ބަޔާން މިއުނިކުން ޖެހިޖެހިގެން 10 ވަނަ ފަހަރަށް ޖަރުމަނު ލީގު ކާމިޔާބުކުރުމާ ފިޔަވަޅަކާ ގާތަށް ޖެހިލައިފިއެވެ.
ރޭ ލީގުގައި ރަށުން ބޭރުގައި އަރުމީނިއާ ބިލެފެލްޑާ ވާދަކުރި މެޗު 3-0 އިން ބެޔާން މިއުނިކް ވަނީ ކާމިޔާބުކޮށްފައެވެ. ބެޔާން އިން ރޭގެ މެޗުގައި ލީޑު ނެގީ 10 ވަނަ މިނިޓުގައި އަރުމީނިއާގެ ޖޭކޮބް ލާސެން އަތުން ބައިކޮޅަށް ވަން ލަނޑަކުންނެވެ. އަދި ފުރަތަމަ ހާފު ނިމުމުގެ ކުރިން ސާޖް ގުނަބްރީގެ ލަނޑަކުން ލީޑު ފުޅާ ކުރިއިރު، ތިންވަނަ ލަނޑު 84 ވަނަ މިނިޓުގައި ޖަހައިދިނީ ޖަމާލް މުސިއާލާއެވެ.
އަންނަ ހަފްތާގައި ޑޯޓްމަންޑާ ދެކޮޅަށް ކުޅޭ މެޗުން މޮޅުވެގެން ބަޔާން އަށް ލީގު ޗެމްޕިއަންކަން ކަށަވަރުކުރެވޭނެއެވެ. ލީގުގައި ބަޔާނަށް ބާކީ ނުކުޅެ އޮތީ ހަތަރު މެެޗެވެ. ޑޯޓްމަންޑް އަތުން މޮޅެއް ނުހޯދުނަސް ދެން އޮތް ތިން މެޗުގައި ނަތީޖާ ނެރެގެން ލީގު ޗެމްޕިއަންކަން ހޯދުމުގެ ފުރުސަތު ބަޔާނަށް އޮންނާނެއެވެ.
ލީގު އެއް ވަނައިގައި ބަޔާން އޮތީ 30 މެޗުން 72 ޕޮއިންޓާ އެކު އެވެ، ދެ ވަނައިގައި އޮތް ޑޯޓްމަންޑަށް ވަނީ 30 މެޗުން 63 ޕޮއިންޓް ލިބިފައެވެ. މިރޭ، ބަޔާ ލެވަކޫސަން 1-0 އިން ބަލިކުރި އާރްބީ ލައިޕްޒިގު ތިން ވަނައިގައި އޮތީ 30 މެޗުން 54 ޕޮއިންޓާ އެކުއެވެ. ހަތަރެއްގައި ލެވަކޫސަން އޮތީ 30 މެޗުން 52 ޕޮއިންޓާ އެކުއެވެ.
