ރައްޔިތުންގެ މަޖިލީހުގެ މިއަދުގެ ޖަލްސާއަށް މަސްވެރިކަމާއި ބެހޭ ވަޒީރު ޑޮކްޓަރ ހުސެއިން ރަޝީދު ހަސަން ހާޒިރު ކުރެވިފައިވަނީ އޮޅުމަކުން ކަމަށާއި، ޖަވާބަށް އެދިފައިވަނީ ލިޔުމުން ކަމަށްވާތީ ވަޒީރު ހާޒިރުކޮށް، ގިނަ ސުވާލުތަކެއް ކުރުމަށްފަހު ސުވާލުގެ ބައި ނިންމާލައިފިއެވެ.
މިއަދުގެ ޖަލްސާއަށް ފިޝަރީޒް މިނިސްޓަރ މަޖިލީހަށް ހާޒިރު ކުރިއިރު، މިދުވަސްވަރު ރާއްޖޭގެ މަސްވެރިކަން އިންތިހާއަށް ރަނގަޅުވެ، މަސްވެން ބާނާ މަސް ނުކުރެވޭ މައްސަލާގައި މަސްވެރިން ދަނީ ކަންބޮޑުވުން ފާޅު ކުރަމުންނެވެ. މަސްވެރިން ބާނާ މަސް ކިރުވުމުގައި މިފްކޯއިންވެސް ވަނީ ދާދި ފަހުން މަސް ކިރުވާ މިންވަރު ލިމިޓްކޮށްފައެވެ. ނަމަވެސް ޖަލްސާގައި ސުވާލު ކުރުމަށް ފެށުމާއިމެކު ވަޒީރުވަނީ އައިސްއާއި ގުޅޭ ސުވާލު ފިޔަވައި އެހެން ސުވާލުތަކަށް ޖަވާބު ދެއްވަން ފަސްޖެހޭ ކަމަށް ވިދާޅުވެފައެވެ.
ވަޒީރު މަޖިލީހަށް ހާޒިރު ކޮށްފައިވަނީ ރައްޔިތުންގެ މަޖިލީހުގެ ދިއްދޫ ދާއިރާގެ މެންބަރު ވަޙީދު، ކުރައްވާ ސުވާލަކާއި ގުޅިގެންނެވެ. ވަހީދު ކުރައްވާ ސުވާލަކީ ހއ.ދިއްދޫގައި އައިސް ޕްލާންޓެއް ޤާއިމްކޮށްދެއްވުމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވަނީ ވަޢުދުވެ ވަޑައިގެންފައިވާކަމަށާއި، އެއާ އެއްގޮތަށް، 2021 ސެޕްޓެންބަރު 8 ވަނަ ދުވަހު، ސަޢޫދީ ފަންޑުގެ އެހީގައި ހއ. ދިއްދޫގައި 25 ޓަނުގެ އައިސް ޕްލާންޓެއް ޤާއިމްކުރުމުގެ މަސައްކަތް، މިނިސްޓްރީ އޮފް ފިނޭންސްގެ ފަރާތުން ވަނީ އިޢުލާންކުރައްވާފައިކަމަށެވެ.
އެހެން ނަމަވެސް، އޭގެ ފަހުން އެކަމުގެ އެއްވެސް މަޢުލޫމާތެއް ނުލިބޭތީ މިހާރު އެކަން ގޮސްފައިވާހިސާބަކީ ކޮބައިތޯ؟ އަދި އައިސް ޕްލާންޓް ޤާއިމްކުރުމުގެ ޢަމަލީ މަސައްކަތް ފެށި އޭގެ ޚިދުމަތް ރައްޔިތުންނަށް ލިބިގެންދާނެ ކަމަށް ލަފާ ކުރާ ތާރީޚެއް އޮޅުން ފިލުވުމަށެވެ.
މިސުވާލުގެ ޖަވާބުގައި ވިދާޅުވީ ބިޑަށް އެކަށީގެންވާ ތަރުހީބެއް ނުލިބި އަލުން ބިޑަށް ހުޅުވާލުމުގެ މަސައްކަތް ކުރަމުންދާކަމަށެވެ. ސުވާލަށްފަހު ވަޒީރާއި، ސުވާލު ކުރަން ހުޅުވާލި ފުރުސަތުގައި، ގިނަ މެމްބަރުން ސުވާލު ކުރައްވާފައިވަނިކޮށް މަރަދޫ ދާއިރާގެ މެމްބަރު އިބްރާހިމް ޝަރީފް ވަނީ ނިޒާމީ ނުކުތާ ނަންގަވައި، ވަޒީރާއި ސުވާލު ކުރަން އޮތީ ލިޔުމުންކަމަށް ދަންނަވާފައެވެ. ޝަރީފްގެ ނުކުތާ ބަލައި ގަނެ މަޖިލިސް ރައީސް ވަނީ މިއަދު ވަޒީރު މަޖިލީހަށް ހާޒިރުކުރެވުނީ އޮޅުމަކުން ކަމަށް ވިދާޅުވެފައެވެ.
އަދި ސުވާލުގެ ޖަވާބު ލިޔުމުން ދެއްވުމަށް އެދިވަޑައިގެން ސުވާލުގެ ބައި ވަނީ ނިންމަވާލައްވާފައެވެ. މަޖިލީހުގައި ވަޒީރުންނާއި ސުވާލު ކުރުމަށް ލިބޭ ފުރުސަތުގައި މެމްބަރުންނަށް ސުވާލު ކުރުމަށް 20 މިނިޓްގެ ފުރުސަތެއް ލިބެއެވެ.
