހައްމަދު ސާލިހުގެ ރިޔާސީ އެންމެ މުހިންމު އެއް ވައުދަކީ ރާއްޖޭގެ ހުރިހާ ރަށެއްގައިވެސް ފެނާއި ނަރުދަމާގެ ނިޒާމް ގާއިމް ކުރުން ކަމަށާއި، އެހެންނަމަވެސް އަމިއްލަ ކުންފުނިތަކާއި ހަވާލު ކޮށްގެން، ގިނަ ރަށްރަށުގައި މިމަސައްކަތް އެކަށީގެންވާ ގޮތެއްގައި ކުރިޔަށް ނުދާކަމުގައި، ޓްރޭޑް ޔޫނިއަންގެ ނައިބް ރައީސް އަދި ކުރީގެ ގްރޭޓަރ މާލޭ އިންޑަސްޓްރިއަލް ޒޯން ލިމިޓެޑް ކުންފުނީގެ ބޯޑުގެ ޗެއަރމަން ސައުދުﷲ އަހުމަދު ވިދާޅުވެއްޖެއެވެ.
ސައުދު މިއަދު ކުރެއްވި ޓުވީޓެއްގައި ވިދާޅުވެފައިވަނީ، ގިނަ ރަށްރަށުގައި ކުރިޔަށް ގެންދާ ފެނާއި ނަރުދަމާގެ މަޝްރޫޢުތައް ހަވާލުކުރެވިފައިވާ ކުންފުނިތަކުން ވަނީ މަސައްކަތްތައް ސަބް ކޮންޓްރެކްޓަށް ދޫކޮށްލާފައި ކަމަށާއި، މިއީ ހައްލު ހޯދަންޖެހިފައިވާ މައްސަލައެއް ކަމުގައެވެ. ސައުދު އިތުރަށް ވިދާޅުވި ގޮތުގައި، ތަރައްގީގެ މިމަޝްރޫއުތައް ދެން ކުރިޔަށް ގެންދިއުމުގައި، އެމްޑަބުލިއުއެސްސީއާއި ހަވާލުކޮށްގެން ކުރިޔަށް ދިއުން ނޫން އެހެންގޮތެއް މިހާރު ނެތްކަމުގައެވެ.
Raees @ibusolih riyaasee enme bodu eh vaudhu kamah vaa fenaaj narudhamaa ge masahkah amihla kunfunithakaai havaalu kurevunu namaves gin rah rashuga masahkah ehves varakah kuriyah nudhey.havaalu vi kunfuni thakun vanee sub ah dhookohfa.mikamuga avas hallu hoadhan jehey.
— Saudulla Ahmed (@saudullaahmed1) April 19, 2022
ސައުދު ވިދާޅުވި ގޮތުގައި، ރައީސް އިބުރާހިމް މުހައްމަދު ސާލިހުގެ ރިޔާސީ ވައުދުތައް ފުއްދުމަށްޓަކާ ބޮޑެތި ޒިންމާތަކާއި ހަވާލުވެގެން ތިއްބެވި އިސް ބައެއް މީހުންތިބީ ދެލޯ މަރާލައިގެ ދައުރު ނިމެންދެން މުސާރަ ނަގަނަގާ ކަމަށާއި، އަދި މިއީ ލަދުވެތި ކަމެއް ކަމުގައެވެ. ސައުދު ވިދާޅުވެފައި ވަނީ، ސިޔާސީ އިސް މަގާމްތަކުގައި ތިބެންވާނީ ސަރުކާރަށް އިޚްލާސްތެރި މީހުންކަމުގައެވެ.
ރާއްޖޭގެ ހުރިހާ ރަށެއްގައި، ދައުރު ނިމުމުގެ ކުރިން ފެނާއި ނަރުދަމާގެ ނިޒާމް ގާއިމްކޮށް ނިންމުމަކީ ރައީސް އިބުރާހިމް މުހައްމަދު ސާލިހުގެ ރިޔާސީ ވައުދެކެވެ. އެހެންނަމަވެސް، ސަރުކާރުގެ ސިޔާސީ އިސް މަގާމްތަކުގައި ތިއްބެވި ބައެއް ބޭފުޅުން ރައީސް ސާލިހުގެ ވައުދުތައް ފުއްދުމުގައި އެކަށީގެންވާ ގޮތެއްގައި މަސައްކަތް ނުކުރާކަމުގެ ޝަކުވާތައް ފަހަކަށް އައިސްވަނީ އިތުރުވެގެން ގޮސްފައެވެ.
އަދި ސިޔާސީ އިސް މަގާމްތަކުގައި ތިއްބެވި ބައެއް ފަރާތްތަކުން ފަހަކަށް އައިސް ސަރުކާރުގެ ސިޔާސަތުތަކަށް ފާޑުކިޔަމުންދާ ކަންވެސް ބައެއް ފަރާތްތަކުން ފާހަގަ ކުރެއެވެ.
