މާތްވެގެންގާ އަލް އަގްސާ މިސްކިތްތެރެއަށް ވަދެގަނެ އެތައް ސަތޭކަބަޔަކު ހައްޔަރު ކުރިތާ ދެ ދުވަސްފަހުން، އަނެއްކާވެސް އިސްރާއީލު ފުލުހުން އަނެއްކާވެސް، ފަލަސްތީނު ރައްޔިތުން އަގުސާ މިސްކިތަށް ފަތިސް ނަމާދަށް ޖަމާވެފައި ވަނިކޮށް، މިސްކިތްތެރެއަށް ވަދެގަނެ، ހިންގި ހަމަނުޖެހުންތަކުގައި ފަލަސްތީނުގެ 17 މީހަކަށް އަނިޔާވެއްޖެއެވެ.

އިސްރާއީލު ސިފައިން ބުނެފައިވަނީ ދެވަނަ ފަހަރަށް މިސްކިތްތެރެއަށް ވަދެގެންފައިވަނީ، ފަލަސްތީނު ރައްޔިތުން މިސްކިތްތެރޭގައި ގަލާއި އެފަދަ ތަކެތި ޖަމާކޮށް އެސަރަހައްދަށް މީހުންނަށް ޖަމާ ނުވެވޭގޮތަށް މަގުހުރަސްތައް ބަހައްޓާ ސަރަހައްދު ބަންދުކޮށްފައިވާތީ ޔަހޫދީންނަށް ސަރަހައްދަށް ވަދެވޭނެ މަގު ތަނަވަސް ކުރުމަށް ކަމުގައެވެ.

އިސްރާއީލުގެ ފުލުހުންވަނީ މިސްކިތުގެ ބޭރުގައި އެއްވެފައިތިބި ފަލަސްތީނުގެ ރައްޔިތުން ސަރަހައްދުން ދުރަށް ޖައްސާ، ބާކީތިބި މީހުން މިސްކިތްތެރެއަށް ޖަމާ ކޮށްފައެވެ.

ފަލަސްތީނުގެ މެޑިކަން ވޯކަރުން ބުނެފައިވަނީ، އިސްރާއީލު ސިފައިން އަގްސާ މިސްކިތްތެރެއަށް ވަދެ ހިންގި ހަމަނުޖެހުންތަކުގައި ފަލަސްތީނުގެ 17 މީހަކަށް އަނިޔާ ވެފައިވާ ކަމުގައެވެ. ފަލަސްތީނުގެ ރެޑް ކްރޮސްއިން ހާމް ކޮށްފައިވާ ގޮތުގައި، އިސްރާއީލު ސިފައިން ރަބަރު ވަޒަން ބޭނުން ކުރުމުގެ ސަބަބުން ލިބުނު އަނިޔާތަކަށް ފަރުވާ ދިނުމަށް 3 މީހަކު ހޮސްޕިޓަލުގައި އެޑްމިޓް ކުރަން ޖެހިފައި ވެއެވެ. ރެޑް ކްރޮސްއިން ބުނެފައިވަނީ، އެމީހުންނަށް މިސްކިތް ހިމެނޭ ސަރަހައްދަށް ވަނުމުގެ ފުރުސަތު އިސްރާއީލު ފުލުހުން ދީފައި ނުވާކަމުގައެވެ. އެހެންނަމަވެސް، ބާބް އަލް-އަސްބާބު ކައިރީ ތިބެގެން އަނިޔަވި މީހުންނަށް ފަރުވާ ދީފައިވާ ކަމުގައެވެ.

އިސްރާއީލު ފުލުހުން ބުނެފައިވަނީ، މިސްކިތަށް ޔަހޫދީން ގޮވައިގެން ދަތުރު ކުރަމުންދިޔަ ދެބަހެއްގެ ބިއްލޫރި ތަޅާލުމުގެ ސަބަބުން 9 މީހަކު ހައްޔަރު ކޮށްފައިވާ ކަމުގައެވެ.

މި ރޯދަމަސް ފެށުނުފަހުން އަލް އަގުސާ މިސްކިތް ހިމެނޭ ސަރަހައްދުގައި ދަނީ އިސްރާއީލު ސިފައިންނާއި ފަލަސްތީނު ރައްޔިތުންނާ ދެމެދު ހަމަނުޖެހުންތައް ހިގަމުންނެވެ. އަދި މިހަމަނުޖެހުންތަކުގައި ފަލަސްތީނުގެ ގިނަ އަދަދެއްގެ ރައްޔިތުންނަށް ވަނީ އަނިޔާ ވެފައެވެ.

އިސްރާއީލު ފުލުހުން އަލް މަސްޖިދުލް އަގުސާގެ ހުރުމަތް ކަނޑާލާ، ފަލަސްތީނު ރައްޔިތުންނަށް ދެމުންދާ ހަމަލާތައް ދުނިޔޭގެ ގިނަ ގައުމުތަކުން ދަނީ ކުށްވެރި ކުރަމުންނެވެ.