މުސްލިމުންގެ އެންމެ މުގައްދަސް އެއް ބިނާ ކަމުގައިވާ، ފަލަސްތީނުގެ ޖެރޫސެލަމްގައި ހުންނަ އަލް އަގުސާ މިސްކިތުގެ ތެރެއަށް ވަދެގަނެ، ފަލަސްތީނުގެ މުސްލިމުން މިސްކިތުގައި ނަމާދުކުރަން ތިއްބާ، އިސްރާއީލް ސިފައިން ދީފައިވާ ހަމަލާތައް ސައުދީ އަރަބިއާއިން ކުށްވެރި ކޮށްފިއެވެ. ސައުދީ އަރަބިއާއިން މި ހަމަނުޖެހުން ކުށްވެރި ކޮށްފައިވަނީ އެގައުމުން ނެރެފައިވާ ބަޔާނެއްގައެވެ.
"އެއްވެސް ބެލުމެއް ނެތި ރޭވިގެން ހިންގާ މަ ހަމަނުޖެހުންތަކަކީ، މާތް ވެގެންވާ އަލް އަގުސާ މިސްކިތަށާއި، އިސްލާމީ ގައުމެއްގައި މި މިސްކިތްހުރި މާތް ބިމަށް އަމާޒުކޮށް ދީފައިވާ ހަމަލާތަކެއް،" ސައުދީ ފޮރިންގ މިނިސްޓްރީން ނެރުނު ބަޔާނުގައި ބުނެފައި ވެއެވެ.
ފަލަސްތީނުގެ ޖެރޫސެލަމްގައި ހުންނަ އަލްއަގްސާ މިސްކިތުގެ އެތެރެއަށް ވަދެގަނެ އަދި މިސްކިތް ހިމެނޭ ސަރަހައްދުގައި އިސްރާއީލު ސިފައިންނާ ފަލަސްތީނުގެ ރައްޔިތުންނާ ދެމެދު ބޮޑެތި ހަމަނުޖެހުންތަކެއް ހިގާ، 152 މީހަކަށް ވަނީ އަނިޔާ ވެފައެވެ.
އިސްރާއީލުގެ ފުލުހުން ބުނެފައިވަނީ، ހަމަ ނުޖެހުން ފެށުނުތާ މަދު ގަޑިއިރުތަކެއް ތެރޭ، ފަލަސްތީނުގެ އެތައް ސަތޭކަ އާންމުން ހައްޔަރުކޮށް، ހަނުޖެހުން ކޮންޓްރޯލް ކޮށްފައި ވާކަމުގައެވެ. އަދި ބުނެފައިވަނީ އަލް އަގްސާ މިސްކިތް އަލުން ހުޅުވާ ހުކުރު ނަމާދު ކުރުމުގެ ފުރުސަތު ދީފައި ވާކަމުގައެވެ. މިހަފްތާގެ ހުކުރު ނަމާދަށް ފަލަސްތީނުގެ އެތައްހާސް މުސްލިމުން ވަނީ އަގްސާ މިސްކިތަށް ޖަމާވެފައެވެ.
ސައުދީ އަރަބިއާއިން ވަނީ، އިސްރާއީލު ސިފައިން މެދު ނުކެނޑި ފަލަސްތީނުގެ ރައްޔިތުންނަށް އަމާޒުކޮށް ދެމުންދާ ހަމަލަތަކާއި، ފަލަސްތީނުގެ ބިމުގައާއި އަދި ފަލަސްތީނުގެ މާތް ބިނާތަކަށް އަމާޒުކޮށް ހިންގަމުންދާ ހަމަނުޖެހުންތައް ހުއްޓުވުމަށް ބައިނަލްއަގުވާމީ މުޖުތަމަޢަށް ގޮވާލާފައެވެ.
އަދި ސައުދީ ފޮރިން މިނިސްޓްރީން ބުނެފައިވަނީ، މެދުއިރުމަތީގެ ސުލްހައިގެ މަޝްރޫޢު އަލުން މުރާޖަޢާކުރަން ޖެހިފައިވާ ކަމުގައެވެ.
