ގދ.ރަތަފަންދޫ ފެނާއި، ނަރުދަމާގެ މަސައްކަތް ކުރުމަށްޓަކައި، ބޭނުންވާ ހުއްދަތައް ވީހާވެސް އަވަހަކަށް ލިބޭނެ ގޮތެއް ހަމަޖައްސަވައި ދެއްވުމަށް، ޕްލޭނިން މިނިސްޓަރ އަސްލަމްގެ ކިބައިން، ރަތަފަންދޫ ތަރައްޤީއަށް ގިނަ މަސައްކަތްތަކެއް ކުރައްވަމުންދާ ސައުދު އެދިއްޖެއެވެ.

ރައްޔިތުންގެ އެންމެ އަސާސީ ބޭނުންތަކުގެ ތެރޭގައި ހިމެނޭ ފެނާއި، ނަރުދަމާގެ މަސައްކަތް ފެށުމަށްޓަކައި، މިމަސައްކަތް ނުކުރެވި އޮތް ހުރިހާ ރަށެއްގައި މަސައްކަތް ފެށުމަށް ސަރުކާރުންވަނީ ކޮންޓްރެކްޓަރުންނާއި ހަވާލުކޮށްފައެވެ. ސަރުކާރުގެ އަމާޒަކީ މިވެރިކަން ނިމުމުގެ ކުރިން ރާއްޖޭގެ މީހުން ދިރުއުޅޭ ހުރިހާ ރަށެއްގައި ފެނާއި ނަރުދަމާގެ މަސައްކަތް ނިންމުމެވެ.

މިމަސައްކަތުގެ ތެރެއިން ގދ.ރަތަފަންދޫގައި ފެނާއި ނަރުދަމާގެ މަސައްކަތް ކުރުމަށް ކޮންޓްރެކްޓް ކުރިތާ މިހާތަނަށް 8 މަސް ދުވަސް ވެގެން ގޮސްފައިވާއިރުވެސް މަސައްކަތް ނުފެށި މައްސަލާގައި އެރަށުގެ ގިނަ ރައްޔިތުންގެ ދަނީ ކަންބޮޑުވުން ފާޅު ކުރަމުންނެވެ. ރަތަފަންދޫ ފެނާއި ނަރުދަމާގެ މަސައްކަތް ނުފެށި ލަސްވަނީ ޕްލޭނިން މިނިސްޓްރީ ލިބެންޖެހޭ ހުއްދަތައް ނުލިބިގެންކަމަށް މިމަސައްކަތް ހަވާލުކޮށްފައިވާ ކޮންޓްރެކްޓަރު ވަނީ ބުނެފައެވެ. މިކަމުގެ ކަންބޮޑުވުން ފާޅުކޮށް ސައުދު ވިދާޅުވީ ރައީސްގެ ވައުދުތައް ފުއްދުމުގެ ބަދަލުގައި ލަސްކޮށް، ހުރަސް އެޅޭ ގޮތަށް މަސައްކަތް ކުރުމަކީ ބަލައި ގަނެވޭނެ ކަމެއް ނޫންކަމަށެވެ.

ރަތަފަންދޫ ފެނާއި، ނަރުދަމާ ހަވާލު ކުރިތާ 8 މަސް ވަމުންދާއިރު މި މަސައްކަތް ނުފެއްޓި މިވަނީ ޕްލޭނިން މިނިސްޓްރީން މިނިސްޓަރ އަސްލަމް ދޭންޖެހޭ ބައެއް ހުއްދަތައް ނުލިބިގެން ކަމަށް މިސައްކަތާއި ހަވާލުވެފައިވާ ކުންފުނިން މައުލޫމާތުދޭ. މިއީ ދެރަވަރު ކަންކަން. ރައީސްގެ ވައުދު ތަކާއި އިދިކޮޅަށް މަސައްކަތް ކުރުން ގޯސް.

– ސައުދު ވިދާޅުވިއެވެ.

ސައުދު ވިދާޅުވީ ރަތަފަންދޫ ފެނާއި، ނަރުދަމާގެ މަސައްކަތަކީ ރަށުގެ ރައްޔިތުންގެ ވަރަށް ބޮޑު އުންމީދަކާއި ގުޅިފައިވާ މަސައްކަތެއްކަމަށެވެ. ރަށުގެ ތަރައްޤީގެ ބޮޑު ހިއްސާއެއްވެސް މިކަމުގައި އޮތް އިރު މިމަސައްކަތް ނުފެށި ލަސްވާ ކޮންމެ ދުވަހަކީ ރަތަފަންދޫ ރައްޔިތުންނަށް ލިބޭނެ ބޮޑު ގެއްލުމެއްކަމަށް ސައުދު ވިދާޅުވިއެވެ.

ރަތަފަންދޫ ފެނާއި، ނަރުދަމާ އަވަސްކޮށް ދިނުމަށް ދޭންޖެހޭ ހުއްދަތައް އަވަސް ކޮށް ދިނުމަށް މިނިސްޓަރ އަސްލަމަށް ގޮވާލަން. މިކަމަކީ ރަށުގެ ރައްޔިތުންގެ ވަރަށް ބޮޑު އުންމީދާއި ގުޅިފައިވާ ކަމެއް. ރަށުގެ ރައްޔިތުންގެ ދިރި އުޅުމުގާއި، އިޤްތިސާދާއިވެސް ގުޅިފަ. މިކަން އަވަސް ވާނެ ގޮތެއް ހައްދަވާ.

– ސައުދު ވިދާޅުވިއެވެ.

ސަރުކާރުގެ 3 އަހަރުގައި ރަށްރަށުގައި ފެނާއި ނަރުދަމާ ނިޒާމު ޤާއިމުކުރުމަށް 5.8 ބިލިއަން ރުފިޔާގެ މަޝްރޫޢު މިހާތަނަށްވަނީ ހަވާލުކޮށްފައެވެ. ރައީސުލްޖުމްހޫރިއްޔާ ވިދާޅުވެފައިވަނީ ސަރުކާރުތަކުން، އަދި ސިޔާސީ ފަރާތްތަކުން ތަރައްޤީގެ ވާހަކަ ދައްކަން އަގަ ހުޅުވާލަން ޖެހޭނީވެސް ފުރަތަމަ "ގައިން ތާހިރު" ވާނެ ގޮތެއް ރައްޔިތުންނަށް ތަނަވަސް ކޮށް ދިނުމަށް ފަހުގައިކަމަށެވެ.