ދެކުނަށް މަސްވެރިކަން ރަނގަޅުވެ މަސް ގަންނަ އަދަދު ކޮންޓްރޯލް ކޮށްފައި އޮތް އޮތުން ނިމުމަކަށް ގެނައުމަށް ގޮވާލާ ހުށައެޅި ކުއްލި މައްސަލަ މަޖިލީހުން ބޭރުކޮށްލައިފިއެވެ.
މަޖިލީހަށް މި މައްސަލަ ހުށައެޅުއްވީ ފަރެސްމާތޮޑާ ދާއިރާގެ މެންބަރު ޙުސައިން މުޙައްމަދު ލަޠީފެވެ. މެންބަރު ޙުސައިން ހުށައެޅުއްވި ކުއްލި މައްސަލާގައި ވަނީ، މަސްވެރިކަން އިންތިހާއަށް ރަނގަޅުވެފައިވާއިރު، މަސްވެރިން ބާނާ މަސް ކިރުން ކޮންޓްރޯލް ކޮށްފައިވުމަކީ އޭގެ ގެއްލުން މަސްވެރިންނަށް އިންތިހާއަށް ކުރާކަމެއްކަމަށެވެ. އަދި ބައެއް ދޯނިތަކުން ބާނާ މަސް އުކާލަން ޖެހުމާއި، ކޮންމެ ދުވަހަކު ބޭނުންވާ މިންވަރަށް މަސް ބޭނުމަކީ ޚަރަދުގެ ގޮތުން ވެސް ދެކޮޅު ޖެހޭކަމެއް ނޫންކަމަށްވެސް މި މައްސަލާގައި ބުނެފައިވެއެވެ.
ކުއްލި މައްސަލަ މަޖިލީހަށް ބަލައިގަތުމަށް ވޯޓަށް އެހުމުން މައްސަލަ ބަލައިގަތުމާއި ދެކޮޅަށް 41 މެންބަރުން ވޯޓު ދެއްވިއެވެ. މިއާއެކު މައްސަލަ ވަނީ މަޖިލީހުން ބޭރުކޮށްލާފައެވެ.
މެންބަރު ހުށައެޅުއްވި މައްސަލާގައި ބަޔާންކޮށްފައިވަނީ، މަސްވެރިން ބާނާ މަސް ކިރުމަށް މަސް ގަންނަ ބަނދަރުތަކުގައި ހަފްތާއެއްހާ ދުވަހު މަޑުކޮށްގެން ކިރެނީ ފަސް ޓަނު ކަމަށެވެ. 70 ޓަނުގެ މަސް އުކާލަންޖެހޭ ކަމަށާއި، ގޮތަށް ކަންކަން ހުރުމާ ގުޅިގެން ހަރަދު ދެކޮޅު ނުޖެހޭތީ މަސްވެރިން މަހަށް ނުފުރާކަމަށް މައްސަލާގައި ބަޔާންކޮށްފައިވެއެވެ. މަސްވެރިންނަށް ފައިސާ ލިބުން ދަތިވެފައިވާތީ މަސްވެރިންގެ އާއިލާތަށް ނިކަމެތިވެ ޖީބުތައް ހުސްވެއްޖެކަމަށްވެސް މެންބަރު ވިދާޅުވިއެވެ.
ރާއްޖޭގެ ދެކުނަށް މަސްވެރިކަން ރަނގަޅުވެ މަސްބާނާ މިންވަރު ވަނީ އިތުރުވެފައެވެ. މިއާއެކު މިފްކޯއާއި އަމިއްލަ ކުންފުނިތަކަށް މަސް ގަންނަ މިންވަރު ވަނީ ކޮންޓްރޯލްކޮށްފައެވެ. މަސްވެރިން ބާނާ މަސްކޮޅު ނުކިރުވި އުކާލަން ޖހުމާއި ގުޅިގެން ގިނަ މަސްވެރިން އަންނަނީ ކަންބޮޑުވުން ފާޅުކުރަމުންނެވެ.