އަލް އަގްސާ މިސްކިތް ކައިރީގައި އިސްރާއީލު ސިފައިންނާ ފަލަސްތީންގެ ރައްޔިތުންނާ ދެމެދު ހަމަނުޖެހުން ހިގާފައި މިވަނީ، ރޯދަމަހުގެ ދެވަނަ ހުކުރު ދުވަހުގެ ހުކުރު ނަމާދަށް މިސްކިތަށް މީހުން އެއްވާން ފަށާފައި ވަނިކޮށެވެ. އަދި މި ހަމަނުޖެހުންތައް ހިގާފައި މިވަނީ އިސްރާއީލުގައި ދިން ބަޑީގެ ހަމަލާތަކެއްގައި ފާއިތުވެދުޔަ މަހެއްހާ ދުވަހުގެ ތެރޭގައި އިސްރާއީލުގެ 14 މީހަކު މަރުވުމާއި ގުޅިގެން މަސްރަހު ވަރަށް ބޮޑަށް ހޫނެވެފައި ވަނިކޮށްވެސްމެއެވެ.
ފަލަސްތީނުގައި މިއަހަރުގެ ރޯދަމަސް ދިމާވަނީ، ޔަހޫދީންގެ ބަންދެއް ކަމުގައިވާ "ޕާސްއޯވަރ" ބަންދާއި ދިމާވާ ގޮތަށެވެ. ހަފްތާއަކަށް ދެމިގެންދާ ޔަހޫދީންގެ މި ބަންދު ފެއްޓެނީ ހުކުރު ދުވަހުގެ އިރު އޮއްސުމާއި ހަމައިންނެވެ. އަދި ކުރިސްޓިއަކުން ފާހަގަކުރާ އީސްޓަރ ބަންދުވެސް މިފަހަރު ރޯދަމަހާއި ދިމާވެއެވެ. އީސްޓަރ ބަންދު ފެށެނީ އަންނަ އާދީއްތަ ދުވަހުން ފެށިގެންނެވެ.
އަދި މި ބަންދުތަކުގައި ކުރިސްޓިއަނުންނާއި ޔަހޫދީންގެވެސް އެތައް ހާސްބަޔަކު އަޅުކަންތައް އަދާ ކުރުމަށްޓަކާ ޖެރޫސެލަމްއަށް ޒިޔާރަތް ކުރެއެވެ. ޖެރޫސެލަމްއަކީ މުސްލިމުންނާއި، ޔަހޫދީން އަދި ކުރިސްޓިއަނުންވެސް ޚާއްސަކަމަށް ދެކޭ ދީނީ ބިނާތައް ހުރި ސިޓީއެކެވެ.
އަލް އަގްސާ މިސްކިތް ހިމެނޭ ސަރަހައްދު ބަލަހައްޓަމުންދާ ފަރާތުން ހާމަ ކޮށްފައިވާ ގޮތުގައި، ހުކުރު ދުވަހުގެ ފަތިސް ނަމާދަށް އެތައް ހާސް މުސްލިމުން ޖަމާވެފައި ވަނިކޮށް، އިސްރާއީލުގެ ސިފައިންވަނީ ގަދަކަމުން އަލް އަގުސާ މިސްކިތަށް ވަދެގެންފައެވެ. އިސްރާއީލު ސިފައިން ބުނެފައިވަނީ މިސްކިތަށް ވަދެގެންފައިވަނީ، ހަމަ ނުޖެހުން ހިންގުމަށް ގަލާއި ހިލަފަދަ ތަކެތި މިސްކިތްތެރޭގައި ޖަމާކޮށްފައި ވާކަމަށް ޝައްކު ކުރެވިގެން ކަމުގައެވެ.
ފަލަސްތީނުގެ ރެޑް ކްރެސެންޓް އެމަޖެންސީ ސާވިސްއިން ބުނެފައިވަނީ، މި ހަމަނުޖެހުންތަކުގައި އަނިޔާވެގެން 59 މީހަކު ހޮސްޕިޓަލަށް ގެންދެވިފައި ވާކަމުގައެވެ.
މާތްވެގެންވާ އަލް އަގުސާ މިސްކިތް ހުންނަ އިރުމަތީ ޖެރޫސެލަމް އިސްރައީލުން ހިފާފައިވަނީ 1967 ވަނަ އަހަރުއެވެ. އެއަށްފަހު މިއީ އިސްރާއީލުގެ ބައެއްގެ ގޮތުގައި އެގައުމުން ކަނޑައަޅާފައި ވިނަމަވެސް، ބައިނަލް އަގުވާމީ ގޮތުން އިސްރާއީލުގެ މިނިންމުން ބަލައިގެންފައެއް ނުވެއެވެ.
