ވެރިކަން ކުރާ މައި ޕާޓީ އެމްޑީޕީގެ ޗެއާޕާސަން އިންތިޚާބުގައި ތޮއްޑޫ ދާއިރާގެ މެމްބަރު ހަސަން ޝިޔާން، ރައްޔިތުންގެ މަޖިލީހުގެ މީދޫ ދާއިރާގެ މެމްބަރު ރޮޒައިނާ އާދަމްއަށް ނިސްބަތްކޮށް ޒިނޭ ކުރުމުގެ ތުހުމަތު ކުރުމާއިއެކު ރޮޒައިނާ އާއި އޭނާގެ ފިރިކަލުން ކިނބިދޫ ދާއިރާގެ މެމްބަރު ނާޝިޒް މެންބަރު ޝިޔާނަށް ބަނގުރާ ބޯކަމުގެ ތުހުމަތު ކޮށްފިއެވެ.
އަންނަ މަހުގެ 14 ވަނަ ދުވަހު އިންތިޚާބު ބާއްވާއިރު، އިންތިޚާބުގައި ވާދަކުރާ ދެ ކެނޑިޑޭޓުންނާއި ތައީދު ކުރާ މަޖިލިސް މެމްބަރުންގެ މެދުގައި އުފެދިފައިވާ ވާދަވެރިކަމަކީ މިއިންތިޚާބުގެ ފޯރި އެންމެ ބޮޑަށް ފެނިގެންދާ އެއް ކަމަށެވެ. ނަމަވެސް ދުލައި އައިހައި އެއްޗެއް ގޮވައި، ކެމްޕެއިންގައިވެސް ކިޔަން ނުޖެހޭ އެއްޗެހި ކިޔުމާއި، ކުރަންނުޖެހޭ އެތައް ކަމެއް އެމްޑީޕީގެ މި ކެމްޕެއިންގައި ދަނީ ފެންނަމުންނެވެ.
އެމްޑީޕީގެ ވަޓްސްއެޕް ގުރޫޕެއްގައި ޝިއާން ވިދާޅުވި ގޮތުގައި މިނާކުޑޭ ހެދި މަސްފެކްޓްރީއެއް އިނދަޖެހުނީ ރޮޒައިނާ ވަގު ފިރިހެނުން ގެންގުޅޭތީ، ރޮޒައިނާގެ ފިރިކަލުން ކިނބިދޫ ދާއިރާގެ މެމްބަރު ނާޝިޒްއަށް އެރަށުގައި ނުހުރެވިގެން މާލެ އަންނަން ޖެހިގެންކަމަށެވެ. ގިޓާ މިމޭރުމުން ވިދާޅުވީ ޝިއާން ހުންނެވީ ހަމަޔަކު ނޫން (މަސްތުވެގެން) ކަމަށް ރޮޒައިނާ ވިދާޅުވުމުންނެވެ. އަދި ޝިއާން ވަނީ އެގޮތަށް "ވަގު ފިރިހެނުން ގެންގުޅުން" އެއީ "ފުޅިއަށްވުރެ" މާ ނުރައްކާތެރި އެއްޗެއްކަމަށް ވިދާޅުވެފައެވެ. ފުޅި ކަމަށް އެ ވިދާޅުވަނީ ބަނގުރާފުޅި ކަމަށް ބެލެވެއެވެ.
އަޅެ މީނައަށް ރަނގަޅަށް އެނގޭ އެކައްޗެއްވެސް ނޯވެއޭ ދޯ. އަނގައެއް އޮތީތީ ތަޅުވަނީ.
– ރޮޒައިނާ ވިދާޅުވިއެވެ.
ރޮޒައިނާ ވިދާޅުވީ އޭނާ އާއި ގުޅޭ ގޮތުން ނާޝިޒް ދެއްކެވި ވާހަކަތައް ޤަބޫލު ކުރާނެ މީހަކު ރާއްޖޭގައި ނުހުންނާނެ ކަމަށާއި، އެއީ ޝިޔާން އަމިއްލައަށްވެސް ގަބޫލު ނުކުރާނެ ވާހަކަތަކެއް ކަމަށެވެ. ޝިޔާން އެބުނާ މަސް ފެކްޓަރީއަކީ މިނާ ކުޑޭ ހެދީ ތަނެއް ނޫން ކަމަށާއި އެއީ ތަސްމީން ހެދި ތަނެއް ކަމަށް ރޮޒައިނާ ވިދާޅުވިއެވެ.
ރޮޒައިނާ އާއި ޝިޔާނާއި ދެމެދު ބަދަލު ކުރެވެމުން ދިޔަ ބަހުގެ ހަމަލާތަކުގެ ތެރެއިން ރޮޒައިނާގެ ފިރިކަލުން ނާޝިޒް ވެސް ފަހުން ވެންނެވިއެވެ. ނާޝިޒް ވިދާޅުވީ އެއީ ފުކެއް ބޮޑުވަރު ކަމަށާއި މިނާކުޑޭ އާއި އަދި އެހެން މީހެއްގެ ވާހަކަ ވެސް ދައްކަން ނުޖެހޭ ކަމަށެވެ.
އެއަށްފަހު ނާޝިޒްވެސް ޝިޔާންގެ މައްޗަށް ބޮޑު ތުހުމަތެއް ކުރެއްވިއެވެ. ނާޝިޒް ވިދާޅުވީ "ގިޓާގެ އަނބިކަނބަލުން ވިއްކައިގެން ފުޅި ހިއްޕަވައިގެން ޓެރަސް މަތިންނާއި ސަފާރީތަކުން އުޅުއްވިއަސް ރޮޒޭ އެއްވެސް ކަމެއްގައި މީހެއް ކައިރިއަށް ދާކަށް ނުޖެހޭނެ. އަދި ނުވެސް ދާނެ" ކަމަށެވެ. ނާޝިޒްގެ މެސެޖަށް ފަހު ރޮޒައިނާ ވިދާޅުވީ އޭނާ އެހެން މީހުން ހޯދަން ޖެހޭވަރަށް ވުރެ ނާޝިޒް "މާ ގަދަ" ކަމަށެވެ. ނާޝިޒް އާއި ރޮޒައިނާގެ ކައިވެންޏަށް 30 އަހަރުވީ އިރުވެސް ނާޝިޒް މަތިން ފޫހި ނުވާކަމަށް ރޮޒައިނާ ވިދާޅުވިއެވެ.
އެމްޑީޕީގެ ކެމްޕެއިންގައި މިފަދަ ހުތުރު ވާހަކަތަކެއް ދެކެވުމުން ގިނަ ބަޔަކު ދަނީ އެމްޑީޕީއަށް ވަރަށް ބޮޑަށް ފާޑު ކިޔަމުންނެވެ. ޚާއްސަކޮށް މިފަދަ މާތް މައްސަރެއްގައި މީހުންގެ އަބުރު ކަރިލައި، އެއް ބޭފުޅަކު އަނެއް ބޭފުޅެއްގެ ބޮލުގައި ބޮޑެތި ތުހުމަތު އަޅުވާއިރު އެކަން ސާބިތުކޮށްދެވޭނެ ވަރުގެ ހެކި ހުރެގެން ނޫނީ އެފަދަ ވާހަ ނުދެއްކުމަށް އެމްޑީޕީގެ ގިނަ މެމްބަރުންވެސް ދަނީ ގޮވާލަމުންނެވެ.
